- કુસ્તીબાજોનું દોઢેક મહિનાથી બૃજભૂષણ શરણસિંહ વિરુદ્ધ પ્રદર્શન
- સગીર સહિત 7 મહિલા કુસ્તીબાજોએ બૃજભૂષણ સામે યૌન શોષણના લગાવ્યા આરોપો
- એક બાળકીએ પોતાનું નિવેદન નોંધતી વખતે તેની ઉંમરનું નિવેદન બદલી નાખ્યું હતું
કુસ્તીબાજો છેલ્લા દોઢેક મહિનાથી બૃજભૂષણ શરણ સિંહ વિરુદ્ધ પ્રદર્શન કરી રહ્યા છે. બૃજભૂષણ સિંહ પર એક સગીર સહિત સાત મહિલા કુસ્તીબાજોએ યૌન શોષણના આરોપો લગાવ્યા છે. આ તરફ હવે આ મામલે એક નવો વળાંક સામે આવ્યો છે. એવું કહેવામાં આવી રહ્યું છે કે, બૃજભૂષણ શરણ સિંહ પર યૌન ઉત્પીડનનો આરોપ લગાવનાર 'સગીર' રેસલર ઈવેન્ટ સમયે સગીર નહોતી. તેણે કોર્ટમાં પોતાનું નિવેદન બદલ્યું છે.
બૃજભૂષણ શરણ સિંહ પર યૌન ઉત્પીડનનો આરોપ લગાવનાર 'સગીર' બાળકીના પિતાએ બુધવારે જણાવ્યું હતું કે, તેમની પુત્રીએ કોર્ટમાં પોતાનું નિવેદન નોંધતી વખતે તેની ઉંમરનું નિવેદન બદલી નાખ્યું હતું. તમને જણાવી દઈએ કે, રેસલિંગ ફેડરેશન ઓફ ઈન્ડિયા વિરુદ્ધ POCSO એક્ટ હેઠળ કેસ નોંધવામાં આવ્યો હતો. 29 એપ્રિલે બૃજભૂષણ શરણ સિંહ વિરુદ્ધ બે કેસ નોંધાયા હતા. આમાંથી એક કેસ પોક્સો એક્ટ હેઠળ નોંધવામાં આવ્યો હતો.
દિલ્હી પોલીસ 15 જૂન સુધીમાં ચાર્જશીટ દાખલ કરી શકે
દિલ્હી પોલીસ આ સમગ્ર મામલાની તપાસ કરી રહી છે. 15 જૂન સુધીમાં દિલ્હી પોલીસ WFI પ્રમુખ વિરુદ્ધ ચાર્જશીટ દાખલ કરી શકે છે. આ જાણકારી સરકાર દ્વારા કુસ્તીબાજોને આપવામાં આવી છે. ખેલ મંત્રી અનુરાગ ઠાકુરે બજરંગ પુનિયા અને સાક્ષી મલિક સાથે બેઠક કરી હતી. આ દરમિયાન લગભગ છ કલાક સુધી વાતચીત ચાલી હતી.
આ બેઠકમાં સરકારે કુસ્તીબાજોની મોટાભાગની માંગણીઓ પર સહમતિ દર્શાવી છે. તમને જણાવી દઈએ કે, આ કુસ્તીબાજો બૃજભૂષણની ધરપકડની માંગ સાથે 23 એપ્રિલથી વિરોધ પ્રદર્શન કરી રહ્યા છે. 28 મેના રોજ આ કુસ્તીબાજોએ નવા સંસદ ભવન સામે મહિલા મહાપંચાયતનું આયોજન કર્યું હતું. આ દરમિયાન દિલ્હી પોલીસે તેને આમ કરતા રોક્યો હતો. કાયદો અને વ્યવસ્થાને ખલેલ પહોંચાડવાના આરોપમાં ઘણા કુસ્તીબાજોને કસ્ટડીમાં લેવામાં આવ્યા હતા.
