- જાણો 2024માં મકરસંક્રાંતિ ક્યારે ઊજવવામાં આવશે?
- ઉત્તરાયણનાં દિવસનું હિંદૂ ધર્મમાં ખાસ મહત્વ છે
- મકરસંક્રાંતિનાં દિવસે આ ચીજોનું દાન કરવું જોઈએ
હિંદૂ ધર્મમાં મકરસંક્રાંતિ તહેવારનું વિશેષ મહત્વ છે. આ દિવસે ગંગા સ્નાન અને દાન કરવાની માન્યતા હોય છે. દરવર્ષે કુલ 12 જેટલી સંક્રાંતિ ઊજવવામાં આવે છે પણ મકરસંક્રાંતિનું ખાસ મહત્વ હોય છે. કારણકે આ દિવસે સૂર્ય ધનુ રાશિથી નિકળીને મકર રાશિમાં સંચાર કરે છે. તેથી આ તહેવારને મકરસંક્રાંતિ તરીકે ઓળખવામાં આવે છે. સામાન્યરીતે આપણાં દેશમાં 14મી જાન્યુઆરીનાં રોજ મકરસંક્રાંતિ ઊજવવામાં આવે છે પણ શું તમે જાણો છો કે આ વખતે મકરસંક્રાંતિની સાચી તારીખ અને તિથિ શું છે?
મકરસંક્રાંતિની તારીખ અને તેનું મહત્વ
2024માં મકરસંક્રાંતિ 15 જાન્યુઆરીનાં રોજ સોમવારનાં દિવસે ઊજવવામાં આવશે. આ દિવસે સૂર્ય મકરરાશિમાં પ્રવેશ કરશે. એવી માન્યતા છે કે આ દિવસે સ્વર્ગનાં દ્વાર ખુલે છે. તેથી ભીષ્મ પિતામહે પોતાને બાણ લાગ્યા બાદ પણ પ્રાણ ત્યાગવા માટે ઉત્તરાયણનો દિવસ પસંદ કર્યો હતો. જેથી મોક્ષ મળી શકે. સાથે જ શાસ્ત્રોમાં જણાવવામાં આવ્યું છે કે આ દિવસે ગંગા સ્નાન કરવાથી સાત જન્મોનાં પાપ પણ ધોવાઈ જાય છે.
વાંચવા જેવું: નવા વર્ષના પહેલા જ દિવસે લવિંગથી કરો આ ખાસ ઉપાય: આખું વર્ષ ખાલી નહીં થાય ખિસ્સું, વધશે પૈસાની આવક
મકરસંક્રાંતિને દેશનાં અલગ-અલગ વિસ્તારમાં અલગ-અલગ નામે ઓળખવામાં આવે છે. ઉત્તરાયણ, પોંગલ, મકરવિલક્કુ, માઘ અને બિહુ. શાસ્ત્ર અનુસાર આ દિવસે પવિત્ર નદીમાં સ્નાન અને દાન-પુણ્ય કરવાથી વ્યક્તિને ક્યારેય પણ સમાપ્ત ન થાય તેવું પુણ્ય મળે છે.
મકરસંક્રાંતિનાં દિવસે આ ચીજોનું દાન કરો
મકરસંક્રાંતિનાં દિવસે તલ, ચપ્પલ, અન્ન, વસ્ત્ર, ધાબળું વગેરે ચીજોનું દાન કરવાથી વ્યક્તિને શનિદેવ અને સૂર્યદેવની કૃપા મળે છે. માન્યતા અનુસાર આ દિવસે તમે જે પણ દાન કરો છો એ સીધું ભગવાનને અર્પિત થાય છે. તેથી આ દિવસે ખાસ દાન કરવું જોઈએ.
