સ્વાસ્થ્ય ટિપ્સ / શું તમારે પણ  જીવવું છે હેલ્ધી જીવન? તો આજથી જ ફૉલો કરો આયુર્વેદના આ સરળ ઉપાય

• સ્વસ્થ જીવન જીવવા આયુર્વેદ શું સલાહ આપે છે?
• આયુર્વેદના સરળ નિયમો અપનાવીને સ્વસ્થ જીવન જીવી શકીએ

આંખે અંજન કરવાના છે અનેક ફાયદા
આયુર્વેદમાં હંમેશાં દાંત પછી આંખનો વારો હોય છે. રોજ આંખમાં સુરમો આંજવાથી આંખ સ્વસ્થ, સુંદર થાય છે અને દૃષ્ટિ તેજ બને છે. નેત્રપ્રભા, દારૂહરિદ્રા અથવા મધ પણ આંજી શકાય. એનાથી પાંપણ મૃદુ થાય છે અને ઘેરી બને છે. આંખમાં રૂક્ષતા હોય તો ગાયનાં ઘી અથવા કોપરેલથી પાંપણ પર મસાજ કરી શકાય. આંખમાં બળતરા થતી હોય તો માત્ર ગુલાબજળનાં ટીપાંનો છંટકાવ કરવો.

આંખ, મોં, કાનના વિકારમાં નસ્ય ઉત્તમ ઉપાય
નાક માથાનું દ્વાર ગણાય છે. મગજ, આંખ, મોં અને કાનના વિકારમાં નસ્ય ઉત્તમ ગણાય છે. સીધા સૂઈ સહેજ હૂંફાળું અણુ તેલ અથવા ગાયનું ઘી પાંચ-પાંચ ટીપાં બંને નસકોરાંમાં નાખી પંદર મિનિટ એ જ રીતે સૂઈ રહેવું. એનાથી ચહેરાની ત્વચા સારી અને સ્વર મૃદુ થાય છે, બુદ્ધિ વધે છે, વાળ અકાળે સફેદ થતા તેમજ ખરતા અટકે છે અને મોઢા પર કરચલી ઓછી પડે છે. જો રોજ નસ્ય શક્ય ન હોય તો અઠવાડિયામાં બે વાર નિયમિત કરવું.

અનેક સમસ્યાનો એકમાત્ર ઉપાય ગંડુષ
ગંડુષનો મતલબ છે, પ્રવાહી મોઢામાં ભરી રાખવું પણ ગળવું નહીં. કફ થયો હોય તો નવશેકું પાણી ગલોફામાં પંદર મિનિટ ભરી રાખવું. વાયુ વધેલો હોય, પેઢાંમાંથી લોહી નીકળતું હોય અથવા તો રૂક્ષતા વધી ગઈ હોય તો ગલોફામાં તલનું તેલ ભરી રાખવું. દાંતની અન્ય તકલીફ હોય તો તલના તેલનો કોગળો મોંમાં ભરી રાખવો.

પાચનશક્તિ વધારશે નિયમિત વ્યાયામ
સવારે કંઈ પણ ખાધા વિના વ્યાયામ કરવાનું અગત્યનું ગણાય છે. એનાથી શરીરબળ અને પાચનશક્તિ વધે છે, પાચન સુધરે છે, શરીર હળવું બને છે અને સક્રિયતા વધે છે. શરીરબળ વધારવા માટે તાડાસન, સાઇક્લિંગ, ગોળાકાર પથ પર ચાલવું એ બેસ્ટ એક્સર્સાઇઝ ગણાય છે.   

ઉબટન અને સ્નાન પણ છે ખૂબ મહત્ત્વના
વ્યાયામ કરવાથી પરસેવો થાય છે અને ચામડીનાં છિદ્ર ખૂલે છે. વ્યાયામ પછી પરસેવો લૂછી ત્વચા પર ઉબટન લગાવવું.   આનાથી શુષ્કતા દૂર થઈ ત્વચા કાન્તિમય બનશે. એ પછી નાહવાથી એનર્જી મળે છે, થાક દૂર થાય છે તથા શરીરમાં રક્તનું ભ્રમણ સુધરે છે. નાહવા માટે હૂંફાળું પાણી વાપરવું, પરંતુ ગળાથી ઉપરના ભાગ માટે એટલે કે મોઢું અને માથાના વાળ માટે હંમેશાં ઠંડાં પાણીનો ઉપયોગ કરવો.