કોણ જવાબદાર? / ગુજરાતમાં આજે એકસાથે 4-4 જગ્યાએ દિવાલ ધરાશાયી, એકનું મોત, 8 લોકો ઇજાગ્રસ્ત

• સુરત સચિન GIDCમાં દિવાલ ધરાશાયી
• વંથલી કન્યા વિદ્યાલયની છત ધરાશાયી
• મહીસાગર જિલ્લામાં વરસાદે મચાવી તબાહી
• ખેડામાં વરસાદને લઈ સંરક્ષણ દિવાલ ધરાશાયી

ચાલુ ચોમાસાની સિઝનમાં મેઘરાજાએ સમગ્ર ગુજરાતમાં ભારે હેત વરસાવ્યું છે. વરસાદની સિઝનમાં મકાન ધરાશાયી થવાનો સિલસિલો ચાલું છે. આજના દિવસમાં મકાનોની દિવાલ, શાળાની છત, ફેક્ટરીની દિવાલ, સંરક્ષણ દિવાલ ધરાશાયી થવાની 4 ઘટનાઓ સામે આવી છે. જેમાં એક વ્યક્તિનું મૃત્યુ નીપજ્યું છે, જ્યારે 8 લોકો ઈજાગ્રસ્ત થયા છે. સુરતના સચિન જીઆઇડીસી વિસ્તારમાં કન્સ્ટ્રક્શન સાઇટની દિવાલ ધરાશાયી થતાં એક શ્રમિકનું મૃત્યુ નીપજ્યું છે. જ્યારે 3 લોકો ઈજાગ્રસ્ત થયા છે. 

સચિન GIDCમાં દિવાલ ધરાશાયી થતા એકનું મોત
સુરતના સચિન જીઆઇડીસી વિસ્તારમાં કન્સ્ટ્રક્શન સાઇટ ઉપર સેન્ટિંગનું કામ કરી રહેલા કામદારો પર એકાએક દિવાલ તૂટી પડતા ભાગદોડ મચી ગઇ હતી. જ્યાં ઘટના સ્થળે પહોંચેલી ફાયર વિભાગની ટીમે તાત્કાલિક ચાર કામદારોનું રેસ્ક્યુ કર્યું હતું અને તમામને સારવાર અર્થે સુરત નવી સિવિલ અને ખાનગી હોસ્પિટલ ખાતે ખસેડવામાં આવ્યા હતા. જ્યાં એક કામદારનું મોત નિપજ્યું છે. જ્યારે અન્ય બે શ્રમિકોની હાલત સુધારા પર છે, તો અન્ય એક કામદારની હાલત ગંભીર હોવાનું જાણવા મળે છે. આ ઘટના અંગે સચિન GIDC પોલીસ દ્વારા આ મામલે અકસ્માત મોત નોંધી તપાસ હાથ ધરવામાં આવી છે.

વંથલી કન્યા વિદ્યાલયની છત ધરાશાયી થઈ
જૂનાગઢની વંથલી કન્યા વિદ્યાલયની જર્જરિત છત ધરાશાયી થતાં અફરાતફરીનો માહોલ સર્જાયો હતો. આ દુર્ઘટનામાં સ્કૂલની 4થી 5 વિદ્યાર્થિનીઓ ઈજાગ્રસ્ત થઈ હતી. જેથી તેઓને તાત્કાલિક સારવાર અર્થે વંથલી સિવિલ હોસ્પિટલ ખાતે ખસેડાઈ હતી. આ અંગેની જાણ થતાની સાથે જ વિદ્યાર્થિનીઓના વાલીઓ હોસ્પિટલ ખાતે દોડી આવ્યા હતા. આ દુર્ઘટના બાદ સ્કૂલની તમામ વિદ્યાર્થિનીઓ અને શિક્ષકોમાં ભયનો માહોલ જોવા મળી રહ્યો છે. તો બીજી બાજુ વિદ્યાર્થિનીઓની સુરક્ષા સામે પણ સવાલ ઉભા થયા છે. 

મહીસાગર જિલ્લામાં 4 મકાનની દિવાલ ધરાશાયી 
મહીસાગર જિલ્લામાંથી એક સાથે 4 મકાનની દિવાલ ધરાશાયી થઈ છે. જોકે, સદનસીબે દુર્ઘટનામાં કોઈ જાનહાનિ થઈ નથી. મળતી માહિતી અનુસાર, મહીસાગર જિલ્લામાં વરસાદે તબાહી મચાવી છે. જિલ્લાના ખાનપુર, બાલાસિનોર તાલુકામાં 4 મકાનની દિવાલ ધરાશાયી થઈ હતી. બાલાસિનોરના સુતરીયા, માળના મુવાડા ગામે મકાનની દિવાલ ધરાશાયી થઈ હતી જ્યારે ખાનપુરના ગાંધીયાના મુવાડા ગામે 2 મકાનની દિવાલ ધરાશાયી થઈ હતી. જે બાદ ગ્રામજનો દ્વારા કાટમાળમાં ફસાયેલા લોકોને બચાવી લેવામાં આવ્યા હતા. આ દુર્ઘટનામાં કોઈ જાનહાનીના સમાચાર નથી. 

ખેડામાં સંરક્ષણ દિવાલ ધરાશાયી
ખેડામાં ધોધમાર વરસાદ પડતા મુખ્યમંત્રી શહેરી વિકાસ યોજના અંતર્ગત આશરે રૂપિયા 2.62 કરોડના ખર્ચે બનાવવામાં આવેલી દિવાલ ધરાશાયી થઈ છે. નિલકંઠ મહાદેવ નજીક લકુમ્બા તળાવ કિનારે બનાવવામાં આવેલી દિવાલનું ભારે વરસાદને લઈને ધોવાણ થયું છે.