સૌરાષ્ટ્રમાં ભારે વરસાદી માહોલ જોવા મળી રહ્યો છે. તેમાં પણ હવે ત્રિજો રાઉન્ડ શરૂ થઈ ગયો છે ત્યારે 2 દિવસના વિરામ બાદ ફરી ગીર પંથકમાં વરસાદે ધમાકેદાર એન્ટ્રી કરી છે. જેતપુરમાં 2 કલાકમાં જ 3 ઈંચ જેટલો વરસાદ ખાબક્તા અનેક વિસ્તારો પાણીમાં ગરકાવ થઈ ગયા હતા. ધોરાજીમાં 12 ઇંચ જેટલો વરસાદ નોંધાયો છે. વરસાદના પગલે ધોરાજી અને સૂત્રાપાડામાં જળબંબાકર સર્જાયું છે.
60 લોકોનું રેસ્ક્યૂ કરાયું
ધોરાજીમાં પાણીમાં ફસાયેલા 60 લોકોનું રેસ્ક્યૂ કરાયું છે ભારે વરસાદના કારણે નીચાણવાળા વિસ્તારમાં પાણી ભરાયા છે. જેને લઈ લોકો પાણીમાં ફસાઈ ગયા હતાં. PI સહિતના પોલીસ જવાનોએ પંચનાથ મહાદેવ વિસ્તારમાંથી ફસાયેલા લોકોનું રેસ્ક્યૂ કર્યુ છે.
ધોરાજીમાં અનરાધાર વરસાદ
રાજકોટના ધોરાજીમાં આજે આભ ફાટ્યા જેવી પરિસ્થિતિ જોવા મળી છે. ધોરાજીમાં ભારે વરસાદને કારણે અનેક વિસ્તારોમાં પાણી ભરાયા છે. ધોરાજીના જેતપુર રોડ ઉપર આવેલા અવેડા લાઈન વિસ્તારના ઘરમાં પાણી ભરાયા છે ઘરમા પાણી ભરાવાને લઈ સ્થાનિકો મુશ્કેલીમાં છે.
શાક માર્કેટ વિસ્તારમાં પાણી ભરાયા
રાજકોટના ધોરાજીમાં અનારાધાર વરસેલા વરસાદના પગલે શાક માર્કેટ વિસ્તારમાં પાણી ભરાયા છે. શાક માર્કેટ વિસ્તારમાં ગોઠણ સમા પાણી ભરાયા છે. સતત વરસાદને લઈ અનેક વિસ્તારમાં પાણી ભરાયા છે જેને લઈ લોકોને મુશ્કેલી વેઠવાનો વારો આવ્યો છે.
દરિયા કાઠાં વિસ્તારમાં 4 ઇંચ વરસાદ ખાબક્યો
ગીર સોમનાથ જિલ્લાના દરિયા કાઠાં વિસ્તારમાં 4 ઇંચ વરસાદ ખાબક્યો છે. ગીરના દરિયા કાઠાં વિસ્તારમાં ભારે વરસાદના કારણે પાણી ભરાયા છે. ભારે વરસાદથી માલશ્રમ ગામે પાણી ભરાયા છે તેમજ કોડીનાર, સુત્રાપાડા, તાલાલા અને વેરાવળના ગ્રામ્ય પંથકોમાં ભારે વરસાદ ખાબક્યો છે.
ઉતાવળી નદી ગાંડીતૂર
જામકંડોરણા તાલુકામાં બે કલાકમાં પાંચ ઇંચથી વધુ વરસાદ વરસ્યો છે. ધોધમાર વરસાથી ઉતાવળી નદી ગાંડીતૂર બની છે તેમજ ધોરાજી નાકા પાસેના નીચાણવાળા વિસ્તારોમાં પાણી ભરાયા છે. નીચાણવાળા વિસ્તારમાં લોકોને સલામત સ્થળે ખસેડવાની કામગીરી શરૂ કરાઈ છે.
