શું કરવું ? / કર્મચારીઓની નોકરીને લાગ્યું ગ્રહણ, વોલ્ટ ડિઝની આગામી સપ્તાહથી 25 ટકા કર્મીની છટણી શરૂ કરશે

• વોલ્ટ ડિઝની 25 ટકા કર્મચારીઓને કરશે છુટા
• ટીવી, ફિલ્મ, થીમ પાર્કમાં  કામ કરતા લોકોને અસર કરશે
• 7000 કર્મચારીઓની છટણી કરવામાં આવે તેવી શક્યતા

મનોરંજન ઉદ્યોગમાં પણ છટણી મોટા પ્રમાણમાં થઈ રહી છે. વોલ્ટ ડિઝનીમાં છટણીની પ્રક્રિયા અટકી રહી નથી. કંપની ફરીથી આવતા અઠવાડિયે વિવિધ ટીમોમાંથી તેના 25 ટકા કર્મચારીઓને છૂટા કરવાની યોજના બનાવી રહી છે. કંપની એન્ટરટેઇન્મેન્ટ વિભાગમાંથી પણ મોટા પાયે કર્મચારીઓની છટણી કરવા જઈ રહી છે. એક અહેવાલ મુજબ, આ છટણી ટીવી, ફિલ્મ, થીમ પાર્ક અને કોર્પોરેટ પદ પર કામ કરતા લોકોને પણ અસર કરશે. કંપનીએ તે તમામ કર્મચારીઓની યાદી તૈયાર કરી છે, પરંતુ હજુ સુધી તેમનાં નામ જાહેર કર્યાં નથી. રિપોર્ટ અનુસાર, ડિઝની ૨૪ એપ્રિલ સુધી પ્રભાવિત કર્મચારીઓને જાણ કરશે.

કંપનીની તેના કુલ ખર્ચમાં 5.5 બિલિયન ડોલરનો ઘટાડો કરવાની યોજના

ડિઝનીએ ફેબ્રુઆરીમાં જ જાહેરાત કરી હતી કે તે 7000 કર્મચારીઓની છટણી કરશે. નોંધપાત્ર વાત એ છે કે કંપનીમાં કુલ કર્મચારીઓની સંખ્યા 2,20,000 છે. આવી સ્થિતિમાં તે 7,000 કર્મચારીઓની છટણી કરીને કંપની તેના કુલ ખર્ચમાં 5.5 બિલિયન ડોલરનો ઘટાડો કરવાની યોજના બનાવી રહી છે. ઉલ્લેખનીય છે કે તાજેતરના ભૂતકાળમાં ડિઝનીની આવકમાં ઘટાડો નોંધવામાં આવ્યો છે. નવેમ્બર ૨૦૨૨માં કંપનીને કુલ ૧.૪૭ બિલિયન ડોલરનું નુકસાન થયું હતું. ત્યારથી તેના મુખ્ય કાર્યકારી અધિકારી બોબ ઇગરે કંપનીમાં મોટા પાયે છટણી કરવાની યોજના બનાવી હતી. ડિઝની ઉપરાંત Comcast Corp, NBCUniversal, Warner Bros Discovery Inc અને Paramount Global એ તાજેતરમાં ખર્ચ ઘટાડવાનો નિર્ણય લીધો છે.

મોટી મોટી કંપનીઓએ ખર્ચ ઘટાડવા માટે કર્મચારીઓની છટણી કરી 

ડિઝની સિવાય વિશ્વની દિગ્ગજ લીગલ ફર્મ ઇવાય (અર્નેસ્ટ એન્ડ યંગ) ફર્મ ફરી એકવાર કર્મચારીઓની છટણી કરવાનો નિર્ણય લીધો છે. કંપની તેના કુલ કર્મચારીઓના પાંચ ટકા કર્મચારીઓની છટણી કરવા જઈ રહી છે. આમાં લગભગ 3000 લોકોને અસર થશે. કંપની આ છટણી અમેરિકામાં કરવા જઈ રહી છે. અર્ન્સ્ટ એન્ડ યંગ, ડિઝની જેવી કંપનીઓ ઉપરાંત મેટા, ગૂગલ, એમેઝોન, માઈક્રોસોફ્ટ વગેરે જેવી ઘણી મોટી કંપનીઓએ તેમના ખર્ચ ઘટાડવા માટે કર્મચારીઓની છટણી કરી છે.