નિર્ણય / VTVની ખબર પર સરકારની મહોર: આયાતી કોલસા આધારિત વીજ મથકોના ટેરીફનો ઠરાવ રદ્દ

• પાવર કંપનીઓને વધુ ટેરીફ વસુલવાની મંજૂરી રદ્દ
• VTVની ખબર પર સરકારની મહોર
• સરકારે અગાઉ વધુ ટેરીફ માટે આપી હતી છૂટ 

વર્ષ 2018માં ગુજરાત સરકારે પાવર કંપનીઓને ઊંચા ટેરીફની મંજૂરી આપી હતી. જોકે આ મંજૂરીને સરકારે પાછી ખેંચી લીધી છે. જેને લઇને ગુજરાતમાં અદાણી, ટાટા અને એસ્સાર કંપનીને જોરદાર ઝટકો લાગ્યો છે. મહત્વનું છે કે, આ અંગે રાજ્ય સરકારની જાહેરાત પહેલા જ vtvgujarati.com દ્વારા આ અંગે શક્યતાઓ દર્શાવવામાં આવી હતી. ત્યારે હવે vtvgujarati.comની ખબર પર સરકારે મહોર લગાવી છે. 

રાજ્ય સરકાર દ્વારા રાજયમાં સ્થિત આયાતી કોલસા આધારિત પાવર પ્રોજેકટ્સના પ્રશ્નોના નિરાકરણ અન્વયે, વિશાળ જાહેર હિતને લક્ષમાં રાખીને આર.કે. અગ્રવાલ (રીટાયર્ડ સુપ્રીમ કોર્ટ જસ્ટીસ)ની અધ્યક્ષતામાં હાઈ પાવર કમિટી (High Power Committee - HPC)ની રચના કરવામાં આવી હતી. હાઇ પાવર કમિટીની ભલામણો તથા તેના ઉપર લીધેલ નિર્ણયોને મંત્રીમંડળ સમક્ષ રજુ કર્યા બાદ મંજૂરી આપવામાં આવી હતી. રાજ્ય સરકાર દ્વારા  1 ડિસેમ્બર 2018ના નીતિ વિષયક નિર્ણય થકી HPCની ભલામણોને સ્વીકારવામાં આવી હતી.

તારીખ 1 ડિસેમ્બર 2018નાં ઠરાવનો મૂળભૂત ઉદ્દેશ 4805 મે.વો. જેટલો વીજ પુરવઠો ગ્રાહકોને વ્યાજબી ભાવે ઉપલબ્ધ કરાવી વીજ ગ્રાહકોના હિતોનું રક્ષણ કરવાનો હતો. વધુમાં, ઈન્ડોનેશીયામાં કોલસાનાં માર્કેટનાં ટ્રેન્ડ અને બદલાયેલ પરિસ્થિતિમાં જાહેર હિતનું સંપૂર્ણપણે રક્ષણ થાય તે હેતુને ધ્યાને લઇને રાજ્ય સરકાર દ્વારા તારીખ 1 ડિસેમ્બર 2018ના ઠરાવને તેના તમામ ઉદ્દેશો અને હેતુઓ હાંસલ ન થતા હોવાથી રદ્દ (revoke) કરવામાં આવ્યો છે. ત્યારે હવે આયાતી કોલસા આધારિત વીજ મથકોના ટેરીફ અંગે ભવિષ્યમાં ગ્રાહકોના હિતને ધ્યાનમાં રાખીને યોગ્ય નિર્ણય લેવામાં આવશે.