ગણપતિ બાપ્પા મોરયા / અમદાવાદીઓ આ મોકો ચુકતા નહીં, ચંદ્રયાન-3ની થીમ પર અદભૂત ગણેશ પંડાલ, કરી લો બાપ્પાના અનોખા દર્શન

• અમદાવાદમાં ધૂમધામથી ગણેશ ઉત્સવ મનાવવામાં આવી રહ્યો છે
• અમે તમને અમદાવાદના 5 ગણપતિ પંડાલ વિશે જણાવશું
• અમદાવાદમાં ચંદ્રયાન-3ની થીમ પર ગણેશ પંડાલનું આયોજન થયું 

11 દિવસ સુધી ચાલતાં ગણેશ મહોત્સવનો પ્રારંભ થઈ ગયો છે અને અમદાવાદમાં ધૂમધામથી ગણેશ ઉત્સવ મનાવવામાં આવી રહ્યો છે. પહેલા દિવસે ગણપતિની પૂજા અને સ્થાપના કરવામાં આવે છે. દરરોજ 10 દિવસ સુધી વિધિ વિધાનની સાથે ગજાનંદની પૂજા કરવામાં આવે છે. આ વખતે 28 સપ્ટેમ્બર 2023માં અનંત ચતુર્દશીનાં દિવસે ગણપતિનું વિસર્જન થશે. 

એવામાં આજે અમે તમને અમદાવાદના 5 ગણપતિ પંડાલ વિશે જણાવશું જ્યાં તમે બાપ્પાના અનોખા દર્શન કરી શકો છો. 

શહેરના ઓઢવ વિસ્તારની રત્નમાલ સોસાયટીમાં શ્રી કૃષ્ણ યુવક મંડળ દ્વારા ચંદ્રયાન-3ની થીમ પર ગણેશ પંડાલનું આયોજન કરવામાં આવ્યું છે જ્યાં આશરે 13 ફૂટની ઊંચી ગણેશ ભગવાનની મૂર્તિ છે. આ મંડળ છેલ્લા 29 વર્ષથી ગણપતિ પંડાલનું આયોજન કરે છે. ગણપતિ પર્વ પર ચંદ્રયાન 3ના સફળતાની ઉજવણીનો અલગ નજારો જોવા મળ્યો છે. 

અમદાવાદમાં સૌથી મોટા અને વધારે ગણેશ ઉત્સવની ઉજવણી શહેરના મણીનગરમાં દક્ષિણી વિસ્તારમાં થાય છે. અમદાવાદના મણિનગર વિસ્તારમાં જતાં વચ્ચે રસ્તામાં હટકેશ્વર ભાઈપૂરાના ગણપતિ પંડાલનું આયોજન કરવામાં આવ્યું છે. જ્યાં ગણપતિ બાપ્પાની ખૂબ સુંદર પ્રતિકૃતિના દર્શન થશે. 

ત્યાંથી થોડે જ આગળ મણિનગરની દક્ષિણી સોસાયટીમાં શિવશક્તિ યુવક મંડળ સ્થાપિત ગણેશ પંડાલની સ્થાપના કરવામાં આવી છે. જ્યાં 'ભારત હી ભાગ્ય વિધાતા' આધારિત થીમ રાખવામાં આવી છે. 

અમદાવાદના મણિનગર વિસ્તારના રમણનગરમાં 'રમણનગર ના રાજા' ગણેશ પંડાલનું આયોજન કરવામાં આવ્યું છે. 

શહેરના વસ્ત્રાપુર વિસ્તારમાં સરદાર પટેલ ગ્રુપ દ્વારા ગણપતિ પંડાલનું આયોજન કરવામાં આવ્યું છે. જ્યાં ગણેશજીની અભિભૂત કરી દે એવી મૂર્તિના દર્શન કરવા મળશે.