રિલોન્ચ / વડોદરામાં જન જાગૃતિના અભાવે અટકી પડેલા ઈ-વેસ્ટ કલેક્શન પ્રોજેક્ટને ફરી વખત શરૂ કરાશે, કેન્દ્ર સરકારે રિપોર્ટ માંગતા રેલો

• તંત્રના આયોજનનો E-WASTE 
• E-WASTE કલેક્શન પ્રોજેક્ટ મરણપથારીએ
• અધિકારીઓના પ્રોજેક્ટને રિલોન્ચ કરવાના દાવા

એક સમયે ઈ-વેસ્ટ કલેક્શનમાં દેશને રાહ ચીંધનાર વડોદરા કોર્પોરેશનનો ઈ-વેસ્ટ કલેક્શન પ્રોજેક્ટ જનજાગૃતિના અભાવે મરણપથારીએ પડ્યો છે. કેન્દ્ર સરકાર દ્વારા અવોર્ડ વિજેતા પ્રોજેક્ટ અંગે માહિતી માગવામાં આવી છે. પરંતુ આ VMCનો આ પ્રોજેક્ટ ઠપ્પ પડ્યો હોવાથી કોર્પોરેશન ફરીવાર આ પ્રોજેક્ટને રિલોન્ચ કરશે. 

VMC ફરીવાર આ પ્રોજેક્ટને રીલોન્ચ કરશે..!
અત્રે ઉલ્લેખનીય છે કે, VMCના આ પ્રોજેક્ટની શરૂઆત 16 ફેબ્રુઆરી 2014ના રોજ થઈ હતી. પરંતુ આ પ્રોજેક્ટ શરૂ થયા બાદ એમાં તબક્કાવાર ઘટાડો નોંધાઈ રહ્યો છે. ટેલીવિઝન, ફ્રીજ,એસી, મોબાઈલ સહિતનો વેસ્ટ એજન્સી દ્વારા કલેક્ટ કરાવાની યોજના હતી. જેને રિયાકલ પણ કરવામાં આવતુ હતુ. પરંતુ આ પ્રોજેક્ટ હાલમાં મરણપથારીએ પડ્યો છે. વર્ષ 2021માં કોર્પોરેશનને ઈ-વેસ્ટ કલેક્શન પેટે માત્ર રૂપિયા 30,700 મળ્યા હતા. ત્યાર બાદ એકપણ રૂપિયાની આવક થઈ નથી. હવે જ્યારે કેન્દ્ર દ્વારા આ પ્રોજેક્ટની માહિતી માગવામાં આવી છે ત્યારે VMC ફરીવાર આ પ્રોજેક્ટને રીલોન્ચ કરવાનુ જણાવી રહી છે.

શું હતું આયોજન?
ઇ-વેસ્ટ કલેક્શનમાં વડોદરાએ સમગ્ર દેશમાં આગવી પહેલ શરૂ કરી હતી, જેમાં કોમ્પ્યુટર, મોબાઈલ, ટી.વી., સહિત વિવિધ ઇલેક્ટ્રોનિક્સ આઇટમ ખરાબ થઈ ગઈ હોય તો એને જ્યાં-ત્યાં રસ્તા પર કે જાહેર જગ્યાએ ફેંકવાના બદલે કોર્પોરેશનની નિયત કરેલી એજન્સીને આ કચરો સુપરત કરી શકાય. આ માટે કોર્પોરેશને ટોલ ફ્રી નંબર પર થી ઈ-વેસ્ટ કલેકશન પછી એના નિકાલમાં ગુજરાત પોલ્યુશન કંટ્રોલ બોર્ડ (GPCB)ના નિયમોનું સંપૂર્ણ પાલન કરવામાં આવે છે. એટલું જ નહીં, ઇ-વેસ્ટ કલેક્શનમાંથી કેટલીક વસ્તુ જે રિસાઇકલ કરી કામમાં લઈ શકાય તથા અન્ય સામગ્રી પેટે ઇ-વેસ્ટ ઘરે ઘરેથી ભેગું કરતી એજન્સી કુલ રકમના 12 ટકા કોર્પોરેશનને ચૂકવે છે.

કેમ આવકમાં ધરખમ ઘટાડો નોંધાયો?
શરૂઆતના સમયમાં વર્ષમાં હોંશે હોંશે આ પ્રોજેક્ટ ની સતાધીશો જાહેરાત કરતા હતા.જેના લીધે કોર્પોરેશનને નોંધપાત્ર આવક થતી હતી, પરંતુ કોરોના બાદ ઈ-વેસ્ટ કલેકશનની આવક અત્યંત ઓછી થઈ ગઈ છે. એક તરફ ઇલેક્ટ્રોનિક વસ્તુઓનો ઉપયોગ વધી રહ્યો છે, તેથી ઉપકરણો પણ બદલાઈ રહ્યા છે, ત્યારે ઈ-વેસ્ટ કલેક્શનની અસરકારક કામગીરી થાય તો કોર્પોરેશનને એનાથી બહોળી આવક થાય તેવી પણ શક્યતાઓ છે...

વડોદરાને ઇ વેસ્ટ માટે રાષ્ટ્રીય કક્ષાનો ગોલ્ડન અવૉર્ડ મળ્યો
અને એવી જ રીતે કોર્પોરેશનને ઇ-ઈન્ડિયા અવોર્ડ પણ પ્રાપ્ત થયો હતો. તમામ ઉપલબ્ધિઓ વચ્ચે વડોદરા કોર્પોરેશન ઇ-વેસ્ટ કલેક્શન તથા તેના કચરાના નિકાલમાં છેલ્લા કેટલાક સમયથી કામગીરી માં નીરસતા દાખવી રહી છે તે પણ સાબિત થાય છે