નિ:શુલ્ક શિક્ષણ / ગુજરાતની આ શાળાઓ આવી અનાથ બાળકોની વ્હારે,કહ્યું ફ્રીમાં શિક્ષણ આપીશું

• અનાથ બાળકોની વ્હારે આવી ખાનગી શાળાઓ 
• સરકાર દ્વારા પણ આર્થિક સહાય કરવામાં આવશે
• અનાથ બાળકો માટે કેન્દ્ર સરકાર પણ કરશે મદદ

રાજ્યામાં કોરોનાને લીધે મંદી જેવો માહોલ છે જેના કારણે અનેક વેપાર ધંધાને અસર થઈ છે બીજી તરફ કોરોનાને કારણે અનેક લોકોએ જીવ ગુમાવ્યો છે. કેટલાકે પરિવાજનો સ્વજનો ગુમાવ્યા છે તો કેટલાક બાળકો અનાથ પણ થયા છે. ત્યારે રાજકોટની ખાનગી શાળાઓ અનાથ વિદ્યાર્થીઓની વ્હારે આવી છે. જે બાળકોએ કોરોના કાળમાં માતા પિતા ગુમાવ્યા હોય તેવા બાળકોને હવે ખાનગી શાળા મદદ રૂપ બનશે.  

ખાનગી શાળાઓ અનાથ બાળકોની વ્હારે 

રાજકોટમાં અનેક ખાનગી શાળાઓ અનાથ વિદ્યાર્થીઓની વ્હારે આવી છે. કોરોનાને કારણે અનાથ થયા હોય તેવા 25 અનાથ બાળકોની ફી માંફી કરવાનો શાળાઓએ નિર્ણય કર્યો છે આ શાળાઓમાં જય ઈન્ટરનેશનલ સ્કૂલ, SOS સ્કૂલ, અક્ષર પ્રાઈવેટ સ્કૂલ, સેન્ટ ગાર્ગી પ્રાઈવેટ સ્કૂલ સહિત અનેક ખાનગી સ્કૂલોએ પણ અનાથ વિદ્યાર્થીઓને ફી માફીનો નિર્ણય કર્યો છે. સાથે જ સાંઈરામ દવેની નચિકેતા સ્કૂલે પણ કોરોનાના કારણે માતા પિતા ગુમાવનાર વિદ્યાર્થીઓને નિ:શુલ્ક શિક્ષણ આપવાની જાહેરાત કરી છે.

રાજ્ય સરકાર પણ અનાથ બાળકોને કરશે સહાય 

મહત્વનું છે કે ગુજરાત સરકાર દ્વારા પણ અનાથ બાળકો માટે  બાળ સેવા યોજનાનો પ્રારંભ કર્યો છે જેમાં કોરોનાના કારણે મૃત્યુ પામેલ માતાપિતાના બાળકો માટે દર મહિને રૂપિયા 4000 સહાય આપવાની જાહેરાત કરી છે. તેમજ 18 વર્ષ પૂર્ણ કર્યા હોય તેવા બાળકો માટે આફ્ટર કેર યોજના શરૂ કરવામાં આવી છે. જેમાં દર મહિને 6000 રૂપિયા આપવાની જાહેરાત કરી છે. આવા બાળકો માટે વિદેશમાં અભ્યાસ માટે પણ મદદ કરવામાં આવશે. 

PM કેર ફંડમાંથી પણ આપવામાં આવશે સહાય  

કેન્દ્ર સરકારે પીએમ કેર ફંડ દ્વારા કોરોના વાયરસથી પ્રભાવિત થયેલા બાળકો માટે અનેક કલ્યાણકારી યોજનાઓની જાહેરાત કરી છે. દેશમાં કોરોનાના કારણે અનાથ થયેલા બાળકો માટે કેન્દ્ર સરકારે મોટી જાહેરાત કરી છે. આવા બાળકોને PM કેર ફંડમાંથી 10 લાખની મદદ કરાશે. તેમનો ભણવાનો ખર્ચ પણ આ ફંડમાંથી અપાશે. 18 વર્ષની ઉંમર સુધી દર મહિને આર્થિક મદદ કરાશે.આ ઉપરાંત બાળકની ઉંમર 23 વર્ષ થશે ત્યારે 10 લાખની સહાય અપાશે.