તમારા કામનું / ભારતમાં માત્ર 10% કારમાં જ 6 એરબેગ, સરકારે કહ્યું હતું ઑક્ટોબરથી લાગુ થશે પણ કંપનીઓ હજુ નથી તૈયાર

• 6 એરબેગ એ સૌથી મહત્વપૂર્ણ ફીચર્સમાંથી એક છે
• કારમાં હવે ટુ એરબેગ ફીચરને સ્ટાન્ડર્ડ બનાવવામાં આવ્યું 
• ભારતમાં થાય છે સૌથી વધુ રોડ એક્સિડન્ટ

આપણા ભારત દેશના રસ્તાઓ પર ચાલતા ઓછામાં ઓછા 90% વાહનો 6 એરબેગ સાથે નથી આવતા. 6 એરબેગ એ સૌથી મહત્વપૂર્ણ ફીચર્સમાંથી એક છે પણ આ ફીચર ફક્ત મોંઘા વાહનો પુરતી મર્યાદિત છે. એક અહેવાલ અનુસાર ઓટો ઉદ્યોગમાં મોટાભાગના ખરીદદારો વધુ એરબેગ્સના ઓપ્શન સાથે આવતા મોડલ્સમાં પણ સસ્તા વેરિઅન્ટનો ઓપ્શન પસંદ કરે છે. અને તેને કારણે જ દેશમાં બેથી વધુ એરબેગ ધરાવતી કારનો રસ્તા પર ઓછી જોવા મળે છે. 

દેશમાં વહેંચાતી કારમાં હવે ટુ એરબેગ ફીચરને સ્ટાન્ડર્ડ બનાવવામાં આવી રહ્યું છે. જણાવી દઈએ કે અગાઉ આવું નહોતું. ઘણી કંપનીઓ ફક્ત એક જ એરબેગ સાથે કાર વહેંચતી હતી પણ એક્સિડન્ટ અને તેમાં થતાં મૃત્યુના પ્રમાણમાં વધારો થતાં સરકારે કારમાં બે એરબેગ્સ રાખવાનું ફરજિયાત કર્યું હતું. જેના કારણે તમામ કાર કંપનીઓને આ વર્ષે જાન્યુઆરીથી દરેક કાર અપગ્રેડ કરવાની ફરજ પડી હતી.

ભારતમાં થાય છે સૌથી વધુ રોડ એક્સિડન્ટ
દુનિયામાં સૌથી વધુ રોડ એક્સિડન્ટ ભારતમાં થાય છે. તેને ઓછું કરવા માટે સરકારનું માનવું છે કે વાહનોને વધુ એરબેગ્સથી સજ્જ કરવાથી રસ્તાઓ પર થતાં એક્સિડન્ટને કારણે જીવ ગુમાવનારની સંખ્યામાં ઘટાડો થશે. ભારતમાં દુનિયાભરના વાહનોનો  હિસ્સો માત્ર 1% છે પણ રોડ એક્સિડન્ટમાં થનાર મૃત્યુમાં હિસ્સો 11% છે.

ઓટો ઉદ્યોગનું અલગ તર્ક 
એક તરફ સરકાર દરેક કંપનીઓની  તમામ કારમાં વધુ સેફ્ટી ફીચર્સ આપવા માટે દબાણ કરી રહી છે પણ તેની સામે ઓટો ઉદ્યોગનો એક વર્ગ એવી દલીલ કરે છે કે મૃત્યુદર ઘટાડવા માટે સીટ બેલ્ટના નિયમોનું વધુ સારું અમલીકરણ, ડ્રિંક એન્ડ ડ્રાઇવ, સ્પીડ લિમિટ અને રોંગ લેન ડ્રાઇવિંગ જેવા મુદ્દાઓ પર ધ્યાન આપવું જોઈએ.

શું લાગુ થશે 6 એરબેગ નિયમ? 
રોડ ટ્રાન્સપોર્ટ અને હાઈવે મંત્રાલયે ઓક્ટોબર 2022થી તમામ કારમાં 6 એરબેગ્સ ફરજિયાત બનાવવાનો પ્રસ્તાવ મૂક્યો હતો પણ એવું લાગી રહ્યું છે કે તે અત્યારે શક્ય નથી. ઓટો ઉદ્યોગનો એક વર્ગ આ નિયમની વિરુદ્ધ છે અને એટલા માટે જ નીતિન ગડકરીએ કહ્યું હતું કે આ યોજના પર વિચારણા હજુ ચાલુ છે.