ગાંધીનગર / 'પપ્પા કાર તળાવમાં ખાબકી છે..' કટ થઈ ગયો ફોન, અમદાવાદના નારોલના યુવકોની કાર તળાવમાં ઉતરી જતાં દુર્ઘટના, 4ના મોત, 1ની શોધખોળ

• ગાંધીનગરના દશેલા ગામમાં પાણીના પ્રવાહમાં કાર ડૂબી
• કારમાં સવાર 4 લોકોના મૃતદેહ બહાર કઢાયા
• હજુ પણ એક વ્યક્તિની શોધખોળ ચાલુ

રાજ્યમાં આજે ડૂબવાની બે ઘટના સામે આવી છે. ગાંધીનગરમાં દશેલા ગામમાં પાણીના પ્રવાહમાં કાર ડૂબી જવાથી 4 લોકોના મોત થયા છે. તેમજ વલસાડના પારડીની કોલક નદીમાં ન્હાવા પડેલા 5 યુવકો ડૂબ્યા છે. જેમાં સ્થાનિકોએ 4 યુવકોને બચાવ્યા છે તેમજ એકની શોધખોળ ચાલી રહી છે.

ચાર લોકોના મોત
ગાંધીનગરના દશેલા ગામના તળાવામાં કાર ખાબકતા કાર સવાર ચાર લોકોના ડૂબવાથી મૃત્યું થયા છે. જ્યારે એક લાપતાની શોધખોળ હાથ ધરાઈ છે. સમગ્ર ઘટનાની વાત કરવામાં આવે તો યુવકો ગુમ થયાની પોલીસને જાણ થતાં પોલીસે તપાસ હાથ ધરી હતી. જેમાં પોલીસે મોબાઈલ લોકેશન ચેક કર્યા હતા. જેના આધારે તપાસ કરતા કાર તળાવમાંથી મળી આવી હતી. જો કે, સમગ્ર મામલે પોલીસે વધુ તપાસ હાથ ધરી છે.

રાજસ્થાનમાં ફરવા ગયા હતા
પાપ્ત માહિતી મુજબ આ તમામ યુવાનો રાજસ્થાનમાં ફરવા ગયા હતા. ત્યાંથી રિટર્ન ફરતી વેળા તેમના એક સાથી મિત્રને ગાંધીનગરના દશેલા ગામમાં મુકવા માટે ગયા હતા. ત્યારે આ દૂર્ઘટના ઘટી હતી. જે દરમિયાન એક યુવકે તેના પપ્પાને કોલ કરીને કહ્યું પણ હતું કે, પપ્પા કાર તળાવમાં ખાબકી છે. જેના પછી તરત જ ફોન કટ થઈ ગયો હતો. અત્રે જણાવીએ કે, અમદાવાદના નરોડાના 4 વ્યક્તિ રહેવાસી હતાં. 

મૃતકના નામની યાદી
નિમેષ પરમાર
ભરત સોલંકી
વિનય નાઈ
ગૌરાંગ ભટ્ટ

વલસાડમાં 5 યુવકો ડૂબ્યા
વલસાડના પારડીની કોલક નદીમાં ન્હાવા પડેલા 5 યુવકો ડૂબ્યા હતાં. સ્થાનિક લોકોએ 4 યુવકોને બચાવ્યા છે. તેમજ હાલમાં એક યુવકની શોધખોળ ચાલી રહી છે. તમામ યુવક ટુકવાડાના રહેવાસી હોવાનું પણ સામે આવ્યું છે.