એક્શન / અસદ એન્કાઉન્ટર બાદ હવે UPમાં 63 માફિયાઓ STFની રડાર પર: લિસ્ટમાં સપા-બસપા નેતા પણ સામેલ

• ઉત્તર પ્રદેશમાંથી વધુ એક માફિયાનો ખાત્મો
• 63 ગુનેગારોને સજા કરવા માટે એક યાદી બહાર પાડી
• હવે યાદીમાં ટોપ પર છે આ નામો 

4 મેના રોજ જ્યારે UP STF તેના સ્થાપના દિવસની ઉજવણી કરી રહી હતી, ત્યારે ઉત્તર પ્રદેશમાંથી વધુ એક માફિયાનો ખાત્મો થયો હતો. જણાવી દઈએ કે કુખ્યાત ગેંગસ્ટર અનિલ દુજાના મેરઠમાં UP STF સાથેના એન્કાઉન્ટરમાં માર્યો ગયો હતો અને આ રીતે યુપીમાં માફિયાઓની યાદીમાં હવે 63 માફિયાઓ પોલીસના રડાર પર છે. નોંધનીય છે કે ઉત્તર પ્રદેશમાંથી શ્રી પ્રકાશ શુક્લા જેવા તમામ ગુંડાઓને ખતમ કરવા માટે 4 મે 1998ના રોજ રચાયેલી સ્પેશિયલ ટાસ્ક ફોર્સે ગુરુવારે તેની સ્થાપનાના 25 વર્ષ પૂર્ણ કર્યા છે.

માફિયા અતીક અહેમદ અને અશરફની હત્યા બાદ પશ્ચિમ યુપીના કુખ્યાત ગેંગસ્ટર અનિલ દુજાનાને યુપી એસટીએફ દ્વારા એન્કાઉન્ટરમાં માર્યો ગયો હતો. અતીક અને અશરફની હત્યા બાદ યુપી પોલીસે જાહેર કરેલા યુપીના ગેંગસ્ટરોની યાદીમાં અનિલ દુજાનાનો સમાવેશ થતો હતો. અનિલ દુજાના એન્કાઉન્ટર પછી હવે આ યાદીમાં આગળનો નંબર કોનો છે તેની ચર્ચા ચાલી રહી છે.

જણાવી દઈએ કે મુખ્યમંત્રીએ વિધાનસભામાં કહ્યું હતું કે તેઓ માફિયાઓનું રાજ પૂરું કરશે. યોગી સરકારે ઉત્તર પ્રદેશમાં આતંક મચાવવાનો પ્રયાસ કરી રહેલા અને 2017 પહેલા કાયદો અને વ્યવસ્થાને ખુલ્લેઆમ પડકાર ફેંકનારા 63 ગુનેગારોને સજા કરવા માટે એક યાદી બહાર પાડી હતી અને ખાસ જણાવી દઈએ કે આમાંથી એક નામ અનિલ દુજાનાનું હતું, જેની સામે 18 હત્યા સહિત 65 ગંભીર ગુના નોંધાયેલા હતા. 

યાદીમાં ટોપ પર છે આ નામો 
હવે આ માફિયાઓની યાદીમાં મુખ્તાર અંસારી, સુનિલ રાઠી, સુંદર ભાટી, બબલુ શ્રીવાસ્તવ, ખાન મુબારક સહિત 38 માફિયાઓ જેલમાં છે. 20 જામીન પર બહાર છે, જ્યારે 5ની શોધ ચાલી રહી છે. પશ્ચિમ ઉત્તર પ્રદેશ પોલીસની અઢી લાખની ઈનામી રકમ બદન સિંહ બદ્દો, રાશિદ નસીમ સહિત 5 માફિયાઓ ફરાર છે. UP STF જામીન પર છૂટેલા 20 માફિયાઓની ગતિવિધિઓ પર સતત નજર રાખી રહ્યું છે. જેમાં માફિયા ડોન બ્રિજેશ સિંહ, સુશીલ મૂચના નામ સામેલ છે. આ તરફ યુપી પોલીસના ડીજી લો એન્ડ ઓર્ડર પ્રશાંત કુમારે પણ કહ્યું છે કે માફિયાઓ સામે કાર્યવાહી ચાલુ રહેશે.

SP-BSPના નેતાઓ પણ લિસ્ટમાં છે
યુપી પોલીસની આ યાદીમાં સમાજવાદી પાર્ટી અને BSPના નેતાઓ પણ સામેલ છે. આમાં સપા નેતા અને પૂર્વ સાંસદ રિઝવાન ઝહીર, સપા-બસપા નેતા દિલીપ મિશ્રા, બસપા નેતા અનુપમ દુબે જેમની સામે 41 કેસ નોંધાયેલા છે અને ભૂતપૂર્વ એમએલસી હાજી ઈકબાલનું પણ નામ છે. આ જ કારણ છે કે ભાજપ સપા અને બસપા પર ગુંડાઓ અને માફિયાઓની પાર્ટી હોવાનો આરોપ લગાવી રહી છે. અને હાલમાં ચાલી રહેલી નાગરિક ચૂંટણીમાં પણ ભાજપ આ મુદ્દે સપા અને બસપા પર પ્રહારો કરી રહી છે.