આણંદ / તોડકાંડમાં આડખીલી બનેલા કલેક્ટરનો કાંટો કાઢવા રચાયો કામલીલાનો કારસો, સ્પાય કેમેરાની તપાસમાં લાંચકાંડના 4 આરોપીઓ નગ્ન

• આણંદના પૂર્વ કલેક્ટર ડી. એસ. ગઢવીને ફસાવવા મુદ્દે ખુલાસો 
• તોડકાંડમાં આડખીલી બનેલા કલેક્ટર સામે ષડયંત્ર 
• કેતકી વ્યાસની લાંચ લેવાની ભૂખ કલેક્ટરને પડી ભારે

Anand News: આણંદના તત્કાલિન કલેક્ટર ડી.એસ ગઢવીની ઓફિસમાં સ્પાય કેમેરો મુકવાને લઇને 3 લોકોની ધરપકડ કરાઇ છે. જો કે, પોલીસ તપાસમાં સ્પાય કેમેરા કાંડ અને મહિલાના વીડિયોને  લઇને ચોંકાવનારી માહિતી સામે આવી છે. કલેક્ટર કચેરીમાં જમીનોના દસ્તાવેજોની અરજીમાં મોટી કટકી લેવાના કેતકી વ્યાસના ઇરાદા પર કલેક્ટર ડી.એસ. ગઢવીએ પાણી ફેરવી દેતાં 3 લોકોએ તેમને ફસાવવા સમગ્ર પ્લાન ઘડ્યો હોવાનો સનસનીખેજ ખુલાસો થયો છે.

સ્પાય કેમેરા કાંડ પાછળ લાંચકાંડ!
સમગ્ર વિવાદ ત્યારે શરૂ થયો જ્યારે સરકારે જંત્રીના ભાવ ડબલ કરવાનો નિર્ણય લીધો હતો. આ નિર્ણય લાગુ કરવા પહેલા જુની જંત્રીએ 2 મહિના સુધી જમીનની અરજીઓ ક્લિયર કરવા માટે સમય પણ આપ્યો હતો. આ સમય દરમ્યાન જમીન ખાતાના ચીટનીશ જે.ડી પટેલ જુની જંત્રીની તમામ ફાઇલો ક્લિયર ન કરી દબાવી રાખી અરજદારોને ફાઇલ ક્લિયર કરવા માટે મોટી રકમ માગી હતી. જો કે કલેક્ટર ડી.એસ. ગઢવીને ચીટનિશ જે.ડી. પટેલના ઇરાદાઓની ગંધ આવી જતાં તેમણે અરજદારોની ફાઇલો ક્લિયર કરવા સૂચના આપી હતી. 

કલેક્ટરને ફસાવવા લગાવાયા સ્પાય કેમેરા
જુની જંત્રી બાદ નવી જંત્રી ડબલ થઇ જતાં ડબલ પ્રિમિયમ ચૂકવવા ન માગતા અરજદારો ફાઇલો 90 દિવસમાં ક્લિયર કરાવવા માટે મોં માગી રકમ આપવા તૈયાર થઇ જતા હતા. જો કે ફાઇલો અટકાવી લાંચ લેતી લાંચિયા ટોળકી કલેક્ટર ગઢવીની સૂચના બાદ લાંચ  વસૂલી શકે તેવી સ્થિતીમાં ન હતી. કલેક્ટર ડી.એસ. ગઢવીના કારણે સંખ્યાબંધ અરજદારો પાસેથી મોટી લાંચ હાથમાંથી જતી જોઇ કેતકી વ્યાસ અને જેડી પટેલે કલેક્ટર ડી.એસ ગઢવીને ફસાવવાનો પ્લાન બનાવ્યો હતો. આ પ્લાન મુજબ કેતકી વ્યાસ ચિટનીશ જે.ડી. પટેલ અને ગૌતમ ચૌધરીએ સ્પાય કેમેરા મુક્યા હતા. ઓપરેશન પાર પાડ્યા બાદ સ્પાય કેમેરાને જે.ડી.પટેલે સળગાવી દીધો હતો. જે.ડી.પટેલને રહેમરાહે મહેસૂલ વિભાગમાં નોકરી મળી હતી તેમજ વહીવટની આવક વિદેશમાં રોકતો હોવાની ચર્ચા છે.

કલેક્ટર ગઢવીને ફસાવવા ટોળકીનું કારસ્તાન
સૂત્રો દ્વારા એમ પણ ચર્ચાઇ રહ્યું છે કે કલેક્ટર ડી.એસ ગઢવીને ફસાવવા માટે અગાઉ કેતકી વ્યાસ અને લાંચીયા ટોળકીએ અગાઉ 2 મહિલાને કલેક્ટર પાસે મોકલી હતી. બીજી બાજુ સમગ્ર કાંડમાં ગૌતમ ચૌધરીની પણ ભૂમિકા સામે આવી છે, સમગ્ર કાંડના ફૂટેજની પેનડ્રાઇવ કેતકી વ્યાસના PA ગૌતમ ચૌધરીએ જ વિવિધ જગ્યાએ મોકલી વાયરલ કરી હતી. સમગ્ર મામલે પોલીસે કેતકી વ્યાસ, જે.ડી.પટેલ અને હરીશ ચાવડા વિરુદ્ધ નોંધ્યો ગુનો છે. એક નેતાના આશિર્વાદથી ચિટનીશ તરીકે કામ કરતાં જે.ડી. પટેલ વિદ્યાનગરમાં આલિશાન મકાન ધરાવે છે. ત્યારે અરજદારો પાસેથી મસમોટી લાંચ લેવા માટે કલેક્ટરને સ્પાય કેમેરા કાંડમાં ફસાવનારા ત્રણેય લોકોની સંપત્તિની તપાસ થાય તેવી માગ ઉઠી રહી છે.