- રિટાયરમેન્ટને સિક્યોર કરવા અટલ પેન્શન યોજનામાં રોકાણ કરી શકો
- 60 વર્ષની ઉંમર બાદ દર મહિને મળશે 5000 રૂપિયા પેન્શન
- દર મહિને ફક્ત 210 રુપિયાનું એટલે કે દરરોજ 7 રૂપિયાનું રોકાણ કરો
રિટાયરમેન્ટ પછી શું? વૃદ્ધાવસ્થાના ખર્ચાની ચિંતા દરેકને હોય છે. જો તમે પણ પોતાના રિટાયરમેન્ટને સિક્યોર કરવા માટે સુરક્ષિત રોકાણ કરવાનો પ્લાન બનાવી રહ્યા છો તો સરકારની અટલ પેન્શન યોજનામાં (Atal Pension Yojana- APY) રોકાણ કરી શકો છો.
સરકારની સ્મોલ સેવિંગ સ્કીમ અટલ પેન્શન યોજના ખૂબ જ લોકપ્રિય છે. આ યોજના હેઠળ નાની રોકાણ યોજના પર તમે ગેરન્ટીડ પેન્શન મેળવી શકો છો. 5000 રુપિયા મહિનાની પેન્શન મેળવવા માટે તમારે દર મહિને પોતાની કમાણીમાંથી ફક્ત 210 રુપિયાનું એટલે કે દરરોજ 7 રૂપિયાનું રોકાણ આ સ્કીમમાં કરવાનું રહેશે.
તમારા પેન્શનની ખાતરી
જો તમે વૃદ્ધાવસ્થામાં કોઈના પર આર્થિક રીતે નિર્ભર રહેવા માંગતા નથી, તો હવેથી જ અટલ પેન્શન યોજનામાં રોકાણ કરવાનું શરૂ કરો. APY યોજના સરકારની એક મહાન યોજના છે. જો તમે આ યોજનામાં રોકાણ કરો છો, તો તમારા પેન્શનની ખાતરી આપવામાં આવે છે. આ સ્કીમમાં રોકાણ કર્યા પછી તમને ન્યૂનતમ 1,000, 2000, 3000, 4000 અને વધુમાં વધુ 5,000 પેન્શન મળે છે.
કોણ રોકાણ કરી શકે છે?
અટલ પેન્શન યોજનાની શરૂઆત વર્ષ 2015માં થઈ હતી. તે સમયે આ યોજના અસંગઠિત ક્ષેત્રોમાં કામ કરતા લોકો માટે શરૂ કરવામાં આવી હતી. પરંતુ હવે 18થી 4 વર્ષના કોઈ પણ ભારતીય નાગરિક આ યોજનામાં રોકાણ કરી પેન્શનનો લાભ લઈ શકે છે. જેમની પાસે બેન્ક અથવા પોસ્ટ ઓફિસમાં એકાઉન્ટ છે તે તેમાં સરળતાથી રોકાણ કરી શકે છે. આ યોજનામાં 60 વર્ષ બાદ જમાકર્તાઓને પેન્શન મળવાનું શરૂ થઈ જાય છે.
5,000 રૂપિયા પેન્શન મેળવવા માટે દર મહિને 210 રૂપિયાનું રોકાણ
જો કોઈ વ્યક્તિ 18 વર્ષની ઉંમરથી આ સ્કીમમાં રોકાણ કરવાનું શરૂ કરે છે, તો 60 વર્ષ પછી તેને દર મહિને 5,000 રૂપિયા પેન્શન મેળવવા માટે દર મહિને 210 રૂપિયા જમા કરાવવા પડશે. જ્યારે માત્ર 1000 રૂપિયાનું માસિક પેન્શન મેળવવા માટે તમારે 42 રૂપિયા, 2000 રૂપિયાનું માસિક પેન્શન મેળવવા માટે 84 રૂપિયા, રૂપિયા 3000 મેળવવા માટે 126 રૂપિયા અને 4000 રૂપિયાના પેન્શન માટે 168 રૂપિયા પ્રતિ મહિના જમા કરાવવા પડશે.
કરમુક્તિ સહિતની આ સુવિધાઓ
અટલ પેન્શન યોજનાની વિશેષતા એ છે કે તમે જેટલી નાની ઉંમરે તેમાં રોકાણ કરવાનું શરૂ કરશો તેટલા જ વધુ લાભ તમને મળશે. નિયમો અનુસાર 18 વર્ષથી 40 વર્ષની વય વચ્ચેનો કોઈપણ ભારતીય નાગરિક (આવકદાતા સિવાય) સરકારની આ પેન્શન યોજનામાં જોડાઈ શકે છે. 60 વર્ષની ઉંમર પછી તેને રૂ.1000 થી રૂ.5000 સુધીનું પેન્શન મળી શકે છે. આ સિવાય તેમાં જમા રકમ ગમે ત્યારે બદલી શકાય છે. એટલે કે તમે તમારી અનુકૂળતા મુજબ વધારો કે ઘટાડો કરી શકો છો. આવકવેરા અધિનિયમ 80C હેઠળ અટલ પેન્શન યોજના (APY) માં રોકાણ પર 1.5 લાખ રૂપિયા સુધીના કર લાભોની સુવિધા પણ છે.
અટલ પેન્શન યોજના 2015 માં શરૂ કરવામાં આવી
ભારત સરકારે 2015-16 માં અટલ પેન્શન યોજના શરૂ કરી હતી. મુખ્યત્વે તે લોકો આ યોજનાનો લાભ લઈ શકશે, જેઓ કોઈપણ પ્રકારની સરકારી પેન્શનનો લાભ લઈ શકતા નથી. 18 થી 40 વર્ષના લોકો આ યોજનાઓનો લાભ લઈ શકે છે. આમાં લાભાર્થી દ્વારા જમા કરાયેલા રોકાણ અને વયના આધારે પેન્શનની રકમ નક્કી કરવામાં આવે છે. આ યોજનાની બીજી મોટી વિશેષતા એ છે કે આ યોજના ગ્રાહકના મૃત્યુ પછી પણ પરિવારને લાભ આપતી રહેશે. જો રોકાણકારનું મૃત્યુ થાય છે, તો તેના નોમિનીને સ્કીમનો લાભ મળે છે.
NPS યોજના પણ એક નફાકારક સોદો
રાષ્ટ્રીય પેન્શન યોજના સીધી સરકાર સાથે જોડાયેલી છે અને આ યોજનામાં તમે દર મહિને 6000 રૂપિયાનું રોકાણ કરીને 60 વર્ષની ઉંમર પછી 50,000 રૂપિયાનું પેન્શન મેળવી શકો છો. એટલે કે, તમારે દરરોજ 200 રૂપિયાની બચત કરીને આ સ્કીમમાં રોકાણ કરવું પડશે. આ સ્કીમમાં રોકાણ કરનાર વ્યક્તિને ઈન્કમ ટેક્સમાં પણ છૂટ મળે છે. NPSમાં રોકાણકારને 80C હેઠળ મુક્તિ તેમજ 80 CCD હેઠળ રૂ. 50,000 સુધીની વધારાની આવકવેરા મુક્તિ મળે છે.
