સલાહ / કોણ છે ઈંદ્રા ચૌધરી ગઠાલા? જેમનો Video 9 લોકોના જીવ ગુમાવ્યાની ઘટના બાદ થઈ રહ્યો છે વાયરલ

• બેફામ ગાડી ડ્રાઈવ કરતા લોકોને સલાહ આપતો વીડિયો વાયરલ
• 'શક્તિ બતાવવી હોય તો તમે મિલ્ખા સિંહની જેમ બતાવો'
• વીડિયો સીકરના જિલ્લા ભાજપ પ્રમુખ ઈંદ્રા ચૌધરીનો હોવાની વિગતો

આપણે અવાર નવાર રાજકારણીના આરોપ પ્રતિઆરોપ તેમજ કટાક્ષના ઘણા બધા વાયરલ વીડિયો જોયા છે તેમજ સાંભળ્યા છે. પરંતુ સમાજહિત માટે સારો સંદેશો આપતા વીડિયો ઘણા ઓછા સામે આવાતા હોય છે. રાજસ્થાનની એક મહિલા રાજકારણીનો વીડિયો સોશિયલ મીડિયા પર ખૂબ જ વાયરલ થઈ રહ્યો છે. આ વીડિયોમાં તેઓ બેફામ ગાડી ડ્રાઈવ કરતા લોકોને સલાહ આપી રહ્યા છે.

'ઉછેરવામાં 25 વર્ષ અને 25 સેકન્ડમાં લાશમાં ફેરવાઈ જાય'
વાયરલ વીડિયો ઈંદ્રા ચૌધરી ગઠાલાનો છે જે સીકરના જિલ્લા ભાજપ પ્રમુખ છે. તેઓ વીડિયોમાં કહી રહ્યાં છે કે, બાળકને ઉછેરવામાં 25 વર્ષ લાગે છે પરંતુ બેદરકારી ભરી ડ્રાઇવિંગના કારણે માત્ર 25 સેકન્ડમાં તે લાશમાં ફેરવાઈ જાય છે. તેઓ જણાવી રહી છે કે, એ માતા પર શુ વીતતી હશે જે જતા પુત્રની પીઠ જુએ છે અને આવતા પુત્રનો ચહેરો જોઈ શકતી નથી.
 
'ઝડપી કાર ચલાવતા હેન્ડસમ નહી મૂર્ખ દેખાયો છો'
તેઓ કહે છે કે, જો તમારે તમારી શક્તિ બતાવવી હોય તો તમે મિલ્ખા સિંહની જેમ ઝડપી દોડો અથવા નીરજ ચોપરા, દેવેન્દ્ર ઝાઝડિયાની જેમ ફાલા ફેંકો. વધુમાં કહે છે કે, બાઇકના કાન મરોડવામાં કે હાઇ સ્પીડમાં કાર ચલાવવામાં બહાદુરી નથી અને જો તમને લાગતું હોય કે તમે ઝડપી કાર ચલાવતા ખૂબ જ હેન્ડસમ અથવા જોરદાર દેખાશો તો તમે હેન્ડસમ દેખાતા નથી પરંતુ તમે બેદરકાર, મૂર્ખ દેખાઓ છો. જે માટે ઝડપી વાહન ન ચલાવો અને તમારી જિદંગી એ તમારા માતા પિતાની છે.

કોણ છે ઇંદ્રા ચૌધરી
રાજસ્થાનના સીકર જિલ્લાના રહેવાસી છે ઇંદ્રા ચૌધરી. તેમજ તેઓ ભારતીય જનતા પાર્ટી સાથે જોડાયેલા છે અને સિકર જિલ્લા ભાજપ પ્રમુખ છે. ઇંદ્રા અગાઉ કન્ઝ્યુમર કોર્ટમાં વકીલ રહી ચૂક્યા છે. તેઓ વર્તમાનમાં સામાજિક સમસ્યાઓને લઈને સક્રિય રહે છે. અમદાવાદના ઈસ્કોન બ્રિજ પરના અકસ્માત બાદ તેમનો આ વીડિયો ક્લિપ્સ ફેસબુક, યુટ્યુબ, ટ્વિટર પર જોરદાર વાયરલ થઈ રહી છે.

વીડિયો 2021નો હોવાની માહિતી
આ વીડિયો સપ્ટેમ્બર 2021નો હોવાની માહિતી છે. સીકર જિલ્લાના સાંગલિયાના વીર તેજા મંદિરમાં ભજન સંધ્યાનું આયોજન કરવામાં આવ્યું હતું. ત્યારે ભાજપના જિલ્લા પ્રમુખ ઇંદ્રા ચૌધરીએ ભાષણ દરમિયાન કહ્યું હતું કે, યુવાનો નશાની લતને એક પ્રકારની ફેશન સમજે છે પરંતુ યુવાનોએ દારૂ અને અન્ય નશાથી દૂર રહીને દેશ માટે પોતાની શક્તિનો ઉપયોગ કરવો જોઈએ.