આફત / ગુજરાતમાં તબાહી મચાવ્યા બાદ બિપોરજોય હવે રાજસ્થાન તરફ આગળ વધ્યું, દિલ્હીમાં ભારે વરસાદની આગાહી, જાણો ક્યા ક્યા અસર કરશે

• બિપોરજોય રાજસ્થાન તરફ આગળ વધી રહ્યું છે
• દિલ્હીમાં આગામી ચાર દિવસ સુધી ભારે વરસાદ પડી શકે છે
• ભોપાલ અને સિહોર જિલ્લામાં ભારે પવન સાથે વાવાઝોડાની સંભાવના

ગુજરાતના દરિયાકાંઠે ત્રાટકેલા બિપરજોય વાવાઝોડાએ દરિયાકાંઠાના વિસ્તારોમાં તબાહી મચાવ્યા બાદ હવે રાજસ્થાન તરફ આગળ વધી રહ્યું હોવાનું હવામાન વિભાગનું અનુમાન છે. હવામાન વિભાગના જણાવ્યા અનુસાર ચક્રવાતી તોફાન બિપરજોયની અસરને કારણે રાજસ્થાનના જોધપુર, ઉદયપુર અને અજમેર ડિવિઝનમાં ગાજવીજ સાથે વરસાદની સંભાવના છે. આવતીકાલે દક્ષિણ પશ્ચિમ રાજસ્થાનમાં 45થી 55 કિ.મી પ્રતિ કલાકની ઝડપે પવન ફૂંકાશે. વાવાઝોડું દક્ષિણ રાજસ્થાનમાં જઈ ડિપ્રેશનમાં પરિવર્તિત થઈ શાંત પડશે. 

હવામાનશાસ્ત્રીએ શું જણાવ્યું ?
હવામાનશાસ્ત્રીનાં અનુમાન મુજબ ચક્રવાતને કારણે રાજસ્થાન,પંજાબ, હરિયાણા, નવી દિલ્હી અને ઉત્તર પ્રદેશમાં આગામી ચાર દિવસ સુધી ભારે વરસાદ પડશે. આઈએમડીની આગાહી અનુસાર ચક્રવાત બિપરજોયની દિલ્હી-એનસીઆરમાં વધુ અસર થવાની શક્યતા નથી. જો કે આસપાસના વિસ્તારોમાં ભારે પવન સાથે વરસાદની શક્યતા છે. તોફાનના કારણે દિલ્હીમાં આગામી ચાર દિવસ સુધી ભારે વરસાદ પડી શકે છે.

આ વિસ્તારોમાં ભારે પવન સાથે વાવાઝોડાની સંભાવના
ચક્રવાતી તોફાન બિપરજોયથી બચવા માટે મધ્ય પ્રદેશના શહડોલ, જબલપુર, ભોપાલ અને નર્મદાપુરમમાં કેટલીક જગ્યાએ વીજળી પડવાની સંભાવના છે. જેથી આગામી 24 કલાક દરમિયાન ખંડવા, ખરગોન, બરવાની, બુરહાનપુર, સાગર, ઝાબુઆ, ઉજ્જૈન, રિવા, સતના અને છતરપુર જિલ્લામાં સમાન હવામાન પ્રવર્તે તેવી શક્યતા છે. ખંડવા, બુરહાનપુર, ખરગોન, સાગર, રિવા, સતના, છતરપુર, રાયસેન, ભોપાલ અને સિહોર જિલ્લામાં ભારે પવન સાથે વાવાઝોડાની સંભાવના છે. 

ચોમાસા પર નકારાત્મક અસર નહીં થાય
બીજી તરફ ધાર, બાલાઘાટ અને રતલામ જિલ્લામાં કેટલીક જગ્યાએ ગરમીનું મોજું આવવાની શક્યતા છે. ચક્રવાતી તોફાનની અસર ગોવામાં પણ દેખાઈ રહી છે. જેના કારણે દરિયામાં ઊંચાં મોજાં ઊછળી રહ્યાં છે. હાલમાં પર્યટકોને દરિયાકિનારા પર જવા પર પ્રતિબંધ મૂકવામાં આવ્યો છે. હવામાન વિભાગ અનુસાર ચક્રવાતી તોફાન બિપરજોય સંપૂર્ણપણે અલગ છે. પરંતુ આ વર્ષે વિલંબિત ચોમાસા પર તેની કોઈ નકારાત્મક અસર નહીં થાય.