સાયક્લોન ઇફેક્ટ / ઘોઘા-હજીરા રો-રો ફેરી અને અંબાજી રોપ-વે સર્વિસ હવે આ તારીખ સુધી બંધ, વાવાઝોડાને લઈને લેવાયો નિર્ણય

 

• ભાવનગરમાં ઘોઘા-હજીરા રો-રો ફેરી બંધ
• યાત્રાધામ અંબાજીમાં રોપ-વેની સેવા બંધ
• દરિયાકાંઠા વિસ્તારમાં રહેતા લોકોનું સ્થળાંતર 

મહાવિનાશક બિપોરજયો વાવાઝોડાનો ગુજરાતની માથે ખતરો મંડરાઈ રહ્યો છે. અરબ સાગરમાં સર્જાયેલું શક્તિળશાળી વાવાઝોડું 'બિપોરજોય' દ્વારકાથી 290 કિમી દૂર છે. જ્યારે પોરબંદરથી 300 કિલોમીટર અને જખૌ પોર્ટથી 340 કિલોમીટર દૂર છે. વાવાઝોડાની અસર ગુજરાતના દરિયાકાંઠા વિસ્તારોમાં વર્તાવા લાગી છે. દ્વારકા, ગીર સોમનાથ, માંડવી, પોરબંદર સહિતના દરિયા કિનારે ભારે પવન ફૂંકાઈ રહ્યો છે અને દરિયામાં ઉચા મોજા ઉછળી રહ્યા છે. ભાવનગરમાં પણ વાવાઝોડાની અસર જોવા મળી રહી છે. સાવચેતીના ભાગરૂપે ઘોઘા-હજીરા રો-રો ફેરી બંધ કરવામાં આવી છે. વહીવટી તંત્રના આદેશ બાદ રો-રો ફેરી બંધ કરવાનો નિર્ણય લેવામાં આવ્યો છે. 

15 જૂન સુધી રો-રો ફેરી સેવા બંધ 
રાજ્ય સરકારની મંજૂરી બાદ 16 જૂનથી ફરી રો-રો ફેરી શરૂ કરાશે. હાલ 15 જૂન સુધી રો-રો ફેરી સેવા બંધ રહેશે. અગાઉ 13 તારીખ સુધી જ રો-રો ફેરી બંધ કરવાની જાહેરાતા કરાઈ હતી. હાલ ઘોઘા સહિતના દરિયામાં ભારે કરંટ જોવા મળી રહ્યો છે. જેના કારણે રો-રો ફેરીને બંધ કરવામાં આવી છે. 

અંબાજીમાં રોપ-વે સેવા બંધ
યાત્રાધામ અંબાજીમાં રોપ-વેની સેવા બંધ કરવામાં આવી છે. આજથી 4 દિવસ સુધી ગબ્બર પર રોપ-વેની સુવિધા બંધ રહેશે. બિપરજોય વાવાઝોડાને લઈને ભક્તોની સુરક્ષાને ધ્યાને રાખીને મંદિર ટ્રસ્ટ દ્વારા નિર્ણય લેવાયો. 16 જૂન સુધી રોપ-વે સેવા બંધ રહેશે. 

જામનગર જિલ્લામાં લોકોનું કરાયું સ્થળાંતર 
વાવાઝોડાના જોખમને ધ્યાનમાં રાખીને જામનગર જિલ્લામાં કાંઠા વિસ્તારના 500 લોકોનું સ્થળાંતર કરાયું છું. જોડિયા 124, લાલપુર 100, જોડિયાના 355 લોકોનું સ્થળાંતર કરવામાં આવ્યું છે. સાથે જ જામનગરના માધાપર ભુગા ખાતે વસવાટ 120 પરિવારનું પણ સ્થળાંતર કરવામાં આવ્યું છે. મામલતદારને સાથે રાખી NDRFની ટીમે દરિયા કાંઠાનું નિરીક્ષણ કર્યું છે. 

NDRFની 21, SDRF 13 ટીમ તૈનાત
બિપોરજોય વાવાઝોડાને લઈને ગુજરાતમાં NDRFની 21, SDRF 13 ટીમ તૈનાત કરાઈ છે. માર્ગ અને મકાન વિભાગની 95 ટીમ સંભવિત વિસ્તારોમાં મોકલાઈ છે. ઊર્જા વિભાગની 577 ટીમો પણ ખડેપગે છે. અત્યાર સુધીમાં દરિયાકાંઠા વિસ્તારના 3 હજાર 243 લોકોને સુરક્ષિત સ્થળે ખસેડાયા છે. દ્વારકાના પ્રવાસન સ્થળો પર પણ સહેલાણીઓને ન જવા સૂચના આપવામાં આવી છે.  નારાયણ સરોવર અને કોટેશ્વર મંદિર 3 દિવસ યાત્રાળુઓ માટે બંધ કરાયું છે.