નિવેદન / સરકાર બન્યા બાદ DK શિવકુમારને મોટો ઝટકો: મંત્રીએ કહ્યું, કોઈ અઢી-અઢી વર્ષની ફોર્મ્યુલા નથી

• કર્ણાટકમાં CM તરીકે સિદ્ધારમૈયાના શપથગ્રહણ બાદ મોટા સમાચાર
• કોંગ્રેસના નેતાએ કહ્યું સત્તાની વહેંચણીની ફોર્મ્યુલા નક્કી થઈ નથી 
• પહેલા સિદ્ધારમૈયા અને શિવકુમાર વચ્ચે અઢી વર્ષની ફોર્મ્યુલાના હતા સમાચાર 

કર્ણાટકમાં મુખ્યમંત્રી તરીકે સિદ્ધારમૈયાએ શપથગ્રહણ કર્યા બાદ હવે એક મોટા સમાચાર સામે આવી રહ્યા છે. વાત જાણે એમ છે કે, કર્ણાટકમાં ખૂબ મંથન કર્યા પછી કોંગ્રેસ હાઈકમાન્ડે સિદ્ધારમૈયાને રાજ્યના આગામી મુખ્ય પ્રધાન બનાવવાનો નિર્ણય લીધો હતો. જોકે એવા સમાચાર હતા કે, CM પદ માટે સિદ્ધારમૈયા અને તેમના ડેપ્યુટી CM ડીકે શિવકુમાર વચ્ચે અઢી વર્ષની ફોર્મ્યુલા નક્કી થઈ ગઈ છે. પરંતુ હવે રાજ્યના કેબિનેટ મંત્રી તરીકે શપથ લેનારા કોંગ્રેસના નેતા એમબી પાટીલે દાવો કર્યો છે કે, બંને વચ્ચે સત્તાની વહેંચણીની ફોર્મ્યુલા નક્કી થઈ નથી.

કોંગ્રેસના નેતા એમબી પાટીલે શું કહ્યું ? 
કર્ણાટક કોંગ્રેસના નેતા એમબી પાટીલે કહ્યું કે, જો તેમની વચ્ચે સત્તા વહેંચણીની ફોર્મ્યુલા હોત તો હાઈકમાન્ડે જાહેરાત કરી હોત. સિદ્ધારમૈયા પાંચ વર્ષ સુધી મુખ્યમંત્રી રહેશે. હકીકતમાં ભૂતકાળમાં કર્ણાટકના આગામી મુખ્યમંત્રીના નામ પર નિર્ણય લેવા માટે ચર્ચાઓ અને બેઠકો ચાલી રહી હતી. એવા અહેવાલ હતા કે, રાજ્ય કોંગ્રેસના વડા ડીકે શિવકુમાર વરિષ્ઠ નેતા સિદ્ધારમૈયા સાથે સત્તાની વહેંચણી માટે સંમત થયા હતા. 

પહેલા CM પદ વહેંચવાના સમાચાર અને હવે....
કોંગ્રેસના કેટલાક સૂત્રોએ દાવો કર્યો હતો કે, મુખ્યમંત્રી પદ સિદ્ધારમૈયા અને શિવકુમાર વચ્ચે વહેંચવામાં આવશે. સૂત્રોએ એવો પણ દાવો કર્યો હતો કે, ડીકે શિવકુમારે અગાઉ તેમને કાર્યકાળ આપવાની માગણી કરી હતી. જોકે બાદમાં જ્યારે શિવકુમારને તેના વિશે પૂછવામાં આવ્યું ત્યારે તેમણે કહ્યું કે "હવે ધ્યાન માત્ર શાસન, લોકો અને દેશ પર છે". 

કર્ણાટકમાં કોંગ્રેસ સરકાર 
કર્ણાટકમાં CM પદની રેસમાં સિદ્ધારમૈયા અને ડીકે શિવકુમાર હતા. બંને નેતાઓએ 20 મેના રોજ અન્ય મંત્રીઓ સાથે શપથ લીધા હતા. આ દરમિયાન રાજ્યમાં ઘણી વિપક્ષી એકતા જોવા મળી હતી. કોંગ્રેસે 10 મેના રોજ કર્ણાટક વિધાનસભા ચૂંટણીમાં 224 બેઠકોમાંથી 135 બેઠકો પૂર્ણ બહુમતી સાથે જીતી હતી.