રાજકારણ / લઠ્ઠાકાંડ-મોરબી દુર્ઘટના, પેટ્રોલના ભાવ...: ચૂંટણી પહેલા કોંગ્રેસે સરકાર સામે રજૂ કરી 'ચાર્જશીટ'

 

• 20 મુદ્દાઓનું ભાજપ સામેનું આરોપનામું કોંગ્રેસે જનતા સમક્ષ મુક્યું 
• મોંઘવારી, બેરોજગારી, ભ્રષ્ટાચાર સહિત 20 મુદ્દાઓનું આરોપનામું
• ભાજપનું આરોપનામું પ્રજા સમક્ષ મુકતાં ભરતસિંહ સોંલકીનું નિવેદન

ગુજરાતમાં વિધાનસભાની ચૂંટણી જાહેર થતાંની સાથે જ દરેક રાજકીય પાર્ટીઓએ જોરશોરથી પ્રચાર શરૂ કરી દીધો છે. ચૂંટણી જીતવા માટે તમામ રાજકીય પાર્ટીઓ તનતોડ મહેનત કરી રહી છે. આમ આદમી પાર્ટીની એન્ટ્રીથી આ વખતે ગુજરાતમાં ત્રિપાંખિયો જંગ જામશે. એવામાં કોંગ્રેસ દ્વારા 20 મુદ્દાઓનું ભાજપ સામેનું આરોપનામું રજૂ કરવામાં આવ્યું છે. 

કોંગ્રેસ 36 પાનાનું આરોપનામું રજૂ કર્યું
કોંગ્રેસ દ્વારા સરકારની કામગીરી સામે સવાલ ઉઠાવતા કુલ 36 પાનાનું આરોપનામું તૈયાર કરવામાં આવ્યું છે. જેમાં મોંઘવારી, બેરોજગારી, ભ્રષ્ટાચાર સહિત 20 મુદ્દાઓનો સમાવેશ કરવામાં આવ્યો છે. મોરબીના ઝૂલતા પુલની દુર્ઘટનાનો આરોપનામામાં સમાવેશ કરવામાં આવ્યો છે. બોટાદના કથિત લઠ્ઠાકાંડનો પણ કોંગ્રેસે આરોપનામામાં સમાવેશ કર્યો છે.

ભાજપની નીતિ ગુમરાહ કરવાની છેઃ ભરતસિંહ સોલંકી
પ્રેસ કોન્ફરન્સ સંબોધતા ભરતસિંહ સોલંકીએ ભાજપ સામે આકરા પ્રહાર કર્યા છે. તેઓએ જણાવ્યું કે, ભાજપ સરકાર સામેનું તોહમતનામું અમે પ્રજા સમક્ષ મૂકીએ છીએ. કોંગ્રેસની સરકાર બનશે ત્યારે અમે પ્રજાની સુખાકારી માટે કામ કરીશું. ભાજપની નીતિ ગુમરાહ કરવાની અને લોકોને બીજી દિશામાં લઈ જવાની છે. તેઓએ જણાવ્યું કે, ભારતીય જનતા પાર્ટી ડબલ એન્જિનની વાતો કરે છે. ભાજપનું સિંગલ એન્જિન ફેઈલ ગયું છે. જેથી વિજય રૂપાણીની સરકાર બદલી નાખી અને બીજુ એન્જિન ભૂપેન્દ્ર પટેલનું લગાવ્યું.  

27 વર્ષમાં એક પણ નવી સરકારી શાળા ભાજપે નથી બનાવીઃ સોલંકી
તેઓએ જણાવ્યું કે, ગુજરાતમાં 27 વર્ષથી ભાજપનું શાસન છે એ પહેલા કોંગ્રેસનું શાસન હતું. કોંગ્રસના શાસનમાં તમામ સરકારી નવી શાળાઓ બની છે. ભાજપે એક પણ સરકારી શાળા બનાવી નથી. ઉલટાની ભાજપ સરકાર દ્વારા બંધ કરાવાઇ છે. સરકારી દવાખાનાઓ પણ કોંગ્રેસે બનાવ્યા છે. ભાજપે એક પણ સરકારી દવાખાના બનાવ્યા નથી. તમામ મેડિકલ કોલેજ પણ કોંગ્રેસ દ્વારા બનાવાઇ છે. ભાજપ દ્વારા બનાવાઇ નથી. જે ફી ભરવી પડે તે કામ ભાજપ દ્વારા કરવામાં આવ્યા છે. 27 વર્ષમાં ભાજપ ગુજરાતને અધોગતિ તરફ લઈ ગયા છે.

પ્રજા ટેવાઈ જાય તેવી રીતે ન્યુ નોર્મલ થિયરીનો ભાજપ ઉપયોગ કરેઃ ભરતસિંહ
તેઓએ જણાવ્યું કે, ભાજપ ન્યૂ નોર્મલ થિયરીની પદ્ધતિનો ઉપયોગ કરીને કામગીરી કરે છે. એકની એક વાત વારંવાર રજુ કરીને લોકોને છેતરવાનું કામ કરે છે. કોંગ્રેસના શાસનમાં પેટ્રોલનો ભાવ 65 રૂપિયા હતો જે વધીને 100 રૂપિયા થઈ ગયો છે. 

VIDEO: કૉગ્રેસે ભાજપ સરકાર સામે રજૂ કર્યું આરોપનામું

ભાજપ સરકાર ની નિષ્ફળતાઓને રજુ કરતું તહોમતનામાં અંગે વિશેષ પત્રકાર પરિષદ - AHMEDABAD https://t.co/59Dakfc5sS

— Gujarat Congress (@INCGujarat) November 6, 2022