બિઝનેસ / 4 લાખ લો અને જૉબ છોડો! વિશ્વની આ દિગ્ગજ કંપનીના CEOની કર્મચારીઓને આકર્ષક ઑફર, કારણ રસપ્રદ

• એમેઝોનના સ્થાપક જેફ બેઝોસે કર્મચારીઓને કરી ઓફર
• જેફ બેઝોસે કર્મચારીઓને નોકરી છોડવા માટે લાખોની ઓફર કરી
• તમે 4 લાખ રૂપિયા સાથે કંપની છોડી શકો છો

એમેઝોનના સ્થાપક જેફ બેઝોસ તેમના ઉત્તમ નેતૃત્વ માટે જાણીતા છે. પોતાના વફાદાર કર્મચારીઓને સાથે રાખવા માટે જેફ બેઝોસ સમયાંતરે વિવિધ કાર્યક્રમો ચલાવે છે. તેમાંથી એકનું નામ છે 'પે ટુ ક્વિટ'. શેરધારકોને આ પ્રોગ્રામ વિશે માહિતી આપતાં એમેઝોનના સ્થાપકે કહ્યું કે તેમણે આ પ્રોગ્રામ વર્ષ 2014માં શરૂ કર્યો હતો. આ મુજબ જો કંપનીના કર્મચારીઓ કંપની છોડવા માંગતા હોય તો તેઓ તેમ કરી શકે છે. આ માટે કંપની તેમને પૈસા પણ આપશે.

તમે 4 લાખ રૂપિયા સાથે કંપની છોડી શકો છો

શેરધારકોને લખેલા પત્રમાં જેફ બેઝોસે જણાવ્યું છે કે તેમની કંપની 'પે ટુ ક્વિટ' પ્રોગ્રામ ચલાવી રહી છે. આ મુજબ કંપની વર્ષમાં એકવાર તેના કર્મચારીઓને $5000 એટલે કે લગભગ 4.1 લાખ રૂપિયા લઈને કંપનીમાંથી રાજીનામું આપવાનો વિકલ્પ આપે છે. પોતાના પત્રમાં જેફ બેઝોસે કહ્યું છે કે કંપની પોતાના કર્મચારીઓને નોકરી છોડવા માટે વર્ષમાં એકવાર $2,000 થી $5,000ની ઓફર કરે છે, પરંતુ તેની સાથે તે એમ પણ કહે છે કે તમારે આ ઓફર સ્વીકારવી જોઈએ નહીં. અહેવાલ અનુસાર આ ઓફર પ્રથમ વર્ષમાં $2,000 ની છે અને તે પછી તે દર વર્ષે $1000 સુધી વધે છે. આવી સ્થિતિમાં આ ઓફર $5000 સુધી જઈ શકે છે.

આ કાર્યક્રમ શા માટે શરૂ કર્યો

આ સ્પેશિયલ પ્રોગ્રામ શરૂ કરવા પાછળ એમેઝોનના ફાઉન્ડર જેફ બેઝોસે કહ્યું કે આ ઓફર દ્વારા કંપનીને કર્મચારીઓની વિચારસરણી વિશે જાણવા મળે છે. આનાથી કર્મચારીઓ પૈસા લઈને કંપની છોડવા માંગે છે કે નહીં અને ભવિષ્યમાં તેઓ કેટલો સમય કંપની સાથે રહેશે તેની માહિતી મળે છે. કંપનીની આશા છે કે કર્મચારીઓ આ ઓફરને સ્વીકારે નહીં અને તેમની સાથે જોડાયેલા રહે. નોંધનીય છે કે ઈ-કોમર્સ જાયન્ટ એમેઝોન વર્ષ 2022માં આ પ્રોગ્રામને લાગુ કરવામાં નિષ્ફળ રહી હતી કારણ કે કંપની પહેલાથી જ કોરોના રોગચાળાને કારણે સ્ટાફની અછતનો સામનો કરી રહી હતી.