વિવાદ / રાજકોટમાં તંત્રની જાણ બહાર કોઈ 100 ટ્રાફિક બૂથ મૂકી ગયું ને પાછા પોસ્ટર પણ લગાવ્યા... હવે કહ્યું તપાસ કરીશું

• ટ્રાફિક પોલીસ બૂથને લઈ વિવાદ
• પોલીસ અને મનપાએ ઉભા નથી કર્યા બૂથ
• ટ્રાફિક બૂથથી ખાનગી એજન્સીને આવક

રાજકોટમાં ટ્રાફિક પોલીસ બૂથને લઈને વિવાદ સર્જાયો છે. રાજકોટમાં શહેરના અલગ-અલગ 100 સ્થળે આવેલા આ ટ્રાફિક બૂથ કોણે ઉભા કર્યા તેને લઈને સવાલો ઉભા થયા છે. કારણ કે આ ટ્રાફિક બૂથ ટ્રાફિક પોલીસ અને મનપાએ ઉભા કર્યા નથી. આ મામલે આઉટડોર એજન્સીએ મનપા અને સરકારને પત્ર લખ્યો છે. 

કોઈ જ પૂર્વ મંજૂરી વગર ઉભા કરાયા ટ્રાફિક બૂથ 
આ પત્રમાં ટ્રાફિક બૂથથી મનપા કે ટ્રાફિક પોલીસને આવક ન મળતી હોવાનો ઉલ્લેખ કરાયો છે. સાથે શહેરમાં જ્યાં જરૂર નથી ત્યાં પણ ટ્રાફિક બૂથ ઉભા કરાયા હોવાનું જણાવવામાં આવ્યું છે.   રાજકોટ આઉટડોર એસોસિએશને પત્રમાં જણાવ્યું કે, રાજકોટ હોર્ડિંગ એસોસિએશન દ્વારા આપને રૂબરૂ કરવામાં આવેલ રજૂઆત મુજબ અમદાવાદ સ્થિત પ્રાઈવેટ પાર્ટી દ્વારા રાજકોટ શહેરના ટ્રાફિકથી ધમધમતા વિવિધ સર્કલમાં ટ્રાફિક બૂથ ટાઇપ જાહેરાતના બોર્ડ રાજકોટ મહાનગરપાલિકાની કોઈ જ પૂર્વ મંજૂરી વગર ઉભા કરવામાં આવેલ છે. જે રાજકોટ મહાનગરપાલિકા દ્વારા ફાળવવામાં આવેલ ટેન્ડર હોર્ડિંગ સાઇટ તેમજ ખાનગી હોર્ડિંગ સાઈટની વિઝીબીલીટીને ખૂબ જ નડતરરૂપ છે. 

રાજકોટ મનપાને થઈ રહ્યું છે નુકસાન
પત્રમાં વધુમાં લખવામાં આવ્યું છે કે, આ તકે ખાસ નોંધવું જરૂરી છે કે આ પ્રકારના જાહેરાતના ટ્રાફિક બૂથ દ્વારા જાહેરાત કરવાથી રાજકોટ મહાનગર પાલિકાને પણ માતબર આર્થિક નુકસાન જઈ રહ્યું છે. જેથી આ બાબતે આપ ત્વરીત ઘટતુ કરશો.

સમગ્ર મામલે તપાસ થશેઃ અનિલ ધામેલિયા
આપને જણાવી દઈએ કે, સામાન્ય રીતે ટેન્ડર પ્રક્રિયા દ્વારા આ રીતે ટ્રાફિક બૂથમાં જાહેરાત લગાવી શકાય છે.  ત્યારે શહેરમાં જ્યાં જરૂર નથી ત્યાં પણ આવા ટ્રાફિક બુથ ઉભા કરીને દર મહિને એક ટ્રાફિક બૂથમાંથી એજન્સી દ્વારા 15થી 20 હજાર રૂપિયા લેવામાં આવે છે. આ મામલે રાજકોટના ડે.મનપા કમિશનર અનિલ ધામેલિયાનું નિવેદન પણ સામે આવ્યું છે. તેમણે જણાવ્યું કે, અમે આ બૂથ મુક્યા નથી. અમે કોઈ ટેન્ડરિંગ કર્યું નથી. સમગ્ર મામલે તપાસ કરવામાં આવશે. તો ટ્રાફિક DCPએ પણ ટ્રાફિક બૂથ ઉભા ન કર્યાનું નિવેદન આપ્યું છે.  ત્યારે આ બૂથ કોણે ઉભા કર્યા તે મોટો સવાલ છે.