આર્થિક મદદ / પેટીયું રળી ખાતા મજૂરોને દર મહિને મળી જશે 3000 રુપિયા, ઉઠાવો સરકારની આ યોજનાનો લાભ

• મજૂરો માટે સરકારની એક યોજના ચાલી રહી છે
• મજૂરોએ કરાવવું પડે છે ઈ શ્રમ કાર્ડ રજિસ્ટ્રેશન
• 60 વર્ષ પૂર્ણ કર્યા બાદ સરકારે મજૂરોને દર મહિને આપશે 3000 રુપિયા

કેન્દ્ર અને રાજ્ય સરકાર દેશના અસંગઠિત ક્ષેત્રોમાં કામ કરતા શ્રમિકોના ઉત્કર્ષ માટે અનેક યોજનાઓ ચલાવી રહી છે. રજિસ્ટર્ડ કામદારોના બાળકોના શિક્ષણ, પુત્રીઓના લગ્ન અને સારવાર માટેની યોજનાઓ છે. અસંગઠિત ક્ષેત્રમાં કામ કરતા મજૂરો માટે રજિસ્ટ્રેશન બાદ સરકાર દ્વારા ઈ-લેબર કાર્ડ આપવામાં આવે છે. આ યોજના હેઠળ જે શ્રમિકો ઈ-શ્રમ કાર્ડ રજીસ્ટ્રેશન કરાવે છે તેમને સરકાર દ્વારા અનેક પ્રકારની સુવિધાઓ આપવામાં આવે છે. 16થી 59 વર્ષની વચ્ચે અસંગઠિત ક્ષેત્રમાં કામ કરતા કોઈપણ શ્રમિક ઈ-શ્રમ કાર્ડ માટે અરજી કરી શકે છે.

ઈ-શ્રમ પોર્ટલ પર નોંધણી જરુરી 
ઇ-શ્રમ કાર્ડ માટે નિયત લાયકાત ધરાવતા કામદારો અને મજૂરોએ ઈ-શ્રમ પોર્ટલ પર નોંધણી કરાવવાની રહેશે. ઈ-શ્રમ કાર્ડ બનાવવા માટે, તમે સત્તાવાર વેબસાઇટ eshram.gov.in પર જઈને નોંધણી કરાવી શકો છો. આ સિવાય તમે સીએસસી સેન્ટર પર જઈને પણ રજિસ્ટ્રેશન કરાવી શકો છો.

દર મહિને મળશે 3000 રુપિયાનું પેન્શન
ઈ-શ્રમ કાર્ડની નોંધણી માટે, કામદારોને કેટલાક જરૂરી દસ્તાવેજોની જરૂર પડશે. જેમ કે - અરજદારનું આધાર કાર્ડ, આધાર લિંક્ડ મોબાઇલ નંબર, બેંક એકાઉન્ટ નંબર વગેરે. આ દસ્તાવેજોના આધારે તમે ઈ-શ્રમ કાર્ડ માટે સરળતાથી રજિસ્ટ્રેશનની પ્રક્રિયા પૂરી કરી શકશો. કેન્દ્ર સરકારે અસંગઠિત ક્ષેત્રમાં કામદારો અને કામદારોના લાભ માટે એક પોર્ટલ પણ બનાવ્યું છે. આ યોજના હેઠળ રજિસ્ટર્ડ કામદારોને 60 વર્ષ પૂર્ણ થવા પર પેન્શન તરીકે દર મહિને 3000 રૂપિયાની આર્થિક સહાય આપવામાં આવશે. પોર્ટલ પર રજિસ્ટ્રેશન પર તમામ કામદારોને ઈ-શ્રમ કાર્ડ આપવામાં આવશે. જેના દ્વારા તેઓ આ યોજનાઓનો લાભ લઈ શકશે.  આ કાર્ડ 12 અંકોનું લેબર કાર્ડ છે. જે એક રીતે કામદારોની ઓળખનું કામ કરે છે.

ઈ-શ્રમ કાર્ડના ફાયદા

• ઇ-શ્રમ પોર્ટલ પર નોંધાયેલા કામદારોને 2 લાખ રૂપિયા સુધીના અકસ્માત વીમાની સુવિધા મળે છે.
• જો અકસ્માતમાં કામદારનું મોત થશે તો તેના પરિવારને 2 લાખ રૂપિયા આપવામાં આવશે.
• જો અકસ્માતમાં કામદાર આંશિક રીતે અપંગ હશે તો તેને માત્ર 1 લાખ રૂપિયાની આર્થિક સહાય આપવામાં આવશે.
• નોંધાયેલા કામદારોને યુએએન આપવામાં આવશે. જેથી તેમને સરકારી યોજનાનો લાભ મળી શકે.