મોટા સમાચાર / ભારતમાં આવી કાર પર લાગશે 50% ટેક્સ: GST કાઉન્સિલની મીટિંગમાં થઈ ગયું મોટું એલાન

• GSTની બેઠકમાં ઓટો સેક્ટરથી જોડાયેલ એક મોટો નિર્ણય લેવાયો 
• એસયુવી ખરીદવી થશે મોંઘી 
• પહેલેથી જ કિંમતોમાં વધારો કરવાની જાહેરાત કરી ચૂકી છે આ કંપનીઓ 

GST કાઉન્સિલની બેઠક સતત ચાલી રહી છે અને આ બેઠકમાં ઘણા મહત્વપુર્ણ નિર્ણય લેવામાં આવી રહ્યા છે. GSTની 48મી બેઠકમાં ઓટો સેક્ટરથી જોડાયેલ એક મોટો નિર્ણય લેવામાં આવ્યો છે. બેઠકમાં SUV વાહનોની વ્યાખ્યા નક્કી કરવાની સાથે સાથે તેમના પર 22% કંપનસેશન સેસ (Compensation Cess) લગાવવા પર સહમતિ બની છે .

એસયુવી ખરીદવી થશે મોંઘી 
પહેલા કરતાં હવે SUV ખરીદવી ઘણી મોંઘી થઈ જશે. એક તો મારુતિ અને ટાટા જેવી કંપનીઓએ પહેલાથી જ નવા વર્ષમાં જાન્યુઆરીથી તેમના વાહનોની કિંમતો વધારવાની જાહેરાત કરી દીધી હતી અને આવી સ્થિતિમાં સરકાર દ્વારા થતો આ ટેક્સ વધારો એ સામાન્ય જનતાના ખિસ્સા પર બહાર વધારશે. જણાવી દઈએ કે GST કાઉન્સિલે 22% કંપનસેશન સેસ (Compensation Cess)ચાર્જ વસૂલવાનું નક્કી કર્યું છે, જે 28% GST સાથે વસૂલવામાં આવશે. એટલે કે SUV ખરીદતી વખતે ગ્રાહકે કુલ 50% ટેક્સ ચૂકવવો પડશે.

બીજી કઈ ગાડીઓને સરકાર SUVના દાયરામાં લાવશે?
આ સાથે જ GST કાઉન્સિલે બેઠકમાં SUV વાહનોની વ્યાખ્યા પણ સ્પષ્ટ કરી છે. એ મુજબ તેની અંદર ફક્ત તે જ વાહનો આવશે જેની એન્જિન ક્ષમતા 1500CC, 4000mm લંબાઈ અને 170 mm ગ્રાઉન્ડ ક્લિયરન્સ હશે. જણાવી દઈએ કે જ્યારે સેડાનને SUVમાં લેવી જોઈએ કે નહીં તે અંગે ચર્ચા શરૂ થઈ ત્યારે આ અંગેની ચર્ચા મીટિંગમાં શરૂ થઈ હતી. 

પહેલેથી જ કિંમતોમાં વધારો કરવાની જાહેરાત કરી ચૂકી છે આ કંપનીઓ 
દેશની બે મોટી કંપનીઓ ટાટા મોટર્સ અને મારુતિ પોતાના વાહનોની કિંમતમાં વધારો કરવા જઈ રહી છે અને આ વધારો આવતા વર્ષે 1 જાન્યુઆરીથી લાગુ કરવામાં આવશે. આ ભાવ વધારા વિશે કંપનીએ કહ્યું કે તેણે ખર્ચ ઘટાડવા માટે મહત્તમ પ્રયાસો કર્યા છે અને આ વધારાને આંશિક રીતે રોકવાનો પણ પ્રયાસ કર્યો છે પણ હવે કિંમતોમાં વધારો જરૂરી બની ગયો છે.