કાર્યવાહી / ગેસની અછત વચ્ચે ગુજરાતમાં કાળા બજારીનો પર્દાફાશ, 30 સિલિન્ડર જપ્ત

વડોદરા શહેરમાં ગેસ સિલિન્ડરની અછત વચ્ચે કાળાબજારી ચાલી રહી હોવાની શંકા વચ્ચે SOG પોલીસે મોટી કાર્યવાહી હાથ ધરી છે. હરણી એરપોર્ટ રોડ વિસ્તારમાં આવેલ એક રહેણાંક મકાનમાં દરોડો પાડી પોલીસે ગેસ સિલિન્ડરની કાળાબજારીનું કૌભાંડ બહાર પાડ્યું છે.

કોમર્શિયલ અને ઘરેલુ ગેસના 30 સિલિન્ડર જપ્ત કર્યા

મળતી માહિતી મુજબ, પોલીસે દરોડા દરમિયાન મકાનમાંથી ઘરેલુ તેમજ કોમર્શિયલ મળીને કુલ 30 ગેસ સિલિન્ડર જપ્ત કર્યા છે. તપાસમાં સામે આવ્યું છે કે શડુલ ભરવાડ નામનો શખ્સ પોતાના રહેણાંક મકાનમાંથી ગેરકાયદેસર રીતે ગેસ સિલિન્ડરની કાળાબજારી ચલાવી રહ્યો હતો.

પોલીસે આરોપીની પૂછપરછ શરૂ કરી

SOG ટીમે સ્થળ પરથી તમામ સિલિન્ડર કબ્જે કરીને આરોપી શડુલ ભરવાડની અટકાયત કરી છે. હાલ પોલીસે આ સમગ્ર મામલે વધુ પૂછપરછ શરૂ કરી છે અને ગેસ સિલિન્ડર ક્યાંથી લાવવામાં આવતા હતા તેમજ અન્ય કોઈ લોકો આ રેકેટ સાથે સંકળાયેલા છે કે નહીં તેની પણ તપાસ કરવામાં આવી રહી છે.

આ પણ વાંચોઃ રાજ્યમાં LPG ગેસ પુરવઠો સુનિશ્ચિત કરવા સરકાર સજ્જ, દરેક ઘરમાં સિલિન્ડર પહોંચાડવા કટિબદ્ધ

આગળ પણ કાર્યવાહી ચાલુ રહેશે

પોલીસના જણાવ્યા અનુસાર, શહેરમાં ગેસ સિલિન્ડરની અછતનો લાભ લઈ કેટલાક લોકો ગેરકાયદેસર રીતે સિલિન્ડર સંગ્રહ કરીને ઊંચા ભાવે વેચતા હોવાની આશંકા છે. આ મામલે આગળ પણ કાર્યવાહી ચાલુ રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