- વિપુલ ચૌધરી ગેરરીતિ કેસમાં SITની રચના
- ગાંધીનગરમાંથી અડધી રાત્રે વિપુલ ચૌધરીની થઈ હતી ધરપકડ
- 1 DIG, 1 DYSP, 3 PIનો SITમાં સમાવેશ
ગુજરાતના પૂર્વ ગૃહમંત્રી અને મહેસાણાની દૂધસાગર ડેરીના પૂર્વ ચેરમેન વિપુલ ચૌધરીની ગાંધીનગર સ્થિત તેમના બંગલેથી અડધી રાત્રે ફિલ્મી ઢબે ધરપકડ કરવામાં આવી છે. ત્યારે સમગ્ર મુદ્દે રાજકારણ ગરમાઈ ચૂક્યું છે. આરોપ પ્રત્યારોપના દોર વચ્ચે પોલીસ તપાસમાં 800 કરોડ રૂપિયાનું ગફલુ થયું હોવાનું ખૂલ્યું છે. જે બાદ હવે વિપુલ ચૌધરીનું મુશ્કેલીમાં વધારો થયો છે. ગેરરીતિ કેસમાં SITની રચના ગુજરાત સરકાર દ્વારા કરી દેવામાં આવી છે.
DIG મકરંદ ચૌહાણની અધ્યક્ષતામાં SITની રચના
- 1 DYSP, 3 PIનો SITમાં સમાવેશ
- DYSP આશુતોષ પરમારનો ટીમમાં સમાવેશ
- હાર્દિક ચાવડા, જે.એમ.ગઢવી, તોરલ પટેલનો સમાવેશ
800 કરોડ રૂપિયાનું કૌભાંડ છે: મકરંદ ચૌહાણ, ACBના ઝોનલ ડાયરેક્ટર
ત્યારે ACBના ઝોનલ ડાયરેક્ટર મકરંદ ચૌહાણનું સમગ્ર મામલે નિવેદન સામે આવ્યું છે. તપાસ મુજબ મની લોન્ડરિંગ એક્ટ હેઠળ ગુનો નોંધાયો છે. જેમાં પોલીસ જણાવ્યા અનુસાર 800 કરોડ રૂપિયાનું કૌભાંડ છે. વિપુલ ચૌધરી, પવન ચૌધરી, ગીતાબેન ચૌધરી સામે ગુનો નોંધાયો છે. CA શૈલેષ પરીખ સામે પણ ફરિયાદ દાખલ થઈ છે.
'એપ્રિલ 2022માં હોમ ડિપાર્ટમેન્ટમાં રિપોર્ટ સબમિટ થયો'
વધુ વિગત પ્રમાણે વિપુલ ચૌધરીના પત્ની અને પુત્ર પણ ડમી કંપનીના ડાયરેકટર હતા. સ્પેશિયલ ઓડિટ થયું હતું. ઓડિટ દરમિયાન હિસાબ આપી શક્યા ન હતા. જે બાદ વિપુલ ચૌધરીએ હાઇકોર્ટમાં અરજી કરી હતી. તે બાદ ઓડિટ A અને B ટીમ દ્વારા કરવામાં આવ્યું હતું. તેમ છતાં પણ બંને ટીમની તપાસમાં આર્થિક ગેરરીતિ સામે આવી હતી. એપ્રિલ 2022માં હોમ ડિપાર્ટમેન્ટમાં રિપોર્ટ સબમિટ થયો હતો. જે બાદ કાર્યવાહીના ભાગ રૂપે મની લોન્ડરિંગ કેસમાં વિપુલ ચૌધરીની ધરપકડ કરવામાં આવી છે. સાથે જ પોલીસે એ પણ કહ્યું છે કે મામલામાં બોર્ડ ઓફ ડિરેક્ટરની સંડોવણી હશે તો તેમની પણ ધરપકડ કરાશે.
કેવી રીતે આચર્યું કૌભાંડ?
વિપુલ ચૌધરી 2005માં દૂધસાગર ડેરીમાં ચેરમેન હતા ત્યારે 2005 થી 2016 સુધીના સમયગાળા દરમ્યાન આર્થિક ગેરરીતિ આચરી હતી, મહેસાણા ACB દ્વારા અલગ-અલગ કલમ હેઠળ ગુનો નોંધવામાં આવ્યા છે. સરકારના નિયમનું ઉલ્લંઘન કરી વિપુલ ચૌધરીએ મિલ્ક કુલરની ખરીદી કરી હતી. ટેન્ડર પ્રક્રિયા વગર 485 કરોડનું બાંધકામ કરાવ્યું હતું. દૂધસાગર ડેરીના ચેરમેન પદેથી હટાવાયા હતા પણ કાનૂની લડાઈ લડવા તે દૂધ સાગર ડેરીના ચોપડે ખર્ચ કર્યો હતો. તેમજ બારદાનની ખરીદી કરી રૂ.13 લાખની ગેરરીતિ આચરી હતી. દૂધસાગર ડેરીના પ્રચાર માટે પણ કૌભાંડ કરી નાખ્યું હતું. અલગ અલગ 31 કંપનીઓનું રજિસ્ટ્રેશન કર્યું હતું અને ખોટી કંપનીઓ બનાવીને કરોડોનું ટ્રાન્જેક્શન કર્યું હતું.
અર્બુદા સેનાના કાર્યકરોનો વિરોધ
તો બીજી તરફ વિપુલ ચૌધરીની ધરપકડ પર મહેસાણામાં અર્બુદા સેનાના કાર્યકરો વિરોધ કરી રહ્યા છે. સમર્થકોએ ધરપકડનો વિરોધ નોંધાવી રહ્યા છે. ડેરીના પૂર્વ વાઇસ ચેરમેન મોઘજી દેસાઈએ કહ્યું છે કે સાગર દાણ કેસ પૂર્ણ થવાના આરે છે. કોઈ પુરાવા ન મળતા ખોટો કેસ ઉભો કરી દેવામાં આવ્યો છે. સાદા ડ્રેસમાં ધરપકડ કરવાનો શુ મતલબ છે?
મહેસાણા ACB પોલીસ મથકે ફરિયાદ બાદ વિપુલ ચૌધરી સાથે CAની કરી છે ધરપકડ
આ મામલે મહેસાણા ACB પોલીસ મથકે ફરિયાદ દાખલ કરવામાં આવી છે. ત્યારે આ ફરિયાદ બાદ વિપુલ ચૌધરી અને તેમના CAની ધરપકડ કરાઈ છે. જોકે વિપુલ ચૌધરીના પુત્રની પણ આ મામલે સંડોવણી ખુલી શકે તેવી શક્યતા છે.
