અદભુત / બદ્રીનાથ ધામના કપાટ ખૂલ્યા બાદ થયો ચમત્કાર, તીર્થ પુરોહિતે કહ્યું દેશ માટે શુભસંકેત, જુઓ કેવી રીતે પરચા પૂર્યા

• બદ્રીનાથના જયઘોષ સાથે કપાટ ખુલ્યા.
• કપાટ ખોલ્યા પછી ચમત્કાર સર્જાયો.
• દેશમાં ખુશી જળવાઈ રહેશે.

ગુરુવારે બરફવર્ષા અને પુષ્પવર્ષાની સાથે સવારે 07:10ની સાથે બદ્રીનાથ ધામના કપાટ ખોલી દેવામાં આવ્યા છે. વૈદિક મંત્રોચ્ચાર અને જય બદ્રીનાથના જયઘોષ સાથે કપાટ ખોલ્યા પછી ચમત્કાર સર્જાયો છે. તીર્થ પુરોહિત આ બાબતને શુભ સંકેત ગણાવી રહ્યા છે. 

કપાટ ખુલ્યા પછી પણ ભગવાન બદ્રીનાથને ઓઢાડવામાં આવેલ ઘૃત ધાબળા (ઘીમાં પલાળેલ ઊનનો ધાબળો) પર તાજુ ઘી મળ્યું છે. બદ્રીનાથના ધર્મ અધિકારી રાધાકૃષ્ણ થપલિયાલે જણાવ્યું કે, ઘૃત ધાબળા પર તાજુ ઘી હોય તો તેનાથી દેશમાં ખુશી જળવાઈ રહેશે. ગયા વર્ષે પણ ધાબળા પર તાજુ ઘી હતું. બહાર ખૂબ જ ઠંડી હોવા છતાં પણ ઘી સુકાય નહીં તો તેને ચમત્કાર ગણવામાં આવે છે.

ધાર્મિક પરંપરા અનુસાર કપાટ બંધ થાય તો ભગવાન બદ્રીનાથને ઘૃત ધાબળો ઓઢાડવામાં આવે છે. આ ધાબળો વિશેષરૂપે માણા ગામની મહિલાઓ દ્વારા તૈયાર કરવામાં આવે છે. કન્યાઓ તથા સુહાગણ એક જ દિવસમાં આ ધાબળો તૈયાર કરે છે. 

જે દિવસે આ ઘૃત ધાબળો બનાવવામાં આવે છે, ત્યારે કન્યા અને મહિલાઓ ઉપવાસ કરે છે. શીતકાળ પછી કપાટ ખુલે ત્યારે આ ધાબળો હટાવી દેવામાં આવે છે. 

ધાબળા પરનું ઘી વધુ ના સુકાય તો દેશમાં ખુશી રહે છે. ધાબળા પરનું ઘી સુકાઈ ગયું હોય તો દેશમાં અતિવૃષ્ટી અને અનાવૃષ્ટીની સંભાવના રહે છે. 

કપાટ ખુલ્યા પછી બપોરે 11 વાગ્યે બદ્રીનાથ ધામમાં મહાભિષેકની પૂજા શરૂ થઈ હતી. પહેલી પૂજા પ્રધાનમંત્રીના નામથી થઈ હતી અને બીજી પૂજા મુખ્યમંત્રી પુષ્કરસિંહ ધામીના નામથી શરૂ થઈ હતી. ત્યારપથી વિધિવત રીતે પૂજા પૂર્ણ થઈ હતી. સવારે સાડા દસ વાગ્યા સુધી તીર્થયાત્રીઓએ બદ્રીનાથના નિર્વાણ સ્વરૂપના દર્શન કર્યા હતા. ત્રણ વાગ્યે બદ્રીનાથને ભોગ લગાવવામાં આવ્યો હતો.