લાલિયાવાડી / જામનગર મનપાની ઘોર બેદરકારી: પટાંગણમાંથી મળી આવી વિટામીનની એક્સપાયર થયેલી 2000 ગોળીઓ, લોકોમાં રોષ

• જામનગર મનપાના આરોગ્ય તંત્રની ઘોર બેદરકારી
• પટાંગણમાંથી મળી આવી વિટામિનની 2000 ગોળી
• આરોગ્ય શાખાની કામગીરી શંકાના દાયરામાં

જામનગર મહાનગરપાલિકાના આરોગ્ય તંત્રની ગંભીર બેદરકારી સામે આવી છે. મનપાના આરોગ્ય કેન્દ્ર પરથી લોકોને અપાતી વિટામીનની 2000 ગોળીઓ એક્સપાયર થઇ ગઇ હોવાનું સામે આવ્યું છે. જેના લીધે લોકોમાં ભારે રોષ જોવા મળી રહ્યો છે. મહાનગરપાલિકાના પટાંગણમાંથી આ વિટામીનની ગોળીની બોટલો ધૂળ ખાતી જોવા મળી. ત્યારે દવા વિતરણમાં આ પ્રકારની ગંભીર બેદરકારી જોવા મળતા લોકો રોષે ભરાયા છે. મુદ્દત વીતી ગયેલી દવાના જથ્થાનો બાયોમેડીકલ વેસ્ટમાં નિકાલ કરવામાં ન આવતા આરોગ્ય શાખાની કામગીરી હવે શંકાના દાયરામાં આવી ગઇ છે.

2000 ગોળીઓ એક્સપાયર થયેલી હાલતમાં મળી આવી

તમને જણાવી દઇએ કે, શહેરના આરોગ્ય કેન્દ્ર પરથી જેઓને આંખની તકલીફ હોય તેઓને વિટામીન Aની ગોળી વિનામૂલ્યે આપવામાં આવે છે. જેમાં મનપા દ્વારા દર વર્ષે ફેબ્રુઆરી અને ઓગષ્ટ મહિનામાં ડોર ટુ ડોર સર્વે હાથ ધરીને બાળકોને વિટામીન Aનું સીરપ આપવામાં આવે છે. ત્યારે આવી 2000 જેટલી ગોળીઓ એક્સપાયર થઇ ગઇ છે. જેમાં એક બોટલની અંદર જ 50 ગોળીઓ આવે છે પરંતુ યોગ્ય રીતે દવાનું વિતરણ ન કરાતા 40 બોટલો વણવપરાયેલી હાલતમાં પડી રહી છે.

એક બોટલમાં 50 ગોળી હોય છે

આ અંગે જામનગર મહાનગરપાલિકાના ફાર્માસીસ્ટ મયુર ડોડીયાનું કહેવું છે કે, 'પટાંગણમાં વિટામીન-Aની ગોળીઓની જે બોટલો પડી છે તે દવા એક્સપાયર થઇ ગઇ છે. જેનો બાયોમેડીકલ વેસ્ટમાં નિકાલ કરવાનો છે. એક બોટલમાં 50 ગોળી હોય છે. આવી 2000 ગોળીની મુદ્દત વીતી ગઇ છે. મારી નિમણૂંક હમણાં જ થઇ છે. પહેલાના અધિકારી દ્રારા આ દવાનો જથ્થો રખાયો હતો. જેની ચકાસણી કરતા એક્સપાયર થયેલી દવા મળી આવી.'