રાજકોટ / 'ધીરેન્દ્ર શાસ્ત્રી સનાતન ધર્મની વાતો કરે છે, અંધશ્રદ્ધા નથી ફેલાવતા', ભાજપ નેતા ભરત બોઘરાના કોંગ્રેસ પર પ્રહાર

• રાજકોટમાં ધીરેન્દ્ર શાસ્ત્રીનો યોજાશે દિવ્ય દરબાર
• ધીરેન્દ્ર શાસ્ત્રી અમારા માર્કેટિંગ એજન્ટ નથીઃ ભરત બોઘરા
• ડૉ.ભરત બોઘરાએ કોંગ્રેસના નેતાઓ પર કર્યા પ્રહાર 

 રાજકોટમાં ધીરેન્દ્ર શાસ્ત્રીનાં દિવ્ય દરબારને લઈને પ્રદેશ ભાજપ ઉપાધ્યક્ષ ર્ડા. ભરત બોઘરાનું નિવેદન સામે આવ્યું હતું. જેમાં ભરત બોઘરાએ જણાવ્યું હતું કે, ધીરેન્દ્ર શાસ્ત્રી સનાતન ધર્મની વાત કરે છે. ધીરેન્દ્ર શાસ્ત્રી અંધશ્રદ્ધા ફેલાવતા નથી. તેમજ વધુમાં ર્ડાં. ભરત બોઘરાએ કોંગ્રેસના નેતાઓ પર પ્રહાર કરતા કહ્યું હતું કે કોંગ્રેસ તો એવું પણ કહે છે કે ભગવાન શ્રી રામ પણ નથી.  ત્યારે ધીરેન્દ્ર શાસ્ત્રી અમારા માર્કેટિંગ એજન્ટ નથી.

ભાજપ પ્રદેશ પ્રમુખ સી.આર.પાટીલે કાર્યાલયની લીધી મુલાકાત
આગામી તા. 1  અને 2 જૂનનાં રોજ રેસકોર્ષ ગ્રાઉન્ડ ખાતે ધીરેન્દ્ર શાસ્ત્રીનો લોક દરબાર યોજાવાનો છે. જેને લઈને રાજકોટમાં ધીરેન્દ્ર શાસ્ત્રીનાં કાર્યક્રમ માટે કાર્યાલય શરૂ કરવામાં આવ્યું છે. ત્યારે આજે પ્રદેશ ભાજપ પ્રમુખ સી.આર. પાટીલ રાજકોટની મુલાકાતે છે. ત્યારે કાર્યક્રમની તૈયારીઓ અને આયોજકો સાથે રૂબરૂ મુલાકાત કરવા સી.આર. પાટીલ પહોંચ્યા હતા.

પ્રદેશ પ્રમુખ સી.આર.પાટીલે શુભેચ્છાઓ પાઠવી
આ બાબતે રાજકોટ બાગેશ્વરઘામ સમિતિનાં ચેરમેન યોગીન છનીયારાએ જણાવ્યું હતું કે, આજે ભાજપના પ્રદેશ પ્રમુખ સી.આર. પાટીલે બાગેશ્વરધામ સેવા સમિતિનાં રેસકોર્સ ખાતેનાં કાર્યાલય ખાતે શુભેચ્છા મુલાકાત લીધી હતી.  તેમજ તેઓએ અમને ખૂબ ખૂબ શુભેચ્છાઓ પાઠવી હતી. તેમજ સમગ્ર કાર્યક્રમનાં આયોજન માટે તેઓએ અમને અભિનંદન પાઠવ્યા હતા. ત્યારે સમગ્ર આયોજન બાબતે તેઓએ અમને તમામ મદદ કરવાની ખાત્રી આપી છે.