કાર્યવાહી / કચ્છમાંથી દેશનો ગદ્દાર ઝડપાયો: 25 હજાર માટે કર્યું આવું કાંડ, છોકરીનું ખોટું ID પણ બનાવ્યું, કારનામા જોઈ ATS ચોંકી

• ગુજરાત ATS દ્વારા કચ્છમાં મોટી કાર્યવાહી
• ATSએ કચ્છમાંથી એક વ્યક્તિની કરી ધરપકડ
• પાકિસ્તાન હેન્ડલરને પહોંચાડતો હતો ગુપ્ત માહિતી 

ગુજરાત ATSને મોટી સફળતા મળી છે. ATSની ટીમે પાકિસ્તાની હેન્ડલરને દેશની ગુપ્ત માહિતી મોકલનારા એક શખ્સને ભુજમાંથી ઝડપી પાડ્યો છે. હાલ ATSની ટીમ દ્વારા તેની વધુ પૂછપરછ હાથ ધરવામાં આવી છે. તેણે અત્યાર સુધીમાં કેટલીવાર દેશની ગુપ્ત માહિતી મોકલી છે તે દિશામાં ગુજરાત ATSની ટીમ તપાસ કરી રહી છે.  

નિલેશ વાડિયા નામના શખ્સની ધરપકડ
મળતી માહિતી અનુસાર, ગુજરાત ATS દ્વારા વોચ ગોઠવીને નિલેશ વાડિયા નામના શખ્સની કચ્છના ભુજમાંથી ધરપકડ કરવામાં આવી છે. નિલેશ કચ્છ BSFના એક યુનિટમાં પ્યુન તરીકે કામ કરતો હતો અને તે BSFની હીલચાલ પર નજર રાખી રહ્યો હોવાની માહિતી ATS પાસે હતી. એટલું જ નહીં માહિતી આપવાના બદલામાં તેને 25 હજાર મળ્યા હોવાની માહિતી સામે આવી હતી. 

કથિત રીતે હનીટ્રેપને અંજામ આપે તે પહેલા ધરપકડ
નિલેશ વાડિયાએ એક યુવતીનું ફેક આઇડી બનાવ્યું હતું. જોકે, તેની હિલચાલ શંકાસ્પદ જણાતાં એટીએસ લાંબા સમયથી નિલેશ વાડિયાની વેબ એક્ટિવિટી પર નજર રાખી બેઠું હતું. નિલેશ વાડીયા કથિત રીતે હનીટ્રેપ કાંડને અંજામ આપે તે પહેલા જ તેને દબોચી લેવામાં આવ્યો છે. જે બાદ આગળની કાર્યવાહી હાથ ધરવામાં આવી છે. આરોપીના મોબાઇલની FSL તપાસમાં હકીકત સામે આવી છે.

પૂછપરછમાં થઈ શકે છે મોટા ખુલાસા
હાલ ગુજરાત ATSએ આરોપી સામે ઓફિશિયલ સિક્રેટ એક્ટ હેઠળ ગુનો દાખલ કરીને સમગ્ર ઘટના મામલે વધુ તપાસ હાથ ધરી છે. હાલ નિલેશની વધુ પૂછપરછ કરવાાં આવી રહી છે. જેમાં મોટા ખુલાસા થઈ શકે છે.