Uniform Civil Code / UCC એટલે 'યુનિફોર્મ સિવિલ કોડ': જેને લાગુ કરતા જ બદલાઇ જાય છે અનેક નિયમો, હાલ ક્યાં છે અમલમાં

• સીએમ ધામીએ વિધાનસભામાં યુનિફોર્મ સિવિલ કોડ બિલ રજૂ કર્યું 
• ઉત્તરાખંડ UCC લાગુ કરનાર દેશનું પ્રથમ રાજ્ય બનશે!
• UCC લાગુ કરતા જ બદલાઇ જશે અનેક નિયમો

આજે એટલે કે 6 ફેબ્રુઆરીના રોજ ઉત્તરાખંડના સીએમ પુષ્કર ધામીએ દેહરાદૂનમાં રાજ્ય વિધાનસભામાં યુનિફોર્મ સિવિલ કોડ બિલ રજૂ કર્યું છે. વિધાનસભામાં UCC બિલ રજૂ થતાં જ ગૃહની અંદરના ધારાસભ્યોએ વંદે માતરમ અને જય શ્રી રામના નારા લગાવવાનું શરૂ કરી દીધું હતું. જેના કારણે ગૃહની કાર્યવાહી બપોરે 2 વાગ્યા સુધી સ્થગિત કરવામાં આવી હતી. આજનો દિવસ સમગ્ર દેશ માટે ઐતિહાસિક દિવસ બની ગયો છે.

ઉત્તરાખંડ UCC લાગુ કરનાર દેશનું પ્રથમ રાજ્ય બનશે!
જણાવી દઈએ કે UCC ઓફિસમાં કમિટીના સભ્યોએ આ UCC ડ્રાફ્ટ તૈયાર કરવા માટે દિવસ-રાત કામ કર્યું છે. આ બિલને ગૃહમાં પસાર કરવા માટે રાજ્ય સરકાર પાસે સંપૂર્ણ બહુમતી છે. જો આ બિલ પસાર થઈ જશે તો ઉત્તરાખંડ આઝાદી પછી UCC લાગુ કરનાર દેશનું પ્રથમ રાજ્ય બનશે.  

યુનિફોર્મ સિવિલ કોડ શું છે?
ભારતમાં ધાર્મિક વિવિધતાને લીધે, દરેક મુખ્ય ધાર્મિક સમુદાય દરેક નાગરિકને શાસ્ત્રો અને રિવાજોના આધારે વ્યક્તિગત કાયદા દ્વારા સંચાલિત કરે છે. પરંતુ યુનિફોર્મ સિવિલ કોડથી દેશના તમામ નાગરિકોને સામાન્ય કાયદા હેઠળ ન્યાય મેળવવાનો અધિકાર મળશે. યુનિફોર્મ સિવિલ કોડમાં કહેવામાં આવ્યું છે કે લગ્ન, છૂટાછેડા અને સંપત્તિના વિભાજનમાં તમામ ધર્મો માટે સમાન કાયદો લાગુ થવો જોઈએ.

યુનિફોર્મ સિવિલ કોડ પર PM શું બોલ્યા હતા?
એક જ ઘરમાં પરિવારના સભ્યો માટે અલગ કાયદા ન હોય. જો એક ઘરમાં એક જ કાયદો હોય તો દેશ અલગ કાયદાઓથી કેમ ચાલે? બંધારણમાં પણ નાગરિકોના સમાન અધિકારની વાત કરી છે.  

યુનિફોર્મ સિવિલ કોડનો લાભ
તમામ નાગરિકોને સમાન દરજ્જો: એક બિનસાંપ્રદાયિક લોકશાહી દેશ તરીકે, અહીં રહેતા તમામ નાગરિકો, તેમના ધર્મ, વર્ગ, જાતિ, લિંગ વગેરેને ધ્યાનમાં લીધા વિના સમાન નાગરિક અને વ્યક્તિગત કાયદાનો લાભ મળશે. 

