વડોદરા / નોકરીની અછત વચ્ચે એમ.એસ યુનિવર્સિટીમાં વહી ઉલટી ગંગા: છેલ્લાં 2 વર્ષમાં 10 પ્રોફેસરોએ છોડી કાયમી નોકરી, જગ્યાઓ ખાલી

• નોકરીઓને અછત વચ્ચે વડોદરાની MSUમાં ઉલટી ગંગા 
• M.S યુનિવર્સિટીમાં 10 અધ્યાપકોએ છોડી કાયમી નોકરી 
• નોકરી છોડનાર અધ્યાપકો અન્ય યુનિવર્સિટીમાં જોડાયા

Vadodara News: એક જમાનાની વિશ્વ વિખ્યાત યુનિવર્સિટીના વળતા પાણી જોવા મળી રહ્યા છે. આ યુનિવર્સિટીના એક તરફ સિનિયર અધ્યાપકો નિવૃત્ત થઈ રહ્યા છે અને બીજી તરફ કાયમી અધ્યાપકો પણ નોકરી છોડી રહ્યા હોવાથી યુનિવર્સિટીને બેવડો માર પડી રહ્યો છે. અમે જે યુનિવર્સિટીની વાત કરી રહ્યા છીએ તેનું નામ છે વડોદરાની મહારાજા સયાજીરાવ યુનિવર્સિટી. જી હાં, એમ.એસ યુનિવર્સિટીના 10 કાયમી અધ્યાપકો નોકરી છોડીને બીજી યુનિવર્સિટીમાં જોડાઈ ગયા છે. 

2020થી કાયમી ભરતી પર લાગી બ્રેક
મહારાજા સયાજીરાવ યુનિવર્સિટીમાં છેલ્લા 2 વર્ષમાં 10 પ્રોફેસરોએ વિવિધ કારણોસર કાયમી નોકરી છોડી દીધી છે. સૂત્રોના જણાવ્યા અનુસાર, આમાંથી મોટા ભાગના પ્રોફેસરો પ્રમોશન ન મળવાને કારણે નોકરી છોડીને ચાલ્યા ગયા છે. એમ.એસ યુનિવર્સિટીમાં વર્ષ 2020માં કાયમી ભરતી પર બ્રેક લાગ્યા બાદ પ્રમોશન નહીં મળી રહ્યું હોવાથી કાયમી અધ્યાપકો પણ નોકરી છોડીને જઈ રહ્યા છે. આસિસન્ટ અથવા એસોસિએટ પ્રોફેસર તરીકે ફરજ બજાવી રહેલા અધ્યાપકો અન્ય સરકારી યુનિવર્સિટીઓમાં બઢતી સાથે નોકરીની ઓફરો સ્વીકારી રહ્યા છે

10 કાયમી અધ્યાપકોએ છોડી નોકરી
અત્યાર સુધીમાં યુનિવર્સિટીના 10 કાયમી અધ્યાપકો નોકરી છોડીને બીજી યુનિવર્સિટીમાં પ્રોમોશનની સાથે નોકરીમાં જોડાયા છે. વડોદરાના એમ.એસ યુનિવર્સિટીના સાયન્સ વિભાગના 2 પ્રોફેસર અને કોમર્સ વિભાગના 2 પ્રોફેસર નોકરી છોડી ચૂક્યા છે. આ ઉપરાંત આર્ટ્સ, હોમસાયન્સના 1-1 પ્રોફેસરે પણ નોકરી છોડી દીધી છે. તો ટેક્નોલોજી ફેકલ્ટીના 4 કાયમી અધ્યાપકો અત્યાર સુધીમાં નોકરી છોડીને અન્ય યુનિવર્સિટીમાં ચાલ્યા ગયા છે. નોંધનીય છે કે, એમ.એસ યુનિવર્સિટીમાં વર્ષ 2020થી 580 પૈકીની મોટાભાગની જગ્યાઓ હજુ ખાલી છે.