ચુકાદો / પતિને પરિવારથી અલગ પાડવાની પત્નીની જિદ માનસિક ક્રૂરતા ગણાશે, મળી શકે છુટાછેડા- HC

• ઘરેલુ હિંસા કેસમાં દિલ્હી હાઈકોર્ટનો ચુકાદો 
• પરિવારથી અલગ રહેવાની પત્નીની જિદને માનસિક ક્રૂરતા ગણાવી
• પતિના છૂટાછેડા મંજૂર રાખ્યાં 

ઘરેલુ હિંસાના એક કેસમાં દિલ્હી હાઈકોર્ટે એવો ચુકાદો આપ્યો છે કે કોઈ પણ યોગ્ય કારણ વિના પોતાના સાસરિયાઓથી અલગ રહેવાનો પત્નીનો "સતત આગ્રહ" તેના પતિ માટે "અત્યાચારી" અને ક્રૂર કૃત્ય સમાન છે.  જસ્ટિસ સુરેશ કુમાર કૈટ અને જસ્ટિસ નીના બંસલ કૃષ્ણાની બેન્ચે કહ્યું કે પશ્ચિમી દેશોની જેમ ભારતમાં પણ પુત્રનું પરિવારથી અલગ થવું સામાન્ય વાત નથી. સામાન્ય રીતે, કોઈ વ્યાજબી કારણ વિના, તેણીએ ક્યારેય એવો આગ્રહ ન રાખવો જોઈએ કે તેના પતિને પરિવારથી અલગ રાખવો જોઈએ અને તેની સાથે અલગ રહેવું જોઈએ.

પતિને પરિવારથી છૂટો ન પાડી શકાય 
આ કેસમાં પતિએ છૂટાછેડા આપવાનો ઈન્કાર કરતા ફેમિલી કોર્ટના આદેશને પડકાર્યો હતો. તેમણે હિન્દુ મેરેજ એક્ટ હેઠળ લગ્નવિચ્છેદની માંગ કરી હતી, જેમાં પત્ની એક "ઝઘડાખોર મહિલા" હતી, જે તેના સાસરિયાના ઘરના વડીલોને માન આપતી ન હતી અને આગ્રહ રાખતી હતી કે તે (પતિ) તેના માતાપિતાથી અલગ રહે. સામાન્ય રીતે, કોઈ પણ પતિ સહન કરી શકશે નહીં અને તેના માતાપિતા અને પરિવારના અન્ય સભ્યોથી અલગ રહેવાનું પસંદ કરશે નહીં. પ્રતિવાદી પત્ની દ્વારા અપીલ કરનારને પરિવારથી અલગ થવાની ફરજ પાડવાના સતત પ્રયત્નો પતિને ત્રાસ આપવા સમાન છે અને તે ક્રૂરતાનું કૃત્ય માનવામાં આવશે. 

સુપ્રીમ પણ કહી ચૂકી છે  માતા-પિતાથી અલગ રહેવું ઈચ્છનીય સંસ્કૃતિ નથી 
કોર્ટે જણાવ્યું હતું કે, "પ્રતિવાદી (પત્ની) અલગ રહેવાના આગ્રહ માટે કોઈ વાજબી કારણ આપ્યું નથી. એક જ તારણ કાઢી શકાય કે કુટુંબના અન્ય સભ્યોથી અલગ રહેવાનો આગ્રહ એ એમની મરજી હતી અને એનું કોઈ યોગ્ય કારણ પણ નહોતું. આવી સતત જીદ માત્ર ક્રૂરતાનું કૃત્ય કહી શકાય. ખંડપીઠે નોંધ્યું હતું કે, સુપ્રીમ કોર્ટે એક ચુકાદામાં ઠરાવ્યું છે કે, હિન્દુ પુત્ર પત્નીના કહેવાથી માતા-પિતાથી અલગ થાય તે ભારતમાં સામાન્ય પરંપરા કે ઇચ્છનીય સંસ્કૃતિ નથી.

વૃદ્ધ થાય ત્યારે માતાપિતાની સંભાળ પુત્રે રાખવી જોઈએ 
કોર્ટનું કહેવું છે કે પુત્રની નૈતિક અને કાનૂની જવાબદારી છે કે તે વૃદ્ધ થાય ત્યારે તેના માતાપિતાની સંભાળ રાખે અને તેનું ભરણપોષણ કરે અને જો તેની પત્ની સમાજમાં પ્રચલિત રૂઢિગત પ્રથાથી ભટકાવવાનો પ્રયાસ કરે છે, તો તેની પાસે તેના માટે વાજબી કારણ હોવું જોઈએ. "ભારતમાં, લોકો સામાન્ય રીતે પશ્ચિમી વિચારધારાને સમર્થન આપતા નથી જ્યાં પુત્ર લગ્ન અથવા પુખ્તવયે પરિવારથી અલગ થઈ જાય છે. સામાન્ય સંજોગોમાં પત્ની લગ્ન બાદ પતિના પરિવારનો હિસ્સો બને તેવી અપેક્ષા રાખવામાં આવે છે. ખંડપીઠે છૂટાછેડા આપતી વખતે કહ્યું હતું કે 2007થી બંને પક્ષો વચ્ચે વૈવાહિક સંબંધો નથી અને પત્નીએ નિવેદન આપ્યું હતું કે અપીલ કરનાર સાથે રહેવાનો તેનો કોઈ ઇરાદો નથી.