કાર્યવાહી / કુખ્યાત નિખિલ દોંગાની મુશ્કેલી વધી, રાજકોટની સ્પેશિયલ કાર્ટે અરજી ફગાવીને આપ્યો મોટો આદેશ

• નિખિલ દોંગાને સાબરમતી જેલમાં મોકલાશે
• સાબરમતી જેલમાં મોકલવાનો કોર્ટનો આદેશ
• અત્યારે ભુજની જેલમાં બંધ છે નિખિલ દોંગા

હત્યાની કોશિશ સહિતના 14થી વધુ ગુનામાં પોલીસ ચોપડે ચડેલ અને ગુજસીટોકના ગુનામાં જેલની હવા ખાતા નિખિલ દોંગાને સાબરમતી જેલમાં મોકલવા આદેશ કરાયો છે. રાજકોટની સ્પેશિયલ કોર્ટે નિખિલ દોંગાને અમદાવાદની સાબરમતી જેલમાં મોકલવાનો આદેશ કર્યો છે. 

પોલીસે કરી હતી ફરિયાદ
કુખ્યાત નિખિલ દોંગાએ સાબરમતી જેલમાં જવાના આદેશ પર સ્ટે માટે અરજી કરી હતી. રાજકોટની સ્પેશિયલ કોર્ટે નિખિલ દોંગાની અરજીને ફગાવી દીધી છે અને તેને સાબરમતી જેલમાં મોકલવાનો આદેશ કર્યો છે. અત્યારે નિખિલ દોંગા ભુજની પાલારા જેલમાં બંધ છે. મહત્વનું છે કે, ભુજની જેલમાં નિખિલ દોંગાને સગવડો મળતી હોવાની પોલીસે ફરિયાદ કરી હતી. 

કોર્ટે સાબરમતી જેલમાં મોકલવાનો કર્યો આદેશ
પોલીસ તરફી સ્પે.પી.પી. એસ.કે.વોરાએ ધારદાર દલીલો કરી હતી. જેમની દલીલને ગ્રાહ્મ રાખી રાજકોટની સ્પેશિયલ કોર્ટે નિખિલ દોંગાને સાબરમતી જેલમાં મોકલવાનો આદેશ કર્યો છે. 

ગેંગ સામે નોંધાયા છે 117 જેટલા ગુના
રાજકોટ સહિત અન્ય જિલ્લામાં નિખિલ દોંગા ગેંગ સામે હત્યાની કોશિશ સહિત 117 જેટલા ગુના નોંધાયા છે. ત્યારબાદ પોલીસ દ્વારા કુખ્યાત નિખિલ દોગા સામે ગુજસીટોક કાયદાનું હથિયાર ઉગામી ગોંડલ જેલમાં ધકેલી દેવામાં આવ્યો હતો. જ્યાં નિખિલ દોંગાએ આખા જેલ પ્રશાસનને રૂપિયાના પાવરથી કાબૂમાં કરી લીધું હતું અને જેલમાં પણ તે જલસાની જિંદગી જીવતો હતો. જે અંગે જિલ્લા પોલીસ વડાને જાણ થતાં નિખિલને ભુજની પલારા જેલમાં મોકલ્યો હતો. 

સિવિલ હોસ્પિટલમાંથી થયો હતો ફરાર 
થોડા દિવસબાદ નિખિલે બીમારીનું કારણ ધરીને ભાગી જવા માટે નાટક રચ્યું હતું. જેથી પોલીસ દ્વારા તેને ભુજ સિવિલ હોસ્પિટલમાં ખસેડવામાં આવ્યો હતો. આ દરમિયાન પોલસને હાથતાળી આપીને નિખિલ દોંગા રાત્રે ફરાર થઈ ગયો હતો. જે બાદ પોલીસે ત્રણ દિવસમાં જ તેને ઝડપી પાડ્યો હતો. તેની ઉતરાખંડના નૈનીતાલમાંથી ધરપકડ કરવામાં આવી હતી. જે બાદ પોલીસને એવી માહિતી મળી હતી કે તેને ભુજની જેલમાં પણ દરેક સગવડો મળી રહી છે. જેથી પોલીસે તેને સાબરમતી જેલમાં ખસેડવા કોર્ટમાં અપીલ કરી હતી.