ચિંતા / અમદાવાદના આ પૉશ વિસ્તારમાં એક જ જગ્યાએ 110 લોકો કોરોના પોઝિટિવ થતાં ખળભળાટ

• અમદાવાદના બોડકદેવમાં કોરોનાના કેસનો બ્લાસ્ટ
• PSP કન્સ્ટ્રક્શન કંપનીના 110 શ્રમિકો કોરોનાગ્રસ્ત
• ગુજરાત યુનિ.મેદાન પાછળ રહે છે શ્રમિકો

પ્રાપ્ત થતી જાણકારી પ્રમાણે, અમદાવાદના બોડકદેવ વિસ્તારમાં આવેલી PSP કન્સ્ટ્રક્શન કંપનીના એકસાથે 110 શ્રમિકોના કોરોના રિપોર્ટ પોઝિટિવ હોવાનું સામે આવ્યું છે. નોંધનીય છે કે, એક જ સ્થળે આટલી મોટી સંખ્યામાં કોરોના પોઝિટિવ કેસ આવ્યાનો અમદાવાદનો આ પ્રથમ કિસ્સો છે. 

એકસાથે 100 કેસ નોંધાતા ખળભળાટ 

આપને જણાવી દઇએ કે, GMDC મેદાનની પાછળના ભાગમાં મોટી સંખ્યામાં રહેતા તમામ શ્રમિકોનો કોરોના ટેસ્ટ કરવામાં આવ્યો હતો. 2 દિવસમાં 110 શ્રમિકોના કોરોના રિપોર્ટ પોઝિટિવ આવતા ખળભળાટ મચી જવા પામ્યો હતો અને AMC તંત્રમાં દોડધામ મચી ગઈ છે. હાલ આ તમામ દર્દીઓને તાત્કાલિક અસરથી સમરસ હોસ્ટેલમાં સારવાર માટે ખસેડાયા છે. 

ગઇકાલે ગુજરાતમાં નોંધાયા છે 1280 નવા કેસ 

ગુજરાતમાં પણ કોરોના વાયરસના નવા કેસમાં કોઈ ઘટાડો નોંધાયો નથી એવામાં છેલ્લા 24 કલાકમાં વાયરસના નવા 1280 કેસ સામે આવ્યા છે. રાજ્ય સરકારના આરોગ્ય વિભાગે જાહેર કરેલ પ્રેસનોટ પ્રમાણે ગુજરાતમાં છેલ્લા 24 કલાકમાં 1280 કોરોનાના કેસ નોંધાયા છે. આ સાથે જ રાજ્યમાં કુલ કેસનો આંકડો 96,435 પર પહોંચ્યો છે.

ટેસ્ટિંગમાં સતત વધારો 

કોરોના વાયરસના કારણે ગુજરાતમાં દિવસેને દિવસે ટેસ્ટની સંખ્યામાં વધારો કરવામાં આવી રહ્યો છે. હાલ રાજ્ય કુલ 61 લેબોરેટરી કાર્યરત છે અને છેલ્લા એક માસથી રેપિડ એન્ટીજન કિટનો પણ ઉપયોગ કરવામાં આવી રહ્યો છે. રાજ્યમાં આજે  કોરોના વાયરસના 66,363 ટેસ્ટ કરવામાં આવ્યા છે જ્યારે ટેસ્ટિંગનો કુલ આંકડો 23,31,836 પર પહોંચ્યો છે.     

અત્યાર સુધીમાં 77,782 દર્દીઓએ કોરોનાને મ્હાત આપી

આજે કોરોનાના 1280 કેસ જ્યારે 1025 દર્દીઓ સાજા થતાં અત્યાર સુધીમાં કુલ 77,782 દર્દીઓએ કોરોનાને મ્હાત આપી છે. આ તમામને હોસ્પિટલમાંથી ડિસ્ચાર્જ કરવામાં આવ્યા છે. આમ ગુજરાતમાં સાજા થવાનો દર 80.66 ટકા થયો છે. આ સાથે જ રાજ્યમાં આજે સુરત, અમદાવાદ અને વડોદરામાં કોરોનાના સૌથી દર્દીઓ વધુ કેસ નોઁધાયા છે.રાજ્યમાં કોરોનાથી છેલ્લા 24 કલાકમાં 14 દર્દીઓના ભોગ લીધો છે. જેને લઇને કોરોનાથી મોતનો આંકડો રાજ્યમાં 3022 પર પહોંચ્યો છે. આ સાથે જ રાજ્યમાં હાલ 79 દર્દીઓ વેન્ટિલેટર પર છે. 

ગુજરાતમાં હાલ 15631 એક્ટિવ કેસ 

ઉલ્લેખનીય છે કે, રાજ્યમાં કોરોનાના કુલ કેસનો આઁકડો 96 હજારને પાર ભલે પહોંચ્યો હોય પરંતુ 15631 કેસ જ એક્ટિવ છે. જેનો અર્થ છે કે, રાજ્યમાં ઘણા બધા દર્દીઓએ કોરોનાને મ્હાત આપી છે. આ સાથે જ રિકવરી રેટ પર 80 ટકાને પાર પહોંચી ગયો છે. જે ખરેખર સારી વાત છે.