અમદાવાદ / ક્રેડિટ કાર્ડની લિમિટ વધારવાના બહાને યુવક સાથે ૭૧ હજારની છેતરપીંડી

• ક્રેડિટ કાર્ડની લિમિટ વધારવાના બહાને યુવક સાથે થયું ફ્રોડ
• અજાણી યુવતીએ યુવકને જાળમાં ફસાવી ઓટીપી મેળવી લઈ છેતર્યો
• યુવકે બોપલ પોલીસ સ્ટેશનમાં ફરિયાદ નોંધાવી 

શહેરમાં રોજ એક વ્યક્તિ સાયબર ક્રાઈમનો ભોગ બની રહી છે. બોપલમાં રહેતા યુવકને અજાણી યુવતીએ ફોન કરી ક્રેડિટ કાર્ડની લિમિટ વધારવાના બહાને ઓટીપી મેળવી ૭૧ હજારની ઠગાઈ કરી હતી. યુવકે બોપલ પોલીસ સ્ટેશનમાં ફરિયાદ નોંધાવી છે.

યુવતીએ ચાલુ ફોનમાં ઓટીપી લઈને ક્રેડિટ કાર્ડમાંથી પૈસા ઉપાડી લીધા
બોપલમાં શુભ ફ્લેટમાં રહેતા નિમેષ શુકલાએ પોલીસ સ્ટેશનમાં ઠગાઈની ફરિયાદ નોંધાવી છે. નિમેષ સાંતેજ ખાતે ખાનગી કંપનીમાં નોકરી કરે છે. થોડા દિવસ પહેલાં અજાણ્યા નંબર પરથી નિમેષ પર ફોન આવ્યો હતો. ફોન કરનાર યુવતીએ નિમેષને પૂછયું હતું કે શું તમારે આરબીએલ બેન્કના ક્રેડિટ કાર્ડમાં કેશ લિમિટ વધારવી છે? નિમેષે હા પાડતા યુવતીએ ચાલુ ફોનમાં નિમેષ પાસે કાર્ડની માહિતી માગી હતી. નિમેષે કાર્ડની તમામ વિગત યુવતીને આપી દીધી હતી. ત્યારબાદ નિમેષે યુવતીને ઓટીપી પણ આપી દીધો હતો.

પોલીસે ફરિયાદનાં આધારે તપાસ શરૂ કરી
યુવતીએ નિમેષને કહ્યું હતું કે થોડીવારમાં તમારા ક્રેડિટ કાર્ડમાં કેશ લિમિટ વધી જશે તેમ કહીને યુવતીએ ફોન કાપી નાખ્યો હતો.   નિમેષના મોબાઈલમાં ૭૧ હજાર રૂપિયા ડેબિટ થયાનો મેસેજ આવ્યો હતો. નિમેષે તરત બેન્કમાં જઈને કાર્ડ બ્લોક કરાવી દીધું હતું. નિમેષ સાથે ઓનલાઇન ફ્રોડ થયો હોવાથી તેણે બોપલ પોલીસ સ્ટેશનમાં અજાણી યુવતી વિરુદ્ધ ફરિયાદ નોંધાવી હતી.પોલીસે ફરિયાદના આધારે ગુનો નોંધી વધુ તપાસ હાથ ધરી છે.