- IPL-2023 : જ્યાંથી શરૂઆત થઈ હતી ત્યાં જ અંત
- ક્વોલિફાયર-1માં ચેન્નઈ સામે થયેલા પરાજયનો બદલો લેવા હાર્દિક સેના તૈયાર
- અમદાવાદમા હાલ ક્રિકેટ ફીવર
IPL-2023નો ફાઇનલ મહામુકાબલો ચેન્નઈ સુપર કિંગ્સ અને ગુજરાત ટાઇટન્સ વચ્ચે અમદાવાદના નરેન્દ્ર મોદી સ્ટેડિયમમાં રમાવા જઈ રહી છે. દિલચસ્પ વાત એ છે કે IPL-2023ની શરૂઆત ગત 31 માર્ચે ચેન્નઈ સુપર કિંગ્સ અને ગુજરાત ટાઇટન્સ વચ્ચેની મેચથી જ થઈ હતી, હવે 73 મેચ બાદ IPLની 16મી સિઝનનો પણ અંત આ જ બંને ટીમના ટકરાયા બાદ આજે રમાનારી ફાઇનલથી થશે. આ ઉપરાંત બીજો પણ એક સંયોગ છે કે ગુજરાત અને ચેન્નઈએ લીગ સ્ટેજનો અંત પોઇન્ટ ટેબલમાં પ્રથમ અને બીજા સ્થાને રહીને કર્યો હતો. બંને ટીમ વચ્ચે IPL-2023ની પહેલી ક્વોલિફાયર મેચ પણ રમાઈ હતી, જેમાં ચેન્નઈ સુપર કિંગ્સે બાજી મારી લીધી હતી અને લીગ સ્ટેજમાં ટેબલ ટોપર હોવા છતાં ગુજરાત ટાઇટન્સે બીજી ક્વોલિફાયર-2માં રમવું પડ્યું હતું.
બંને વચ્ચેનો મુકાબલો 1-1 ની બરોબરી પર
આ સિઝનમાં સીએસકે અને ગુજરાતની ટીમ ત્રીજી વાર એકબીજા સામે ટકરાશે. હાલ બંને વચ્ચેનો મુકાબલો 1-1 ની બરોબરી પર છે. ચેન્નઈ સુપર કિંગ્સ IPLમાં 10મી વાર ફાઇનલ રમવા ઊતરશે. આ દરમિયાન ચેન્નઈ ચાર વાર ચેમ્પિયન બની ચૂકી છે, જ્યારે ગુજરાતની ટીમે વર્તમાન સિઝનમાં પણ શાનદાર પ્રદર્શન કર્યું છે. ક્વોલિફાયર-1માં CSK સામે થયેલા પરાજયનો બદલો લેવા હાર્દિક સેના આજે મેદાનમાં ઊતરશે. IPLની ઓપનિંગ મેચમાં પણ અમદાવાદીઓએ દુનિયાનું સૌથી મોટું નમો સ્ટેડિયમ છલકાવી દીધું હતું. હાલ અમદાવાદમાં ક્રિકેટ ફિવર છવાયેલો છે. ત્યારે આજે સ્ટેડિયમમાં માનવ મહેરામણ હિલોળે ચડશે.
ક્લોઝિંગ સેરેમનીમાં કિંગ, જોનિતા, રેપર ડીવાઇન, DJ ન્યૂક્લિયા મહેફિલ જમાવશે
IPL-2023નો ફાઇનલ મુકાબલો આજે નરેન્દ્ર મોદી સ્ટેડિયમમાં સાંજે 7:30 વાગ્યાથી શરૂ થશે. ફાઇનલ મુકાબલા પહેલાં ક્લોઝિંગ સેરેમનીનું આયોજન કરવામાં આવ્યું છે, જેમાં રેપર ડિવાઇન અને ફેમસ સિંગર જોનિતા ગાંધી પોતાના અવાજનો જાદુ વિખેરશે. IPLના સત્તાવાર ટ્વિટર હેન્ડલ પર આ અંગેની જાણકારી આપવામાં આવી છે. આ રંગારંગ કાર્યક્રમમાં રેપર ડિવાઇન અને જોનિતા ઉપરાંત રેપર કિંગ અને ડીજે ન્યૂક્લિયા પણ પરફોર્મ કરશે.
રેપર કિંગ અને ડીજે ન્યૂક્લિયા ક્લોઝિંગ સેરેમનીના કાર્યક્રમની શરૂઆત કરશે. રેપર કિંગ 'રોક્કો' નામથી પણ જાણીતો છે, જે એમટીવી-2019 હસન ટોપ-૫ ફાઇનલિસ્ટમાં સામેલ હતો. 24 વર્ષીય કિંગનો જન્મ 10 ઓક્ટોબર, 1998 ના રોજ થયો હતો. ન્યૂક્લિયાની વાત કરવામાં આવે તો તે મ્યુઝિક પ્રોડ્યુસર છે. જોનિતા બોલિવૂડમાં ઘણાં સુપર હિટ ગીત આપી ચૂકી છે. ડિવાઇન પણ રેપર અન સિંગર છે. ડિવાઇન અને જોનિતાનું પરફોર્મન્સ IPLના મિડ-શોમાં પણ જોવા મળશે. ક્લોઝિંગ સેરેમની સાંજે 6 વાગ્યાથી શરૂ થશે. ન્યૂક્લિયા 6:30 વાગ્યાથી દર્શકોનું મનોરંજન કરશે.
