મધ્યપ્રદેશ / BF સાથે ધ કેરલા સ્ટોરી જોવા ગઈ GF, બહાર નીકળતા જ છોકરા પર કરી નાંખ્યો કેસ

• મધ્યપ્રદેશના ઈન્દોરમાંથી એક ચોંકાવનારી ઘટના
• ધ કેરલા સ્ટોરી ફિલ્મ જોયા બાદ યુવતીએ તેના BF વિરુદ્ધ કર્યો કેસ
• યુવક લગ્નનું વચન આપીને શારીરિક સંબંધ બાંધી ધર્મ પરિવર્તન માટે કરતો હતો દબાણ 

મધ્યપ્રદેશના ઈન્દોરમાંથી એક ચોંકાવનારી ઘટના સામે આવી છે. વાત જાણે છે કે, ધ કેરલા સ્ટોરી ફિલ્મ જોયા બાદ યુવતીએ તેના BF વિરુદ્ધ પોલીસ સ્ટેશનમાં ફરિયાદ નોંધાવી હતી. યુવતીનું કહેવું છે કે, યુવકે લગ્નનું વચન આપીને તેની સાથે બળાત્કાર કર્યો અને હવે તેના પર ધર્મ પરિવર્તન માટે દબાણ કરી રહ્યો છે. યુવતીની ફરિયાદના આધારે પોલીસે યુવક વિરુદ્ધ ગુનો નોંધી તેની ધરપકડ કરી હતી અને આ મામલે તપાસ શરૂ કરી હતી. 

શું છે સમગ્ર ઘટના ? 
આ ઘટના ઈન્દોરના ખજરાના પોલીસ સ્ટેશન વિસ્તારની છે. પોલીસ સ્ટેશનમાં આવેલી યુવતીએ પોલીસને જણાવ્યું કે, કોચિંગમાં જતી વખતે તેની ફૈઝાન નામના યુવક સાથે મિત્રતા થઈ હતી. ધીરે ધીરે બંને વચ્ચે પ્રેમ થયો. યુવતીના કહેવા પ્રમાણે ફૈઝાને લગ્નનું વચન આપીને તેની સાથે અનેક વખત શારીરિક સંબંધો બાંધ્યા હતા.  યુવતીએ પોતાની ફરિયાદમાં વધુમાં જણાવ્યું છે કે જ્યારે તેણે લગ્ન કરવાનું કહ્યું ત્યારે ફૈઝાને તેના પર ધર્મ પરિવર્તન માટે દબાણ કરવાનું શરૂ કર્યું. જ્યારે પણ તેણી લગ્ન કરવા કહેતી ત્યારે ફૈઝાન તેને પહેલા ધર્મ પરિવર્તન કરાવવાનો આગ્રહ રાખતો હતો.

ધ કેરલા સ્ટોરી ફિલ્મ જોઈ અને પછી.... 
યુવતીના કહેવા પ્રમાણે તેણે ફૈઝાનને તાજેતરમાં રિલીઝ થયેલી ફિલ્મ ધ કેરલા સ્ટોરી જોવા જવા કહ્યું હતું, પરંતુ તે સંમત ન હતો. બાદમાં કોઈક રીતે તે ફિલ્મ જોવા જવા માટે રાજી થઈ ગયો. ફિલ્મ જોયા બાદ યુવતીમાં હિંમત આવી અને તે ફૈઝાન સામે કેસ કરવા માટે ખજરાના પોલીસ સ્ટેશન પહોંચી હતી. 

પોલીસે કરી ફૈઝાનની ધરપકડ
આ તરફ યુવતીની ફરિયાદના આધારે પોલીસે ફૈઝાન વિરુદ્ધ બળાત્કાર અને ધર્મ પરિવર્તન માટે દબાણ સહિત અન્ય કલમો હેઠળ કેસ નોંધ્યો છે. પોલીસે ફૈઝાનની તાત્કાલિક ધરપકડ કરી હતી. ખજરાના પોલીસનું કહેવું છે કે, યુવતીની ફરિયાદ પર કેસ નોંધ્યા બાદ આરોપીની ધરપકડ કરવામાં આવી છે. આ મામલે તપાસ ચાલી રહી છે. જેના આધારે આગળની કાર્યવાહી હાથ ધરવામાં આવશે. 

શું છે ફિલ્મની વાર્તા?
'ધ કેરલા સ્ટોરી' ત્રણ છોકરીઓ શાલિની, નીમા અને ગીતાંજલિની કહાની કહે છે, જેઓ નર્સ બનવા માટે તેમના ઘરથી દૂર કૉલેજમાં જાય છે. અહીં તે આસિફાને મળે છે જે કટ્ટરવાદી છે. ધીમે ધીમે ખબર પડી કે, આસિફા ISIS માટે છોકરીઓની ભરતી કરવાનું પણ કામ કરે છે. તેના સાથીઓની મદદથી તે ત્રણેયને ધર્મ બદલવા માટે ઉશ્કેરવા લાગે છે. ત્રણ છોકરીઓમાં આસિફાથી પ્રભાવિત થનારી શાલિની પ્રથમ છે. તેને આસિફાના એક મિત્ર સાથે પણ પ્રેમ થાય છે અને તે તેનો ધર્મ બદલીને લગ્ન કરવા તૈયાર છે.