BIG NEWS / સવાર-સવારમાં ભૂકંપથી ઉત્તરાખંડના બાગેશ્વરની ધરા ધ્રુજી ઉઠી, રિક્ટર સ્કેલ નોંધાઇ 2.5ની તીવ્રતા

• સોમવારની સવારે ઉત્તરાખંડના બાગેશ્વરમાં ભૂકંપના આંચકા 
• વહેલી સવારે 4.49 કલાકે આવ્યો ભૂકંપ 
• ભૂકંપની તીવ્રતા રિક્ટર સ્કેલ પર 2.5 હતી

સોમવારની સવારે ઉત્તરાખંડના બાગેશ્વરમાં ભૂકંપના આંચકા અનુભવાયા હોવાનું સામે આવ્યું છે. વિગતો મુજબ આ ભૂકંપ સવારે 4.49 કલાકે આવ્યો હતો. ભૂકંપની તીવ્રતા રિક્ટર સ્કેલ પર 2.5 હતી. આવી સ્થિતિમાં ભૂકંપના આંચકા ખૂબ જ ઓછી તીવ્રતાના હતા.

નોંધનીય છે કે, આ પહેલા 19 ફેબ્રુઆરીએ બપોરે 1 વાગ્યાની આસપાસ મધ્યપ્રદેશના ઈન્દોરમાં ભૂકંપના આંચકા અનુભવાયા હતા. ભૂકંપની તીવ્રતા 3.0 હતી. ભૂકંપનું કેન્દ્ર જમીનની અંદર 10 કિલોમીટર અંદર હતું. અરુણાચલના તવાંગમાં 19 ફેબ્રુઆરીની મધરાતે 12 વાગ્યે ભૂકંપના આંચકા અનુભવાયા હતા.

Eartquake Breaking | ઉત્તરાખંડના બાગેશ્વરમાં ભૂકંપના આંચકા, રિક્ટર સ્કેલ પર 2.5ની તીવ્રતા નોંધાઇ#earthquake #VtvGujarati #uttrakhand pic.twitter.com/caXEZRRLPK

— VTV Gujarati News and Beyond (@VtvGujarati) February 20, 2023

ગઈકાલે ગુજરાતમાં પણ અનુભવાયા હતા ભૂકંપના આંચકા 
ગુજરાતના સૌરાષ્ટ્ર-કચ્છમાં અવારનવાર ભૂકંપના આંચકા અનુભવાય છે, ત્યારે ગઈકાલે એટલે કે રવિવારે ફરી સૌરાષ્ટ્રની ધરા ધ્રુજી હતી.  ગઈકાલે સવારે 11.54 કલાકે અમરેલી જિલ્લાની ધરા ધ્રુજી ઉઠી હતી. અમરેલી પંથકમાં ભૂકંપનો આંચકો અનુભવાતા લોકો ઘરની બહાર દોડી આવ્યા હતા. આજે સવારે આવેલા ભૂકંપ આંચકો મિતિયાળાની સાથે ખાંભા ગીર પંથકમાં પણ અનુભવાયો હતો. ખાંભા ગીરના ભાડ, નાનુંડી, નાના વિસાવદર, વાંકિયા ગામમાં ભૂકંપનો આંચકો અનુભવાતા સ્થાનિકોમાં ફફડાટ ફેલાયો હતો. જોકે, ભૂકંપની તીવ્રતા વધુ ન હોવાથી કોઇ જાનહાની કે નુકસાન થવાની શક્યતા નથી.

તુર્કીયેમાં ગઈકાલે જ આવ્યો હતો ભૂકંપ 
તુર્કીયેની ધરતી ફરી એકવાર ભૂકંપના જોરદાર આંચકાથી ધ્રૂજી ઉઠી હતી. ભૂકંપની તીવ્રતા રિક્ટર સ્કેલ પર 5.2 માપવામાં આવી હતી. યુરોપિયન મેડિટેરેનિયન સિસ્મોલોજીકલ સેન્ટર (EMSC)ના જણાવ્યા મુજબ ભૂકંપનું કેન્દ્રબિન્દુ 10 કિલોમીટર (6.21 માઇલ)ની ઊંડાઈએ હતું. જોકે આ ભૂકંપના આંચકા પછી કોઈ જાન-માલના નુકસાનના સમાચાર નથી. તુર્કીયે અને સીરિયામાં 6 ફેબ્રુઆરીએ આવેલા ભૂકંપમાં મૃત્યુઆંક સતત વધી રહ્યો છે. બંને દેશોમાં અત્યાર સુધીમાં મૃત્યુઆંક 46 હજારને વટાવી ગયો છે.

ભારતમાં એવા સમયે ભૂકંપના આંચકા અનુભવાયા જ્યારે તુર્કીયે અને સીરિયામાં તબાહી ચાલી રહી છે. બંને દેશોમાં અત્યાર સુધીમાં 46000 લોકોના મોત થયા છે. કહેવામાં આવી રહ્યું છે કે, અત્યાર સુધીમાં 264,000 એપાર્ટમેન્ટ ધ્વસ્ત થઈ ચૂક્યા છે અને ઘણા લોકો હજુ પણ લાપતા છે. આવી સ્થિતિમાં મૃત્યુનો આ આંકડો વધુ વધવાની આશંકા છે.

તુર્કીયેના ડિઝાસ્ટર અને ઈમરજન્સી મેનેજમેન્ટ ઓથોરિટીના વડા યુનુસ સેઝરે જણાવ્યું કે, રવિવારે રાત્રે શોધ અને બચાવના પ્રયાસો મોટાભાગે પૂરા થઈ ગયા હતા. હવે લોકોને જીવતા શોધવાની શક્યતાઓ ઘણી ઓછી છે. ભૂકંપથી તુર્કીયેમાં મૃત્યુઆંક 40,402 છે, જ્યારે પડોશી સીરિયામાં 5,800 થી વધુ લોકો મૃત્યુ પામ્યા છે.