- દુનિયાની કાયાપલટ કરી નાખનારી પહેલ
- આફ્રિકી દેશ ઝામ્બિયાએ કરી અનોખી પહેલ
- ઝામ્બિયાની કંપનીએ કચરામાંથી બનાવી રહી છે પેટ્રોલ અને ડીઝલ
ક્રુડ ઓઈલમાંથી પેટ્રોલ અને ડીઝલ બનાવાય છે તેવી તો બધાને ખબર છે પરંતુ હવે દુનિયામાં એક દેશે તો કચરામાંથી ઈંધણ તૈયાર કરવાનું શરુ કરી દીધું છે. દક્ષિણી આફ્રિકી દેશ ઝામ્બિયામાં પાયલોટ પ્રોજેક્ટ તરીકે કચરામાંથી પેટ્રોલ અને ડીઝલનું ઉત્પાદન કરવામાં આવી રહ્યું છે. ભારત જેવા દેશમાં જ્યાં પ્લાસ્ટિકનો કચરો ખૂબ જ હોય છે ત્યાં આ ફોર્મ્યુલાથી સરળતાથી પેટ્રોલ અને ડીઝલ તૈયાર કરી શકાય છે.
કચરામાંથી દરરોજ 600થી 700 લિટર પેટ્રોલ બનાવાય છે
ઝામ્બિયાની સેન્ટ્રલ આફ્રિકન રિન્યુએબલ એનર્જી કોર્પોરેશન કચરા, જૂના ટાયર અને પ્લાસ્ટિકના કન્ટેનરમાંથી દરરોજ 600થી 700 લિટર પેટ્રોલ તૈયાર કરીને ઓઈલ માર્કેટિંગ કંપનીઓને આપી રહી છે. કંપનીનું લક્ષ્ય દેશમાં પેટ્રોલ અને ડીઝલની આયાત ઘટાડવાનું છે. જામ્બિયામાં પાયલોટ પ્રોજેક્ટ તરીકે કચરામાંથી પેટ્રોલ અને ડીઝલનું ઉત્પાદન કરવામાં આવી રહ્યું છે. આ પહેલમાં પેટ્રોલ-ડીઝલની આયાતમાં ઘટાડો થશે અને દેશમાં પ્લાસ્ટિક અને રબરના કચરામાં ઘટાડો થશે.
આવી રીતે બનાવે છે પેટ્રોલ
કંપનીએ કચરા, જૂના ટાયર અને પ્લાસ્ટિકના કન્ટેનરમાંથી કેવી રીતે પેટ્રોલ બનાવે છે તેનો પણ ખુલાસો કર્યો છે. રબરના ટાયર અને પ્લાસ્ટિકના ડબ્બાઓને કાપીને મોટી ભઠ્ઠીમાં મુકવામાં આવે છે. ઊંચા તાપમાને તેને રિએક્ટરમાં સળગાવવામાં આવે છે અને પેટ્રોલ ઇંધણનું ઉત્પાદન કરવા માટે કેટલાક ઉદ્દીપકોને મિશ્ર કરવામાં આવે છે. આ રીતે શુદ્ધ પેટ્રોલ અને ડીઝલ મળે છે. સેન્ટ્રલ આફ્રિકન રિન્યુએબલ એનર્જી કોર્પોરેશનના ચીફ એક્ઝિક્યુટિવ મુલેન્ગાએ જણાવ્યું હતું કે જો અમે અમારી સંપૂર્ણ ક્ષમતાનો ઉપયોગ કરીશું તો દેશમાં 30 ટકા સુધી ઇંધણની જરૂરિયાત પૂરી કરી શકીશું.
દુનિયા માટે નવી પહેલ
વિશ્વના ઘણા દેશોમાં વધતો કચરો પર્યાવરણ માટે અનેક રીતે ખતરો વધારી રહ્યો છે. એક અંદાજ મુજબ, વિશ્વમાં લગભગ 8.3 અબજ ટન પ્લાસ્ટિક હાજર છે. જો આ રીતે પેટ્રોલ અને ડીઝલ બનાવવામાં તેનો ઉપયોગ કરવામાં આવે તો આખી દુનિયામાંથી કચરો દૂર થઈ જશે. આ સાથે ઈંધણ મેળવવાનો રસ્તો પણ સાફ થઈ જશે. જો આ પ્રયોગ સફળ થશે તો ભારત જેવા દેશમાં જ્યાં પ્લાસ્ટિકનો ઘણો કચરો છે ત્યાં પેટ્રોલ અને ડીઝલ સરળતાથી તૈયાર કરી શકાશે.
