નિવેદન / રાજ્યમાં 18 લાખ મતદારો ડુપ્લિકેટ ! કહ્યું, ચૂંટણી પંચ કોઈ પગલાં ન ભરે તો..:કોંગ્રેસના MLA સી. જે ચાવડાનો આરોપ

• મતદાર યાદી અંગે સી.જે.ચાવડાનું નિવેદન 
• ચૂંટણી કમિશનરને રજુઆત કરી છે-સી.જે.ચાવડા
• મતદાર યાદીમાં અનેક ભૂલ છે-સી.જે.ચાવડા

રાજ્યમાં મતદાર યાદી સુધારણા ઝૂંબેશ આવતીકાલથી શરૂ થઇ રહી છે. 21 અને 28 તથા 4 અને 11 સપ્ટેમ્બરે મતદાર યાદી સુધારણા ઝુંબેશ ચાલશે. આમ ચાર રવિવાર મતદાર યાદી સુધારણા ઝુંબેશ ચાલશે અને 10 ઑક્ટોબરે છેલ્લી મતદાર યાદી જાહેર કરાશે. જેને લઇને કોંગ્રેસના ધારાસભ્ય સી.જે ચાવડાએ મતદાર યાદીને લઇને કેટલાક આક્ષેપો કર્યા. 

મતદાર યાદીમાં અનેક ભૂલો- સી.જે ચાવડા

તેઓએ જણાવ્યું કે મતદારયાદીમાં અનેક ભૂલ છે . ચૂંટણી કમિશનરને રજૂઆત કરી છે. તેઓએ આરોપ લગાવતા જણાવ્યું કે મહેસાણામાં 11 હજાર મતદારો ડુપ્લીકેટ નોંધાયા છે.  ગાંધીનગર ઉત્તરમાં 8 થી 10 હજાર ડુપ્લીકેટ મતદારો છે. એક જ સોસાયટી એક જ ઘરમાં ડુપ્લીકેટ મતદારો સામે આવ્યા છે.  Blo કામગીરી કરતા નથી તેમની સામે કાર્યવાહી થવી જોઈએ તેમ સી.જે.ચાવડાએ જણાવ્યું હતું.

ચૂંટણી પંચ પગલા ભરે નહી તો..- સી.જે ચાવડા 

વધુમાં જણાવ્યું કે ડુપ્લીકેટ મતદારો હયાત છે મરણ પામેલા નથી. 2017માં 1000 કરતા ઓછા મતથી કોંગ્રેસ 20 બેઠક હારી હતી. રાજ્યમાં 18 લાખ મતદારો ડૂપ્લીકેટ છે. ચૂંટણી પંચ કોઈ પગલાં ન ભરે તો હાઇકોર્ટનો સહારો લઈશું તેમ સી.જે.ચાવડાએ જણાવ્યું હતું. 

આ વર્ષે 11 લાખ નવા મતદારો

ઉલ્લેખનીય છે કે  રાજ્યમાં નવા 11 લાખ 15 હજાર 312 મતદારો નોંધાયા.  18 થી 19 વર્ષની ઉંમરના કુલ 6 લાખ 51 હજાર 75 મતદારો નોંધાયા છે જ્યારે 20 થી 29 વર્ષની વય જૂથના 6 લાખ 52 હજાર 274 મતદારો નોંધાયા.  મતદાર યાદીમાં પુરુષ મતદારો કુલ 2 કરોડ 50 લાખ 86 હજાર 28 જ્યારે રાજ્યમાં મહિલા મતદાર કુલ 2 કરોડ 33 લાખ 85 હજાર 448 નોંધાયા.  રાજ્યમાં ત્રીજી જાતિના કુલ 1288 મતદારો નોંધાયા છે આમ  રાજ્યમાં કુલ 4 કરોડ 84 લાખ 72 હજાર 764 મતદારો થયા.