મધ્યપ્રદેશ / ભોજશાળા સરસ્વતી મંદિર હતું, પછી મસ્જિદમાં બદલવામાં આવ્યું- પૂર્વ ASI અધિકારીનો ધડાકો

Bhojshala Latest News : મધ્યપ્રદેશના ધાર જિલ્લામાં ભોજશાળાને લઈ ફરી અપડેટ સામે આવી છે. વાત જાણે એમ છે કે, જાણીતા પુરાતત્વવિદ્ કેકે મુહમ્મદે રવિવારે દાવો કર્યો હતો કે, મધ્યપ્રદેશના ધાર જિલ્લામાં વિવાદાસ્પદ ભોજશાળા/કમાલ મૌલા મસ્જિદ સંકુલ સરસ્વતી મંદિર હતું અને બાદમાં તેને ઇસ્લામિક પૂજા સ્થળમાં ફેરવી દેવામાં આવ્યું હતું. તેમણે એમ પણ કહ્યું કે, હિંદુઓ અને મુસ્લિમોએ કોર્ટના નિર્ણયનું પાલન કરવું જોઈએ અને આવા સ્થાનો પર મતભેદોને ઉકેલવા માટે વાતચીતની સાથે સાથે પૂજા સ્થળ અધિનિયમ, 1991નું સન્માન કરવું જોઈએ. મુહમ્મદે કહ્યું કે, મુસ્લિમોએ પણ મથુરા અને કાશીને લઈને હિંદુઓની ભાવનાઓનું સન્માન કરવું જોઈએ.

મધ્યપ્રદેશ હાઈકોર્ટના નિર્દેશોને પગલે ભારતીય પુરાતત્વ સર્વેક્ષણ (ASI) રાજ્યના આદિવાસી બહુલ જિલ્લામાં વિવાદિત ભોજશાળા સંકુલનું સર્વે કરી રહ્યું છે. હિન્દુઓ માને છે કે તે દેવી વાગદેવી (સરસ્વતી)નું મંદિર છે જ્યારે મુસ્લિમ સમુદાય તેને કમલ મૌલા મસ્જિદ કહે છે. 

ભૂતપૂર્વ ASI અધિકારી મુહમ્મદે કહ્યું, ધાર (ભોજશાળા) વિશે ઐતિહાસિક હકીકત એ છે કે, તે સરસ્વતી મંદિર હતું. તેને ઈસ્લામિક મસ્જિદમાં પરિવર્તિત કરવામાં આવી હતી. પરંતુ પ્લેસ ઓફ વર્શીપ એક્ટ 1991 મુજબ, ધાર્મિક સ્થળના દરજ્જા માટેનું આધાર વર્ષ 1947 છે. જો તે 1947 માં મંદિર હતું તો તે મંદિર છે અને જો તે મસ્જિદ હતું તો તે મસ્જિદ છે.

વધુ વાંચો: મહાકાલ મંદિરમાં ભષ્મ આરતી વખતે આગ ફાટી નીકળી, મચી અફરાતફરી, 5 લોકો દાઝ્યાં

1976-77માં અયોધ્યામાં મુહમ્મદ પ્રોફેસર બી.બી.લાલની આગેવાની હેઠળની પ્રથમ ખોદકામ ટીમનો ભાગ હતો. પદ્મશ્રી પુરસ્કાર વિજેતાએ અગાઉ દાવો કર્યો હતો કે, તેમણે બાબરી ઢાંચાની નીચે રામ મંદિરના અવશેષો પહેલીવાર જોયા હતા. તેમણે કહ્યું કે, બંને પક્ષોએ એક્ટનું સન્માન કરવું જોઈએ અને હાઈકોર્ટ તમામ હકીકતોને ધ્યાનમાં રાખીને નિર્ણય લેશે. 11મી માર્ચે હાઈકોર્ટે ASIને 6 સપ્તાહની અંદર ભોજશાળા સંકુલનો 'વૈજ્ઞાનિક સર્વેક્ષણ' કરવાનો આદેશ આપ્યો હતો. રવિવારે સર્વેનો ત્રીજો દિવસ હતો.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો