નિયમ તોડ / પીધેલા, માસ્ક વગરના લગભગ 1000 નાગરિકોને અમદાવાદની જાંબાઝ પોલીસે ઝડપી લીધા, પછી કુકડા બનાવ્યા

• 31 ડિસેમ્બરે પીધેલા 109 ઝડપાયા 
• દારુ પીને વાહન ચલાવતા 150 ઝબ્બે 
• અમદાવાદમાં પોલીસે બોલાવ્યો સપાટો 

કોરોના વાયરસના નવા વેરિએન્ટ ઓમિક્રોનના વધતા કેસોને ધ્યાને લઈ દેશની અનેક રાજ્ય સરકારોએ મેળાવડા પર પ્રતિબંધો મુક્યા છે. જેમાં થર્ટી ફર્સ્ટની પાર્ટીઓ પણ સામેલ હતી. તેમ છતાં કેટલાક દારૂના શોખીનો નિયમોનો ભંગ કરી સેલિબ્રેશન કરવા નિકળી પડ્યા હતા. આથી અમદાવાદ પોલીસે આવા લોકો વિરૂધ્ધ કડક કાર્યવાહી હાથ ધરી હતી. જેમાં સ્થાનિક પોલીસે દારૂ પીધેલા 109 આરોપી તથા ટ્રાફિક પોલીસે ડ્રીન્ક વિથ ડ્રાઈવના 150 જેટલા લોકો વિરૂદ્ધ કેસ દાખલ કુલ 259 લોકોની ધરપકડ કરી હતી. આ સીવાય પણ અમદાવાદ પોલીસે જાહેરનામાનો ભંગ કરનાર 123, માસ્ક વગર ફરનાર 638 લોકો અને રાત્રી કર્ફ્યુનો ભંગ કરનાર 156 જેટલા વ્યક્તિઓ સામે કાયદેસરની કાર્યવાહી હાથ ધરી હતી.

આમ અમદાવાદ પોલીસે ગત રાત્રીએ ચુસ્ત બંદોબસ્ત ગોઠવી 1 હજારથી પણ વધુ ગુના દાખલ કર્યા હતા. પોલીસના જણાવ્યા અનુસાર આ કાર્યવાહી માત્ર એક દિવસ પુરતી જ સીમિત નહી રહે, આગામી સમયમાં પણ જો કોઈ વ્યક્તિ જાહેરાનામાનો તથા સરકારની ગાઈડલાઈનનો ભંગ કરતો પકડાશે તો એની વિરૂદ્ધમાં પણ કડક પગલા ભરવામાં આવશે.