ક્રાઈમ / અમદાવાદના વહુને મોબાઈલની સજા, સસરાએ ઝૂડીને અધમુઈ કરી, બચવા ફ્લોર પરથી જંપ માર્યો

• અમદાવાદના રાણીપની મહિલાને સસરાએ સખત માર માર્યો
• ના પાડતાં છતાંય રાખ્યો હતો મોબાઈલ
• સસરાનો માર સહન ન થતાં વહુ પહેલા માળેથી કૂદી પડી 

મોબાઈલના જમાનામાં મોબાઈલ રાખવાની સજા, સાંભળીને આંચકો લાગે તેવું છે પરંતુ સાચું છે. અમદાવાદના રાણીપમાં બનેલી એક ઘટનામાં મોબાઈલ રાખવાની ના પાડી હોવા છતાં પણ રાખતાં સસરાએ તેની વહુને સખત માર માર્યો હતો અને સસરાનો માર સહન ન થતાં વહુને પહેલા માળેથી કૂદી જવાની ફરજ પડી હતી. રાણીપ પોલીસ સ્ટેશનમાં મહિલાએ આ ઘટનાની ફરિયાદ નોંધાવી છે. 

સસરાએ વહુને મોબાઈલ વાપરવા દેવાની ના પાડી 
રાણીપની 28 વર્ષીય મહિલાએ શનિવારે પોલીસમાં ફરિયાદ નોંધાવી હતી કે, તેના સસરાએ મોબાઇલ રાખવા બાબતે તેના પર હુમલો કર્યો હતો. રાણીપના બલોલનગરની રહેવાસી વિજુ ભરવાડે રાણીપ પોલીસમાં નોંધાવેલી એફઆઇઆરમાં જણાવ્યું હતું કે, તે લોકોના ઘરના કામ કરીને પરિવારનું ગુજરાત ચલાવી રહી છે. તેના સસરા કાળુ ભરવાડ અને દિયર સેધા ભરવાડે તેમના ઘરની મહિલાઓને સેલફોનનો ઉપયોગ કરવા પર પ્રતિબંધ ફરમાવ્યો છે.

મહિલા કરે છે લોકોના ઘરના કામકાજ 
લગભગ આઠ મહિના પહેલા તેના એમ્પ્લોયરે તેને એક ફોન આપ્યો હતો. તેણે પોતાના સસરા અને દિયરથી સેલફોન સંતાડી દીધો હતો. 25 સપ્ટેમ્બરના રોજ સુરેન્દ્રનગર જતા પહેલા તેણે ફોન કબાટમાં રાખ્યો હતો. જ્યારે તે પાછી ફરી ત્યારે તેણે જોયું કે તેનો ફોન ચોરાઈ ગયો હતો. તેણે તેના એમ્પ્લોયરને આ વિશે જણાવ્યું, જેણે તેના નંબર પર ફોન કર્યો અને તેના દિયરે ફોન રિસીવ કર્યો. આ પછી વિજુ તેના ઘેર ગઈ અને સાસુ-સસરાને આ બાબતે પૂછતાં નારાજ થયેલા સસરાએ તેને ખૂબ માર માર્યો હતો. સસરાના મારથી બચવા મહિલાએ પહેલા ફ્લોર પરથી જંપ માર્યો હતો. 

રાણીપ પોલીસ સ્ટેશનમાં ફરીયાદ

સસરાના મારનો ભોગ બનેલી મહિલાએ રાણીપ પોલીસ સ્ટેશનમાં સસરા અને દિયર સામે ફરીયાદ નોંધાવી છે. આરોપીઓની ધરપકડ થવાની સંભાવના છે.