નિર્ણય / ઘીના સેમ્પલ ફેલ થયા બાદ અંબાજીમાં પ્રસાદને લઈને મોટા સમાચાર, જાણો હવે કોણ બનાવશે મોહનથાળ

• અંબાજી મંદિરની ટીમ દ્વારા જ મોહનથાળ બનાવવાનું કામ શરૂ 
• મોહનથાળના પ્રસાદ મુદ્દે કલેકટરનું નિવેદન 
• હાલમાં કોઈ એજન્સીને કામ નથી સોંપાયું: કલેક્ટર 

 અંબાજી મંદિરમાં બનાવવામાં આવતા મહાપ્રસાદમાં ઉપયોગ કરવામાં આવતા ઘી નાં સેમ્પલ ફેલ થતા સૌ કોઈમાં ચર્ચાનો વિષય બનવા પામ્યો છે. ઘી નાં સેમ્પલ ફેલ થતા એજન્સી દ્વારા જ્યાંથી ઘી ખરીદવામાં આવ્યું હતું. તે અમદાવાદની પેઢી પર ફ્રુડ વિભાગ તેમજ એએમસીની સંયુક્ત ટીમો દ્વારા તપાસ હાથ ધરવામાં આવી હતી. જે બાદ દુકાનને સીલ કરી દેવામાં આવી છે. તો બીજી તરફ નીલકંઠ ટ્રેડર્સનાં માલિક જતીન શાહ ભૂગર્ભમાં ઉતરી ગયા છે. 

ત્યારે અંબાજી મંદિર મોહનથાળનાં પ્રસાદ મામલે વહીવટદાર સિદ્ધિ વર્માએ નિવેદન આપ્યું છે કે, મોહિની કેટરર્સનું ટેન્ડર અંબાજી મંદિરે રિન્યુ કર્યું ન હતું. પ્રસાદ બનાવવાનું ટેન્ડર 30 સપ્ટેમ્બરે પુરુ થયું હતું.   ત્યારે હવે આ જ એજન્સી મંદિરનો પ્રસાદ બનાવશે કે અન્ય એજન્સીને ટેન્ડર અપાશે તેનો નિર્ણય આગમી સમયમાં લેવામાં આવશે. તેમજ આગામી સમયમાં  ઉચ્ચ અધિકારીઓની મિટિંગ બાદ નિર્ણય લેવાશે.  

AMC અને ગાંધીનગરની સયુંકત ટીમ દ્વારા કાર્યવાહી
અંબાજી મંદિરને નકલી ઘી આપનાર નીલકંઠ ટ્રેડર્સ સામે કાર્યવાહી હાથ ધરવામાં આવી છે. જેમાં એએમસી અને ગાંધીનગરની સંયુક્ત ટીમ દ્વારા કાર્યવાહી હાથ ધરવામાં આવી હતી. જેમાં દુકાનને સીલ કરીને બહાર નોટીસ પણ લગાવાઈ હતી. અમદાવાદનાં માધુપુરામાં નીલકંઠ ટ્રેડર્સે નકલી ઘી મંદિરને પધરાવ્યું હતું. હાલ નીલકંઠ ટ્રેડર્સનાં માલિક જતીન શાહ ગાયબ થઈ ગયા છે. તેમજ ઘી નો જથ્થો ક્યાંથી લાવ્યા, કેટલા પ્રમાણમાં લાવ્યા તેની હાલ તપાસ ચાલી રહી છે.

 મોહનથાળના પ્રસાદ મુદ્દે કલેકટરનું નિવેદન 
અંબાજી મંદિરનાં પ્રસાદ માટેનાં ઘી નાં સેમ્પલ ફેલ થયા બાદ મહત્વનો નિર્ણય કરવામાં આવ્યો છે.  જેમાં અંબાજી મંદિરની ટીમ દ્વારા જ મોહનથાળ બનાવવાનું કામ શરૂ કરાશે. મોહિની કેટરર્સને પ્રસાદ ઘરથી દૂર રહેવા આદેશ કરવામાં આવ્યો છે. તેમજ આ બાબતે કલેક્ટરે વધુમાં જણાવ્યું હતું કે, હાલમાં કોઈ એજન્સીના કામ સોંપાયું નથી. મેળા દરમિયાન ભક્તોને શુદ્ધ ઘી નો પારસાદ અપાયો છે. જે ઘી નાં સેમ્પલ લેવાયા હતા. તે ઘી પ્રસાદમાં વપરાયું નથી. બનાસ ડેરીનાં ઘી દ્વારા બનાવેલો પ્રસાદ ભક્તોને અપાયો હતો.