અમરેલી / ધાનાણીના ગઢમાં કોંગ્રેસે 5 માંથી 4 ટિકિટ કરી કન્ફર્મ, એક પર કોકડું ગુંચવાયું, આ નામોની ફક્ત સત્તાવાર જાહેરાત બાકી

• કોંગ્રેસે અમરેલી જિલ્લાની 5 માંથી 4 ટિકિટ કરી કન્ફર્મ 
• અમરેલીથી પૂર્વ નેતા વિપક્ષ પરેશ ધાનાણી લડશે ચૂંટણી 
• સાવરકુંડલાથી સીટિંગ MLA પ્રતાપ દુધાત રિપીટ થશે

ગુજરાત વિધાનસભાની ચૂંટણીએ આંગણે ટકોરો માર્યો છે. જેને લઇને રાજકીય પક્ષોમાં કામગીરીનો ધમધમાટ ચાલી રહ્યો છે. આવી સ્થિતિ વચ્ચે મુખ્યત્વે ઉમેદવારોની પસંદગી માટે ભાજપ-કોંગ્રેસ દ્વારા મિટિંગ, મંથન ચાલી રહ્યું છે.  ચૂંટણીમાં કોંગ્રેસ હંમેશા પોતાના જૂના જોગીઑ પર વિશ્વાસ કરતી આવી છે. તેમ આ ચૂંટણીમાં પણ સિનિયર  નેતાઑને રિપીટ કરવામાં આવી શકે છે. જાણવા મળતી વિગત અનુસાર કોંગ્રેસે અમરેલી જિલ્લાની 5 માંથી 4 બેઠક પર ઉમેદવારોની ટિકિટ લગભગ કન્ફર્મ કરી લીધી છે. 

રાજુલા-જાફરાબાદથી કોંગ્રેસના કાર્યકારી અધ્યક્ષ અંબરિસ ડેર રિપીટ 
અમરેલી જિલ્લામાં કોંગ્રેસે 4 બેઠક પરના મુરતીયા નક્કી કરી લીધા છે. જેમાં અમરેલીથી પૂર્વ નેતા વિપક્ષ પરેશ ધાનાણીને કોંગ્રેસ ચૂટંણી જંગમાં ઉતારી શકે શકે છે. તો સાવરકુંડલાથી સીટિંગ MLA પ્રતાપ દુધાત રિપીટ થઇ શકે છે. ઉપરાંત રાજુલા-જાફરાબાદથી કોંગ્રેસના કાર્યકારી અધ્યક્ષ અંબરિશ ડેરને પણ ફરી એક વખત ટિકિટ આપવામાં આવશે અને લાઠી બાબરાથી વીરજી ઠુંમરને પણ રિપીટ કરવામાં આવશે. જો કે આ મામલે કોઈ સત્તાવાર જાહેરાત કરવામાં આવી નથી પરંતુ મોટા ભાગની ટિકિટ ફાઇનલ હોવાનું જણાઈ રહ્યું છે.  

ધારી બેઠકને લઇ કોંગ્રેસનું કોકડું ગૂંચવાયું
વધુમાં ધારી બેઠકને લઇ કોંગ્રેસનું કોકડું ગૂંચવાયું છે. જેમાં ટિકિટ કન્ફર્મ કરવા માટે કોંગ્રેસ ગોટે ચડી છે. કારણ કે આ બેઠક પર  ડૉ.કીર્તિ બોરીસાગર, વલ્લભ ઝુંઝવાડિયા, જેનીબેન ઠુંમર પ્રબળ દાવેદાર છે. વીરજી ઠુમ્મર પણ દીકરી જેની ઠુમ્મર માટે ભારે લોબિંગ કરી રહ્યાં છે. પરંતુ એક જિલ્લામાં પિતા-પુત્રીને ટિકિટ આપવાને લઇ કોંગ્રેસ અવઢવમાં પડી છે. એટલુ જ નહિ ધારી બેઠકને લઇ મામલો દિલ્લી દરબારમાં અટવાયો હોવાનું જાણવા મળી રહ્યું છે.