હાલાકી / રસ્તો છે કે નદી? સૌરાષ્ટ્રમાં મેઘો ધોધમાર વરસતા ભાવનગર-સોમનાથ નેશનલ હાઈવે બંધ

• ભાવનગર-સોમનાથ નેશનલ હાઈ-વે ફરી બંધ
• સોમેત નદીનું પાણી રોડ ઉપર ફરી વળ્યું
• પેઢાવાડા ગામ પાસે રોડ ઉપર વહેતા પાણી જોવા મળ્યા

ગુજરાતમાં છેલ્લા બે દિવસથી ધુઆંધાર વરસાદ થતા નદી-તળાવોમાં નવા નીર આવ્યા છે. ધોધમાર વરસાદને કારણે ચેકડેમ ઓવરફ્લ થયા છે તો કયાંક ખેતરોમાં પાણી ભરાયા છે. રાજ્યના એવા ઘણા ગામો છે જે સંપર્ક વિહોણા બન્યા છે. વીજ પુરવઠો ખોરવાઇ ગયો છે. એવા ઘણા ગામો છે હજી પણ બેટમાં જ જોવા મળ્યા છે. ત્યારે સૌરાષ્ટ્રમાં મેઘો મહેરબાન થતા ભાવનગર- સોમનાથ નેશનલ હાઇવે બંધ થયો છે.

ભાવનગર-સોમનાથ નેશનલ હાઈવે પાણી પાણી 

જો તમે ભાવનગર- સોમનાથ તરફ જવાનો પ્લાન બનાવી રહ્યો હોવ તો હમણા માંડી વાળજો, કારણ કે ધોધમાર વરસાદને કારણે  ભાવનગર- સોમનાથ હાઇવે ફરી એકવાર બંધ થયો છે. સોમત નદીનું પાણી રોડ પર ફરી વળતા વાહનચાલકો અટવાયા છે. જાણે હાઇવે પર જ નદીઓ વહેતી હોય તેવા દ્રશ્યો જોવા મળ્યા હતા.  વીટીવી ન્યૂઝ પાસે આવેલા દ્રશ્યોમાં જોઇ શકાય છે કે માલવાહક વાહન હાઇવે પર ફસાઇ ગયુ છે. ચોમેર નજર કરો ત્યાં માત્રને માત્ર પાણી પાણી જ જોવા મળી રહ્યું છે.  હાઇવેનું નામોનિશાન ક્યાંક દેખાઇ નથી રહ્યું .

સોમત નદીના પાણી ફરી વળ્યા 

મહત્વનું છે કે કોડીનાર વેરાવળ પંથકમાં ભારે વરસાદને કારણે સોમત નદી બે કાંઠે વહેવા લાગી છે. પરિણામે વેરાવળ કોડિનાર નેશનલ હાઇવે મોરડીયા પેઢાવાડા ગામ પાસે રોડ પર પાણી વહેતા જોવા મળ્યા હતા. પેઢાવડાથી પસાર થતી સોમત નદીમાં ભારે પાણી આવતાલ ફરી એકવાર ભાવનગર- સોમનાથ હાઇવેને બંધ કરવાની ફરજ પડી છે. સોમત નદીમાં પૂર આવતા બંને સાઈડ વાહન વ્યવહાર ખોરવાયો હતો.મહત્વનું છે કે અગાઉ પણ કોડીનાર વેરાવળ પંથકમાં ભારે વરસાદને કારણે હાઇવે બંધ કરવાની ફરજ પડી હતી. 

13થી 17 જુલાઇ અતિભારે વરસાદની આગાહી 

રાજ્યમાં 13 થી 17 જુલાઇ સુધી ભારેથી અતિભારે વરસાદની આગાહી કરવામાં આવી છે. તેમાં પણ ખાસ કરીને આગામી 2 દિવસ સૌરાષ્ટ્ર અને કચ્છમાં વધુ વરસાદની પડ્યો છે.અમદાવાદમાં પણ આગામી 48 કલાક સુધી ભારે વરસાદની શક્યતા છે. દ્વારકા, દાહોદ, પંચમહાલ, સાબરકાંઠા, બનાસકાંઠા, ગાંધીનગરમાં ભારે વરસાદની આગાહી કરવામાં આવી છે. રાહતની વાત એ છે કે ગુજરાતમાં ચાલુ સિઝનનો 65 ટકા વરસાદ નોંધાઈ ચૂક્યો છે. જેમાં સૌરાષ્ટ્રમાં 94 ટકા 12 જુલાઇ સુધી પડી ગયો છે. આ સિવાય મહેસાણા, ગાંધીનગર, દાહોદમાં પણ સારા વરસાદના વરતારા છે.