લિંગ અસમાનતાનો અંત આવશેઃ હકીકતમાં એવું માનવામાં આવે છે કે તમામ ધર્મોના અંગત કાયદાઓમાં મહિલાઓ સાથે ભેદભાવપૂર્ણ વ્યવહાર કરવામાં આવ્યો છે. ઉત્તરાધિકારની બાબતોમાં પુરુષોને સામાન્ય રીતે અધિકાર મળે છે. યુનિફોર્મ સિવિલ કોડ સ્ત્રી અને પુરૂષ બંનેને સમાન ધોરણે લાવશે. 

યુવા વસ્તી ધર્મ અને જાતિના બંધનમાંથી મુક્ત થશેઃ દેશના યુવાનો ધાર્મિક રૂઢિપ્રથાઓ છોડીને અન્ય ધર્મના સાથીઓની સાથે જીવન જીવવાનું પસંદ કરી રહ્યા છે. તેમને યુનિફોર્મ સિવિલ કોડનો સીધો ફાયદો થશે.

UCC બાદ શું બદલશે? 
- તમામ ધર્મો માટે છોકરીઓની લગ્નની ન્યુનત્તમ ઉમર 18 વર્ષ થશે 
- પુરુષ અને મહિલાઓ માટે તલાક આપવાનો સમાન અધિકાર 
- લિવ ઇન રિલેશનશીપની નોંધણી કરાવવી જરૂરી 
- લિવ ઇન રિલેશનશીપની નોંધણી ન કરાવનારને 6 માસની કેદ 
- અનુસૂચિત જનજાતિ UCCના દાયરાથી બહાર રખાશે 
- એક કરતા વધારે લગ્ન પર રોક 
- પતિ અથવા પત્નીના જીવિત રહેવા સુધી બીજા લગ્ન પર પ્રતિબંધ 
- લગ્નનું રજિસ્ટ્રેશન અને દસ્તાવેજીકરણ ફરજિયાત 
- સંપત્તિના ઉત્તરાધિકારમાં મહિલાઓને સમાન હક્ક 
- તમામ ધર્મો માટે લગ્ન અને તલાક માટે એક જ નિયમ 
- મુસ્લિમ સમૂદાયમાં લોકો 4 લગ્નો નહીં કરી શકે 

વધુ વાંચો: લાક્ષાગૃહ ચુકાદો : પાંડવોને મારી નાખવા બનાવ્યુંતું, લાખ-મીણ-ઘી વાપર્યું, કેવી રીતે બચ્યાં પાંડવો?

દુનિયાના કયા કયા દેશોમાં લાગુ છે UCC 
દુનિયાના ઘણા દેશોમાં યુનિફોર્મ સિવિલ કોડ લાગુ છે. આપના પાડોશી દેશ પાકિસ્તાન અને બાંગ્લાદેશમાં પણ UCC લાગુ છે. આ બંને દેશોમાં શરિયા આધારિત સમાન કાયદો તમામ ધર્મો અને સંપ્રદાયોના લોકોને લાગુ પડે છે.
આ સિવાય ઈઝરાયેલ, જાપાન, ફ્રાન્સ અને રશિયામાં પણ સમાન નાગરિક સંહિતા લાગુ છે. જો કે, કેટલાક કિસ્સાઓમાં, સમાન નાગરિક અથવા ફોજદારી કાયદાઓ પણ લાગુ પડે છે. 
યુરોપિયન દેશો અને અમેરિકામાં બિનસાંપ્રદાયિક કાયદા છે, જે તમામ ધર્મના લોકોને સમાન રીતે લાગુ પડે છે. 
વિશ્વના મોટાભાગના ઇસ્લામિક દેશોમાં, શરિયા પર આધારિત એક સમાન કાયદો છે, જે ત્યાં રહેતા તમામ ધર્મોના લોકોને સમાન રીતે લાગુ પડે છે.