સમાચાર સુપરફાસ્ટ / ચોમાસાને લઈને અંબાલાલ પટેલે કરી મોટી આગાહી, વિદેશ મંત્રીએ પાસપોર્ટ કેન્દ્રને લઈને મહત્વની વાત કરી શેર

ઉત્તર ગુજરાત, મધ્ય ગુજરાત તેમજ પૂર્વ તેમજ દક્ષિણ ગુજરાતમાં વરસાદની આગાહી કરવામાં આવી છે. તેમજ ઉદયપુર તેમજ રાજસ્થાનમાં વરસાદ તથા સાબરકાંઠામાં વરસાદ થતા સાબરમતી નદીમાં નવા નીર આવશે. ત્યારે રાજસ્થાન અને મધ્ય પ્રદેશમાં ભારેથી અતિભારે વરસાદનાં કારણે મધ્ય પ્રદેશમાં પુર આવી શકે છે. તેમજ નર્મદા નદીનાં વિસ્તારમાં વરસાદનાં કારણે નર્મદા બે કાંઠે થઈ શકે છે. જ્યારે દક્ષિણ ગુજરાતમાં તાપી નદીમાં જળસ્તર વધી શકે છે. તેમજ મુંબઈ મહારાષ્ટ્રનાં ભાગોમાં વિદર્ભ મરાઠાવાડ વગેરે ભાગોમાં વરસાદ થઈ શકે છે. મુંબઈમાં ભારેથી અતિભારે વરસાદ થઈ શકે છે.

હવામાન વિભાગની આગાહીને પગલે રાજ્યના અનેક વિસ્તારોમાં હવામાનમાં પલટો આવ્યો છે. વહેલી સવારથી કેટલાક વિસ્તારોમાં ધીમી ધારે તો કેટલાક વિસ્તારોમાં ભારે વરસાદ વરસી રહ્યો છે.  ગતરોજ રાજ્યનાં 59 તાલુકાઓમાં વરસાદ નોંધાયો છે. જેમાં સૌથી વધુ વરસાદ પંચમહાલનાં જાંબુઘોડામાં 3.7 ઈંચ નોંધાયો છે. જ્યારે અન્ય તાલુકાઓમાં  ગોધરામાં 3.5 ઈંચ, વડોદરાનાં દેસરમાં 2.7 ઈંચ, આણંદમાં 2.4 ઈંચ, કાલોલ અને હાલોલમાં 2-2 ઈંચ, ઉમરેઠ અને ઠાસરામાં 2-2 ઈંચ, સાવલી અને ઘોઘંબામાં 1.75 ઈંચ જ્યારે ધાનપુરામાં 1.5 ઈંચ, ગળતેશ્વર અને નડીયાદમાં 1 ઈંચ વરસાદ નોંધાયો છે.

 ગાંધીનગર મહાનગર પાલિકા દ્વારા પ્રિ મોન્સુનની કામગીરી અંતર્ગત ઘ રોડ પર અંડર પાસ એક સપ્તાહ માટે બંધ કરવાનું નક્કી કરવામાં આવ્યું છે.  ત્યારે 1 જૂન પહેલા પૂર્ણ કરવાની રહેતી પ્રિ-મોન્સુનની કામગીરીનાં નામે અંડર પાસ સોમવારથ એક સપ્તાહ માટે બંધ રાખવાનું નક્કી કરવામાં આવ્યું છે. ત્યારે સફાઈ, કેચ ડ્રેઈન મરામત તથા પ્રિ-મોન્સુનની કામગીરીને લઈ અંડર પાસ બંધ રહેશે. અંડર પાસની મનપાની કામગીરીને લઈ સ્થાનિકોમાં રોષ જોવા મળી રહ્યો છે.

મહાઠગ કિરણ પટેલ બાદ વધુ એક બોગસ PMO ઓફિસરની ધરપકડ કરવામાં આવી છે. વડોદરા ગ્રામ્ય પોલીસે PMOના ડાયરેક્ટરની ઓળખ આપી લોકો સાથે છેતરપિંડી આચરનાર ઠગ મયંક તિવારીની ધરપકડ કરી છે. સમાં વિસ્તારમાં રહેતો મયંક તિવારી લાંબા સમયથી પોલીસ અને સેન્ટ્રલ એજન્સીના રડારમાં હતો. જે પછી અંતે તેને ઝડપી લેવામાં આવ્યો છે.

