તોડફોડ / ભાજીપાંઉ ખરાબ હતા’ કહી અમરાઈવાડીમાં બે ભાઇઓએ આતંક મચાવ્યો, રૂપિયા પરત માંગતા મામલો બિચક્યો

• ‘ભાજીપાંઉ ખરાબ હતા’ કહી બે ભાઈએ લૂંટ ચલાવી
• બંને યુવકે ભાજીપાંઉની લારી પર તોડફોડ કરી આતંક મચાવ્યો
• બે ભાઇઓ વિરુદ્ધ લૂંટ તેમજ મારામારીની ફરિયાદ

‘ભાજીપાંઉ ખરાબ હતા’ તેમ કહી બે ભાઇઓએ ભાજીપાંઉની લારી ચલાવતા યુવક અને કારીગરને માર મારી પાંચ હજાર રૂપિયાની લૂંટ ચલાવી હોવાની ઘટના સામે આવી છે. ક્વોલિટી ખરાબ હોવાનું કહી હુમલાખોર યુવકે ૧૦૦ રૂપિયા પરત માગ્યા હતા. ભાજીપાંઉની લારીના મા‌િલકે રૂપિયા પરત આપવાની જગ્યાએ બીજા ભાજીપાંઉ બનાવી આપવાનું કહેતાં મામલો બીચક્યો હતો. યુવકે તેના ભાઇને બોલાવી દીધો હતો. ત્યાર બાદ ભાજીપાંઉની લારીમાં તોડફોડ કરી દીધી હતી. 

લૂંટ તેમજ મારામારીની ફરિયાદ કરી
અમરાઇવાડી વિસ્તારમાં આવેલા શુક્લા મંગલદાસની ચાલીમાં રહેતા અને ભાજીપાંઉ તથા ચાઇનીઝની લારી દ્વારા પોતાનું તેમજ પરિવારનું ગુજરાન ચલાવતા વિનોદ ગુપ્તાએ અમરાઇવાડી પોલીસ સ્ટેશનમાં વિકાસ ઉર્ફે વિક્કી અગ્રવાલ તેમજ તેના ભાઇ શિવમ અગ્રવાલ (બંને રહે. સંજયનગર, અમરાઇવાડી) વિરુદ્ધ લૂંટ તેમજ મારામારીની ફરિયાદ કરી છે. 

બંને ભાઈઓએ પૈસા આપવાની ના પાડી બીજી ભાજીપાઉં બનાવવા કહ્યું હતુંઃ વેપારી
શનિવારના દિવસે વિનોદ ધંધા પર હાજર હતો ત્યારે રાતના દસેક વાગ્યાની આસપાસ વિકાસ ઉર્ફે વિક્કી ભાજીપાંઉ લેવા માટે આવ્યો હતો. વિનોદે ભાજીપાંઉ પાર્સલ કરી આપતાં વિકાસ ત્યાંથી ઘરે જતો રહ્યો હતો. બીજા દિવસે એટલે કે ગઇ કાલે વિકાસ ફરી વિનોદની લારી પર આવીને કહેવા લાગ્યો હતો કે ગઇ કાલે હું જે ભાજીપાંઉ લઇ ગયો હતો તે ખરાબ નીકળ્યા હતા, જેથી તું મને મારા ૧૦૦ રૂપિયા પરત આપી દે. આથી વિનોદે રૂપિયા આપવાનો ઇનકાર કરી દીધો અને ૧૦૦ રૂપિયા પરત આપવાની જગ્યાએ બીજા ભાજીપાંઉ બનાવી આપવાનું કહ્યું હતું. 

વેપારી તેમજ કારીગરને માર માર્યો હતો
ત્યાર બાદ વિકાસ ભાજીપાંઉ લેવાની ના પાડીને વિનોદને ગાળો બોલી માર મારવા લાગ્યો હતો. દરમિયાન વિનોદનો કારીગર તેને છોડાવવા માટે વચ્ચે પડ્યો હતો. વિકાસે તેના ભાઈ શિવમને ફોન કરી બોલાવી લીધો હતો, જેથી તે છરી લઇને આવ્યો હતો. વિકાસ અને શિવમે ભેગા મળી વિનોદના કારીગરને માર માર્યો હતો તેમજ વિનોદ ઉપર પર હુમલો કર્યો હતો. આ દરમિયાન બંને ભાઇઓએ લારીમાં રહેલા પાંચ હજાર રૂપિયા લૂંટી લીધા હતા અને લારી ઊંધી પાડી દીધી હતી. શિવમે છરી મારવાની કોશિશ કરી, પરંતુ તે બચી ગયો હતો. બૂમાબૂમ થતાં આસપાસના લોકો ભેગા થઇ ગયા હતા, જેથી વિકાસ અને શિવમ નાસી ગયા હતા. વિનોદે આ મામલે અમરાઇવાડી પોલીસ સ્ટેશનમાં બે ભાઇઓ વિરુદ્ધ લૂંટ તેમજ મારામારીની ફરિયાદ કરી છે.