ગાંધીનગર / રાજ્યની 9 રેન્જમાં ફેરફાર, જુઓ શું-શું ચેન્જીસ કરવામાં આવ્યા?

રાજ્યમાં સાયબર ક્રાઈમના ગુનાઓને ડામવા માટે તેમજ તેની તપાસ વધુ ઝડપી બને તેવા હેતુથી પોલીસ તંત્ર દ્વારા વહીવટીય ફેરફારો કરવામાં આવ્યા છે. જેમાં પોલીસ મહાનિરીક્ષક (વહીવટી) ગગનદીપ ગંભીર દ્વારા મહત્વનો હુકમ કરવામાં આવ્યો છે. વિવિધ રેન્જ હસ્તકના સાયબર ક્રાઈમ પોલીસ સ્ટેશનનું સુપરવિઝન હવે જે તે જિલ્લાના પોલીસ અધિક્ષકને સોંપવામાં આવ્યો છે. જેથી સાયબરના ગુનાઓની તપાસ વધુ અસરકારક બની શકે.

રાજ્ય સરકારના ગૃહ વિભાગે ગત 14 મે, 2025ના રોજ જાહેરનામું ક્રમાંક GG/74/PST/102020/ 307/C બહાર પાડીને મહત્વપૂર્ણ નિર્ણય લીધો હતો. ભારતીય નાગરિક સુરક્ષા સંહિતા, 2023ની કલમ 2ની પેટા-કલમ (1) ના ખંડ (u) હેઠળ મળેલી સત્તાનો ઉપયોગ કરીને રાજ્યપાલના આદેશથી ડેપ્યુટી સેક્રેટરી અનિતા ઝુલા દ્વારા આ સૂચનાઓ જારી કરવામાં આવી હતી. આ જાહેરનામા અનુસાર રાજ્યના નિર્દિષ્ટ જિલ્લાઓમાં પોલીસ અધિક્ષકોની કચેરીઓને તેમના કાર્યક્ષેત્ર માટે ‘સાયબર ક્રાઈમ પોલીસ સ્ટેશન’ તરીકે જાહેર કરવામાં આવી છે, જેથી વધતા સાયબર ગુનાઓને અસરકારક રીતે રોકી શકાય અને પીડિતોને ઝડપી ન્યાય અને સહાય મળી રહે. આ પગલાંથી સાયબર ગુનાઓ સામે કાયદો અમલવારી વધુ મજબૂત બનશે તેવી અપેક્ષા વ્યક્ત કરવામાં આવી રહી છે.

કયા રેન્જ અને કયા પોલીસ અધિક્ષકોને જવાબદારી મળી

• અમદાવાદ રેન્જ: પોલીસ અધિક્ષક, અમદાવાદ ગ્રામ્ય
• સુરત રેન્જ: પોલીસ અધિક્ષક, સુરત ગ્રામ્ય
• વડોદરા રેન્જ: પોલીસ અધિક્ષક, વડોદરા ગ્રામ્ય
• રાજકોટ રેન્જ: પોલીસ અધિક્ષક, રાજકોટ ગ્રામ્ય
• બોર્ડર રેન્જ: પોલીસ અધિક્ષક, કચ્છ-ભુજ (પશ્ચિમ)
• જુનાગઢ રેન્જ: પોલીસ અધિક્ષક, જુનાગઢ
• ભાવનગર રેન્જ: પોલીસ અધિક્ષક, ભાવનગર
• ગાંધીનગર રેન્જ: પોલીસ અધિક્ષક, ગાંધીનગર
• પંચમહાલ-ગોધરા રેન્જ: પોલીસ અધિક્ષક, પંચમહાલ-ગોધરા

આ પણ વાંચોઃ ગેસની અછત વચ્ચે ગુજરાતમાં કાળા બજારીનો પર્દાફાશ, 30 સિલિન્ડર જપ્ત

પોલીસ મહાનિરીક્ષક ગગનદીપ ગંભીરના હુકમમાં સ્પષ્ટ જણાવવામાં આવ્યું છે કે, સાયબર ક્રાઈમ પોલીસ સ્ટેશનના સુપરવિઝનની કામગીરી સંબંધિત જે તે જિલ્લાના પોલીસ અધિક્ષકોને સોંપવાની રહેશે. તેમજ આ બાબતની જાણ મુખ્ય કચેરીને કરવાની રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