ગુજરાત કોંગ્રેસના પ્રમુખ પદની કમાન સંભાળ્યા બાદ શક્તિસિંહ ગોહિલ એક્શન મોડમાં આવી ગયા છે. શક્તિસિંહ ગોહિલ દ્વારા બિપોરજોય વાવાઝોડાથી થયેલ નુકસાનનો અંદાજ મેળવવાની જવાબદારી સોંપવામાં આવી છે. કોંગ્રેસના સિનિયર નેતાઓને અલગ અલગ જિલ્લાની જવાબદારી સોંપવામાં આવી છે.  આ તમામ નેતાઓ સરકારની જાહેરતા કેટલી મદદરૂપ છે તે ચકાસશે. આ ઉપરાંત આ તમામ નેતાએ સરકારની જાહેરાત મુજબ સહાય મળી છે કે નહીં તે ચકાસશે.

PM મોદી અમેરિકાની ઐતિહાસિક મુલાકાત પૂરી કર્યા બાદ શનિવારે ઇજિપ્તની બે દિવસની સત્તાવાર મુલાકાતે કૈરો પહોંચ્યા હતા. અહીં પણ વડાપ્રધાન મોદીનું ઉમળકાભેર સ્વાગત કરવામાં આવ્યું હતું. એરપોર્ટ પર ભારતીય વડાપ્રધાનને ગાર્ડ ઓફ ઓનર પણ મળ્યું હતું. આ પછી પીએમ મોદી એરપોર્ટથી હોટલ પહોંચ્યા હતા, જ્યાં લોકોએ મોદી-મોદી અને વંદે માતરમના નારા લગાવ્યા હતા. અહીં ઇજિપ્તની યુવતી જેનાએ કૈરોમાં શોલે ફિલ્મનું ગીત 'યે દોસ્તી હમ નહીં તોડેંગે' ગાઈને પીએમ મોદીનું સ્વાગત કર્યું હતું.

 આજથી મુંબઈમાં ચોમાસાનું આગમન થઇ ચૂક્યું છે. દેશના હવામાન વિભાગે મુંબઈમાં ચોમાસું ૨૪મી સુધીમાં પહોંચે તેવી આગાહી કરી હતી.જે આજે સાચી પડશે. આજે અનેક વિસ્તારોમાં હળવાથી મધ્યમ વરસાદની આગાહી છે. બીજી તરફ કોંકણ બાદ આજે મહારાષ્ટ્રના   કેટલાક ભાગોમાં ચોમાસાનું આગમન થઇ પણ ચૂક્યું  છે.

પાકિસ્તાન એક એવો દેશ છે જેને ક્યારેક પણ ભારતનું સારુ લાગતું નથી અને વારે-તહેવારે ભારતની ટીકા કરતા અચકાતો નથી. આ વખતે પાકિસ્તાનના સંરક્ષણ મંત્રી ખ્વાજા આસિફે ઝેર ઓક્યું છે અને ફરી વાર વિવાદીત નિવેદન આપીને બુદ્ધિનું દેવાળું ફૂંક્યું છે. પાકિસ્તાને પોતાની જમીનનો ઉપયોગ કોઈ પણ કિંમતે આતંકવાદ માટે ન થવા દેવો જોઈએ તેવા બાયડન-મોદીના સંયુક્ત નિવેદન બાદ પાકિસ્તાનના રક્ષા મંત્રીની બુદ્ધિ છટકી છે. 

ટાઈટન સબમરિનના ડૂબવાથી દુનિયાના 5 અબજપતિઓના મોતની સાથે જ તેમના સફરનો દુખદ અંત થયો. આ દુર્ઘટનામાં જે પાંચ લોકોના મોત થયા તેમાં ઓશનગેટ કંપનીના માલિક સ્ટોકટન રશ પણ શામેલ હતા.  હવે આ ઘટનાને લઈને લાસ વેગસના રહેવાસી એક રોકાણકાર જય બ્લૂમે મોટો ખુલાસો કર્યો છે. સ્ટોકટન રશે લગભગ એક વર્ષ પહેલા જય બ્લૂમ અને તેમના દિકરા સીન બ્લૂમને દુર્ઘટનાનો શિકાર થયેલી સબમરિનમાં સફર કરવાની રજૂઆત કરી હતી અને તેના માટે ડિસ્કાઉન્ટ ટિકિટોની ઓફર પણ કરી હતી. 

પાસપોર્ટને લઈને કેન્દ્ર સરકાર એક મહત્વનું કામ કરી રહી છે, તેની જાણકારી આજે વિદેશ મંત્રી એસ જયશંકરે શેર કરી છે. પાસપોર્ટ સેવાના દિવસે જયશંકરે કહ્યું કે  ભારત ટૂંક સમયમાં પાસપોર્ટ સેવા કાર્યક્રમ (પીએસપી-વર્ઝન 2.0) ના બીજા તબક્કાની શરૂઆત કરશે, જેમાં નવા અને અપગ્રેડેડ ઈ-પાસપોર્ટ શામેલ છે.